Yaasi 4 - Kafa Linguistics Project

Asheenaꞌo Shalligichee Xaqqeenaꞌon Neechoo

¹ Israꞌeeleenaꞌo bulli Yoordaanoosin boonoshi kimmitoyee gubb, Doono Yeeri Yaasich ishichiye:

² “Israꞌeelee yoodi yoodoochee ikkikke ashoon, ebiyoo aaraa gutte asheenaꞌon kaace.

³ Ebina Yoordaanoosi aachi daggoochee, ebiyoo qeesheenaꞌo neexeti xaaꞌoochee, aaraa gutte xaqqeenaꞌon tiijji shaagi kimiree, hanaach ittoshi qeyemmi xaaꞌooch boonoshi kotiyemmoyich gete” iye.

⁴ Ebich Yaasi Israꞌeelee yoodi yoodoochee bi ukkiriiti ikkikke ashoon, ebiyoo aaraa gutte asheenaꞌon, ceeggiꞌi,

⁵ boonoshich ishichiye: “Ittoshi Nuggishoo Doono Yeerichi taabootoyee aaf shiichi, Yoordaanoosi aachi daggooch hambote. Ittoshi ikkikkoona Israꞌeelee yoodee haddoona ikkikke xaqqoon tiijji ittoshi gogooch shaagote.

⁶ Ebiyoo asheenaꞌoyich malletoo tunemmone. Gubbich ittoshi bushiisheenaꞌo ‘Ebi xaqqeenaꞌo ameechinaꞌone?’ iꞌi ittoshin boonoshi echehooba,

⁷ boonoshich Yoordaanoosi aaco Doono Yeerichi wogee taabootee aafooch bi neexoon, ebiyoo taabootoon shaaggitinaꞌo Yoordaanoosin kimiyooba, wocaanoon bi neexoon, boonoshich gettemmo ittoshine. Ebina ebi xaqqeenaꞌo Israꞌeeleenaꞌoyich bulli yemeenee shalligicheenaꞌo tunemminaꞌone” iye.

⁸ Ebi aaraa gutte asheenaꞌo Yaasi gettitoommon tuniiheete. Doono Yeeri Yaasich gettitoommon, Israꞌeelee yoodi yoodee haddoona, aaraa gutte xaqqeenaꞌon Yoordaanoosi aachi daggoochee tiijjii, asheenaꞌo qeyemmi xaaꞌooch beddaahaa shaaggii daammiꞌi, arooch kotiiheete.

⁹ Wotta Yaasi wogee taabootoon shaaggiti qeesheenaꞌo neexeti, Yoordaanoosi aachi gutte daggooch, bare aaraa gutte xaqqeenaꞌon neechiye. Ebi xaqqeenaꞌo hanaach beddaahaa are xaaꞌooch beetinaꞌone.

¹⁰ Muusi Yaasich gettitoommon, Doono Yeeri asheenaꞌoyich bi gettemmoyich Yaasich gettiti mooyo bulli ceennimmi wottoon, taabootoon shaaggiti qeesheenaꞌo Yoordaanoosi aachi gutte daggooch neexee beeheete. Asheenaꞌo kimmito, afaafinoonane.

Israꞌeeleenaꞌo Kaamboon Galigala Geddiꞌi Koto

¹¹ Boonoshi bulli kimmitoyee gubb, qeesheenaꞌo Doono Yeerichi taabootoon shaaggii kimmiꞌi, asheenaꞌoyee aaf shiichiyeete.

¹² Roobeelinaa Gaadinochi yoodeenaꞌonaa Minaasi yoodoochee qatinaꞌona Muusi boonoshich gettitoommon, ginee koyoyich cuyee qanniꞌi, Israꞌeeleenaꞌoyee aaf shiichii kimmiyeete.

¹³ Aabbe hum bedeenaꞌo koyoyich qanniꞌi, Doono Yeeri aafooch aacon kimmii hammiꞌi, Yaariki bakkooch shaggiyeete.

¹⁴ Ebi arooba Doono Yeeri Yaasin Israꞌeeleenaꞌo bulli aafooch oogiihe. Boonoshiyoo Muusin boonoshi shatoommon, Yaasin kashoona bi beeti yemeeno bullin shattiyeete.

¹⁵ Aroochee Doono Yeeri Yaasich

¹⁶ “Miixee taabootoon shaaggiti qeesheenaꞌo Yoordaanoosi aachi daggoochee boonoshi kechemmoyich gete” iye.

¹⁷ Ebich Yaasi qeesheenaꞌon “Yoordaanoosi aacoochee keyote” iye.

¹⁸ Qeesheenaꞌo Doono Yeerichi wogee taabootoon shaaggii, Yoordaanoosi aachi daggoochee kechiꞌi, showoon boonoshi neexximmona, Yoordaanoosi aaco wonnee bi goorooch wottehe; aafichoommon ceennii beshii, gaagemoon capphiye.

¹⁹ Ikkinnee ageno giyiti aashirinnee qemooba, asheenaꞌo Yoordaanoosin kimmiꞌi, Yaarikaa aabi-keyo waani gocooch, Galigala boonoshi kaamboon geddii koteheete.

²⁰ Yaasiyoo Yoordaanoosi aacoochee boonoshi kichii deebiti aaraa gutte xaqqeenaꞌon Galigala xogii neechiye.

²¹ Israꞌeeleenaꞌoyichoo ishichiye: “Gubbich ittoshi shiijjereenaꞌo ‘Ebi xaqqeenaꞌo ameechinaꞌone?’ iꞌi boonoshi echehooba,

²² ‘Israꞌeeleenaꞌo hini Yoordaanoosin shuuꞌi showoona kimmiyeete’ getote” iye.

²³ Daakkiꞌi ishichiye: “No kimmemmi wottoon, no Nuggishoo Doono Yeeri Ceelle baharoon nooch bi shuuꞌiyoommon, ebiyoommon ittoshi kimmimmi wottoon, Nuggishoo Doono Yeeri Yoordaanoosi aacon ittoshich shuuꞌiitone.

²⁴ Ebin bi tuniito, Doono Yeerichi mochoo giidecho bi tunoon showee toommeexi aageteenaꞌo bulli ariyemmonaa ittoshiyoo, ittoshi Nuggishoo Doono Yeerin bulli yemeenoon ittoshi shattemmonoyichiye” iye.