Yaasi 6 - Kafa Linguistics Project

Yaariki Xaqqee Uxeroo Dihoo

¹ Ebiyooba Yaariki asheenaꞌo Israꞌeeleenaꞌon shatoochee tiyitona, boonoshi katemee uxeree kelleenaꞌon hicciꞌiniye boonoshi beeto; katemoochee maach kechii beetonaa maaxoochee katemooch giyii beetona koniyoona aalloone.

² Doono Yeeri Yaasich ishichiye: “Ebeege, Yaarikin bi taatoonaa bi ginee anaaminaꞌona tookkii ne kishooch beshiyaꞌa immeto taane.

³ Katemoon neennaa ne ginee naayinaꞌona heeyooch ikke wottoon guudote; eechibee shiritte qemon tuniibote.

⁴ Shabaatte qeesheenaꞌo bagee baaddoochi qaroochee shuuneeti shabaatte tiroon (waaringoon) yeshiree, taabootee aafooch hambeete. Shabaattinnee qemooba, qeesheenaꞌo tiroon hugi beetaa, katemoon shabaatte wottoon guudote.

⁵ Aroochee ikke wottoon tiroo kuxaanoon hukketaa ittoshi waayehooba, bekkech ginee naayinaꞌo bulli oogeti qaaroona bunnebeete. Arooba katemee xaqqee uxeroo gugummii dihemmone; ginee naayinaꞌoo boonoshi ikkikkoona keyiree, boonoshi neexetoochaa maac yixi gibeete” iye.

⁶ Ebich Nuuni bushoo Yaasi qeesheenaꞌon ceeggiꞌi, “Wogee taabootoon shaagote; shabaatte qeesheenaꞌo shabaatte tiroon yeshiree, Doono Yeerichi taabootee aafooch shiichibeete” iye.

⁷ Ginee naayinaꞌonoo “Tiyiree hambote; katemoon guudote. Ittoshi daggoochee qatinaꞌo Doono Yeerichi taabootoyee shiichi aaf hambeete” iye.

⁸ Yaasi gettitoommon, shabaatte qeesheenaꞌo Doono Yeeri aafooch shabaatte tiroon yechiꞌi huggiibee, aaf shiichiyeete. Doono Yeerichi wogee taabootoo boonoshi hillooch dabbiye.

⁹ Tiroon huggiibeeti qeesheenaꞌoyee aaf shiichiti ginee naayinaꞌo hammimmona, gubbaa deebo tuneti ginee naayinaꞌo wotta taabootoon dabbiyeete. Ebichi daggooch tiroo kuxaanoon hukkee beehe.

¹⁰ Yaasiyoo ginee naayinaꞌoyich, “Bunnebote; ta immi wottoon, bunneyaahote; qaareyaahote; ittoshi noonoochee ikke qaarolla kechaaye. Ittoshi bunnemmo, bunnebote, ta getigaatane” iye.

¹¹ Ebich Yaasi Doono Yeerichi taabootoon shaagiree, katemoon ikke wottoon boonoshi guuddemmoyich tuniihe. Aroochee kaambooch wotteꞌi qeyiyeete.

¹² Yaasi bi dechara maaddoona tiyiye. Qeesheenaꞌo Doono Yeerichi taabootoon shaaggiyeete.

¹³ Shabaatte qeesheenaꞌo shabaatte tiroon yechiꞌi, Doono Yeerichi taabootee aaf hammiibee, tiroon kuxaanoon huggii beeheete. Eboshin shiichiti ginee naayinaꞌo qaxirii beetaa, gubbaa deebo tuneti ginee naayinaꞌo wotta Doono Yeerichi taabootoon dabbii beeheete. Tiroo kuxaanoon hukkee beehe.

¹⁴ Ebi decharooboo katemoon ikke wottoon boonoshi guudditoyee gubb, kaambooch wotteheete. Ceeni shiritte qemon ebiyoommon tuniiheete.

¹⁵ Shabaattinnee qemooba, batt haree gaargaarooch tiyiyeete. Aafichoommon tuniibee, katemoon shabaatte wottoon guuddiyeete. Shabaatte wottoon katemoon boonoshi guuddito arooba baachiye.

¹⁶ Shabaattinnee guudoochaa qeesheenaꞌo tiroon huggiyona, Yaasi ginee naayinaꞌoyich ishichiye: “Doono Yeeri hini katemoon nooch immitone; bunnebote.

¹⁷ Katemoonaa bi daggooch beeto bullina Doono Yeerich yaafeeto bi tunetoyich, ciroona aalliibote; no wochetaa hammiti qiiddechinaꞌon bi aachitoyich, yahechi Rahaabinaa biinna tookkii bi kexooch beetinaꞌona baach echebeete.

¹⁸ Tunebaani timeeti mooyinaꞌoochee amoonolla ittoshi qellich daamiree, Israꞌeeleenaꞌo toommooch xuuxoonaa aalloonon ittoshi deebaachemmoyich, ittoshi qelloon ariibote!

¹⁹ Aachoo, birewoo, gooshoonaa xuuroonoochee shuuneeti qiico bulli Doono Yeerich yaafeeto bi tunetoyich, Doono Yeerichi kechi ginjabeetooch gedote” iye.

²⁰ Ebich tiroo hukkemmona, ginee naayinaꞌo ebi are tiree qaaroon waayeꞌi, oogeti qaaroona bunneheete. Bekkech katemee xaqqee uxeroo gugummii dihiye. Ginee naayinaꞌo bulli boonoshi ikkikkoona kechiꞌi boonoshi neexetoochaa maac yixii giyiyeete. Katemoo boonoshi kishooch tunehe.

²¹ Katemooch beeto bullin, ebiyoo anaamon, maacheen, bushoon, geenoon, wotta miimon, bagoonaa emmishoonon, kuroonoo goraadoona hidii aalliiheete.

²² Yaasi showoon qiidditi gutte asheenaꞌon “Yahechi Rahaabi kexooch gibote; biich ittoshi wogetoommon, biinnaa biicho tuneto bullinon aroochee kichibote” iye.

²³ Ebich ebi are gutte gurimaashe qiiddechinaꞌo giyiꞌi, Rahaabin, bi nihoonaa bi indeenon, anaami bi maneenaꞌonaa biicho tuneto bullinon aroochee kichiyeete. Bi kechi asheenaꞌo bullin kichiꞌi Israꞌeeleenaꞌochi kaamboyee maach tuniiheete.

²⁴ Aroochee Israꞌeelee ginechinaꞌo katemoo bullinaa bi daggooch beeto bullinon michiyeete; tunebaani birewoonaa aachoonon, gooshoonaa xuuroonoochee shuuneeti qiicoon daammii Doono Yeerichi kechi ginjabeetooch geddiyeete.

²⁵ Wotta Yaarikin boonoshi qiiddemmoyich, wochee bi daachiiti asheenaꞌon bi aachitoyich, Yaasi yahechi Rahaabin, bi kechi asheenaꞌonaa biicho tuneto bullinon wodiihe. Bi yareenaꞌoo hanaach beddaahaa Israꞌeelee showooch beetinaꞌone.

²⁶ Arooba Yaasi ishichiꞌi callehe: “Hini Yaariki katemoon wochinnoon shuunemmo koniyoona Doono Yeeri aafooch uppeton tunebe. Katemoon shuuneya bi baashihooba, bi gutenee bushoo qitemmone; katemee kellooch shaaqqoon bi xogihooba, guuche ciire bi bushoo qitemmone” iye.

²⁷ Ebich Doono Yeeri Yaasina tookkii tunehe; bi mooyo showoo bulliich waayeehe.