Yaasi 3 - Kafa Linguistics Project

Israꞌeeleenaꞌo Yoordaanoosin Kimo

¹ Bi dechara maaddoona Yaasinaa Israꞌeeleenaꞌo bullina Shixiimee tiyiꞌi Yoordaanoosi aacooch hammiyeete. Boonoshi kimoyee shiichii, kaamboon geddiꞌi koteheete.

² Keejje qemoyee gubb asheenaꞌochi ukkireenaꞌo kaambee daggoona besheebee,

³ asheenaꞌoyich ishichiyeete: “Qeesheenaꞌo tuneti Leweenaꞌo ittoshi Nuggishoo Doono Yeerichi wogee taabootoon boonoshi shaagaa ittoshi beegiyooba, ittoshi kaamboon happi, hini xaaꞌoochee tiyiree, taabootoon dabbibote.

⁴ Ebiyee aaf ebi gommona hammii ariyaano ittoshi tunetoyich, aabi waanaa ittoshi hammemmo gaata, ebina ariyemmo ittoshine. Tunebaani taabootoyee gutte hume hira bedoon wohiree qaxiribote. Taabooto waan katinnaahote” iyeete.

⁵ Aroochee Yaasi asheenaꞌoyich, “Yaach Doono Yeeri ittoshi daggooch gaakkechi shuunoon shuunemmo bi tunetoyich, yaafeebote” iye.

⁶ Ebichi hillooch Yaasi qeesheenaꞌoyich, “Wogee taabootoon shaagiree, asheenaꞌoyee shiichi aaf beshebote” iye. Boonoshiyoo wogee taabootoon shaaggiꞌi, asheenaꞌoyee aaf shiichii qaxiriyeete.

⁷ Doono Yeeriyoo Yaasich ishichiye: “Muusina tookkii ta tunetoommon, ebiyoommon neenna tookkii ta tunoon boonoshi ariyemmoyich, hanaachiyee tiijjiree, Israꞌeeleenaꞌo bulli aafooch neen oogiyemmo taane.

⁸ Wogee taabootoon shaaggiti qeesheenaꞌoyich, ‘Yoordaanoosi aachi gashooch ittoshi shagiyooba, aachi daggooch giyi neexebote’ gete” iye.

⁹ Yaasiyoo Israꞌeeleenaꞌon “Hach gidderee, ittoshi Nuggishoo Doono Yeeri qaaroon waayebote” iye. Asheenaꞌo giddetaa,

¹⁰ boonoshich ishichiye: “Beeyechi Nuggishoo Yeeri ittoshi daggooch bi beemonaa aroo iberoon Kanaaneenaꞌon, Hiteenaꞌon, Hiweenaꞌon, Ferizeenaꞌon, Girigaasheenaꞌon, Amooreenaꞌonaa Yebuseenaꞌonon ittoshi aafoochee yookkemmo bi tunoonon ittoshi ariyemmo, ebinane.

¹¹ Bulli showee Doonochi wogee taabooto ittoshiyee shiichiree Yoordaanoosi aacoch hammemmone.

¹² Illa Israꞌeelee yoodi yoodoochee ikkikke ashoon tunii, aaraa gutte asheenaꞌon kaacote.

¹³ Bulli showee Doono, Doono Yeerichi taabootoon shaaggiti qeesheenaꞌo boonoshi baatoon batt aacooch boonoshi geddimmona, dugilla wocciibeeti Yoordaanoosi aaco bekkech kuxemmone; gutoochoommonoo neexemmone” iye.

¹⁴ Ebich Yoordaanoosin kimoyich, kaamboon geddiꞌi boonoshi koteti xaaꞌoon gawukkii boonoshi kechimmona, wogee taabootoon shaaggiti qeesheenaꞌo boonoshi aaf shiichii hammiyeete.

¹⁵ Arooba maayi qecci gooroo bi tunetoyich, Yoordaanoosi oogeton ceennii gaagemoon capphitone. Taabootoon shaaggiti qeesheenaꞌo Yoordaanoos shaggiꞌi, boonoshi baatoon aacooch boonoshi geddimmona,

¹⁶ wocciibeeti aaco neexehe. Tsaretaani katemee gaꞌooch beeti, Addaami getteebeeti wohi katemee katinooch aaco kiceeꞌi guteehe; dugilloon Arabee baharo, ebi geto Kiikki baharo waan, wocciibeeti aaco ciroona kuxee neexehe. Asheenaꞌoo Yaariki ciino waanaa kimmiyeete.

¹⁷ Israꞌeeleenaꞌo bulli shuuꞌi showoona boonoshi kimmii beetaa, Doono Yeerichi wogee taabootoon shaaggiti qeesheenaꞌo Israꞌeeleenaꞌo bulli kimmimmi wottoon, Yoordaanoosi aachi gutte daggooch shuuꞌi showooch neexee beeheete.