Yaasi 24 - Kafa Linguistics Project

Shekeemaa Yaasi Yibbaateti Ciireexi Yibbaatoo

¹ Aroochee Yaasi Israꞌeelee yoodeenaꞌo bullin ikkooch Shekeem kiciye. Israꞌeelee geeneenaꞌon, ukkireenaꞌon, nallechinaꞌonaa iraasheenaꞌonon ceeggiye. Boonoshiyoo Yeeri aafooch giddeheete.

² Yaasiyoo asheenaꞌo bullich ishichiye: “Israꞌeelee Nuggishoo Doono Yeeri ishichiye: ‘Wonna ittoshi qaabbechinaꞌo Efiraaxisi aachee beqach beeheete; bare nuggisheenaꞌoyichoo goyinnee maddee beeheete; boonoshi daggoochee ikkoo, Abrahaminaa Nakoorinochi nihoo Taarine.

³ Tawoo ittoshi qaabbechi Abrahamin Efiraaxisee bekk beeti showoochee deebaa, Kanaanee showoo bulli daggooch biin yaabiyoye; bi shiijjereenaꞌon meechiyoye; Yisaaqinoo biich immehoye.

⁴ Yisaaqichoo, Yaaqobinaa Esayinon immehoye. Esayichoo Seyiree geppe showoon bi hajjoon tuniyaꞌa immehoye; tunebaani Yaaqobinaa bi bushiisheenaꞌona Gibits kindiyeete.

⁵ “ ‘Aroochee Muusinaa Harooninon wochaa daachiihoye; naxoon kindiyaꞌa Gibitseenaꞌon ta naxetoyee gubb, ittoshin aroochee kichiyoye.

⁶ Ittoshi qaabbechinaꞌon Gibitsee kichiyoye. Arooba Gibitseenaꞌo boonoshi ogooge gaarinaꞌonaa hareshechinaꞌona tuneꞌi Ceelle baharooch beddaahaa ittoshi qaabbechinaꞌon dabbiyeete. Ittoshi qaabbechinaꞌoo baharooch shaggiichii,

⁷ Doono Yeeri ta waan boonoshi cookaa, tawoo boonoshinaa Gibitseenaꞌonochi gutte daggooch manderoon tuniihoye. Baharoon boonoshi toommooch ta wochaa, qoocheheete. Gibitseenaꞌo toommooch ta tuniiton beeggito ittoshine. “ ‘Ittoshiyoo barahooch meeti naton kotehote.

⁸ Yoordaanoosi aacoochaa aabi-keyo waan beeti Amooreenaꞌo showooch ittoshin daammoye. Boonoshiyoo ittoshina koyeheete. Tunebaani ta, ittoshi kishooch boonoshin beshiyaꞌa immehoye; ittoshi aafoochee boonoshin aalliihoye. Ittoshiyoo boonoshi showoon hajjiyote.

⁹ Moꞌabee taatoo tuneti Tsifoori bushoo Balaaqi ittoshin kochiye; ittoshinoo waaree bi uppemmoyich, Beꞌoori bushoo Balaam waan wochoon daachiihe.

¹⁰ Tunebaani Balaami ittoshin bi uppemmoyich daaggaano taane; ebich wochii wochiꞌi ittoshin diiriye; ebina tawoo Balaaqi kishoochee ittoshin wodiihoye.

¹¹ “ ‘Aroochee Yoordaanoosin kimmiꞌi, Yaarika waahote. Yaariki asheenaꞌo ittoshina koyeheete. Aree hillooch Amooreenaꞌo, Ferizeenaꞌo, Kanaaneenaꞌo, Hiteenaꞌo, Girigaasheenaꞌo, Hiweenaꞌonaa Yebuseenaꞌona ittoshina koyeheete; tunebaani boonoshin ittoshi kishooch immehoye.

¹² Ittoshiyoo aaf ittoshi qaxirimmi haddoona gutte Amooree taateenaꞌon yookkii kichoyich boonoshin betiihoye. Ebi bulli tuneto, ittoshi goraadoona woyee maꞌoona ittoshi koyetaa toonoone.

¹³ Ebina ittoshi aayaani showoonaa ittoshi shuuneyaani katemeenaꞌonon ittoshich immehoye; andoo ebi katemeenaꞌooch beeto ittoshine. Ittoshi bechaani woyinee aafoonaa zayitee michi aafoonon maabeeto ittoshine’ itone.

¹⁴ “Andoo Doono Yeerin shatote; ibere mulloona gibeneeton tuneree biich maddebote; ittoshi qaabbechinaꞌo Efiraaxisee beqach Mesopotaamee showooch boonoshi beehooba, wotta aroyee gubb Gibits boonoshi beehooba, boonoshi goyinnee maddeti nuggisheenaꞌon ittoshi waanee wokkiibote. Doono Yeeri ikkeetoyich baach goyinne maddebote.

¹⁵ Tunebaani Doono Yeerich goyinnee maddoo ittoshich gaaweto tuneꞌi bekko bi qayigaata, ittoshi qaabbechinaꞌo Efiraaxisee beqach beeti Mesopotaamee showooch boonoshi beehooba, boonoshi goyinnee maddeti nuggisheenaꞌoyich woyee boonoshi showooch ittoshi beeti Amooreenaꞌo goyinnee maddeti nuggisheenaꞌoyich goyinne maddemmo ittoshi tunegaata, ittoshi goyinne maddemmon hanaach goomiree kaacote. Tunebaani taannaa ta kechi asheenaꞌona no goyinne maddemmo Doono Yeerichiye” iye.

¹⁶ Aroochee asheenaꞌo ishichiꞌi wochiyeete: “Bare nuggisheenaꞌoyich goyinne maddeya iꞌi Doono Yeerin qayoo no waanee wohe!

¹⁷ Noonnaa no qaabbechinaꞌonon Gibitsee showeexi guuchittinoochee kichito, no aafoochoo ebi worganikkiti malleteenaꞌon shuuneto, boonoshi daggoona no besheti aageteenaꞌo bulli kishoocheenoo noon quyeto, konine? No Nuggishoo Doono Yeeri toone?

¹⁸ Doono Yeeri hini showooch beeti aageteenaꞌo bullin, Amooreenaꞌona tookkii, no aafoochee yookkitone; bi, no Nuggishoone; ebich nowoo wotta Doono Yeerich goyinne maddemmo noone” iyeete.

¹⁹ Yaasiyoo asheenaꞌoyich ishichiye: “Doono Yeeri yaafe Nuggishoonaa qanaatechi Nuggishoona bi tunetoyich, biich maddoon hakkaachote. Ittoshi xuꞌoonaa axaaxoonon maaraachemmone.

²⁰ Doono Yeerin qayiichi bare nuggisheenaꞌoyich goyinnemmo ittoshi tunegaata, gaawe mooyon ittoshich bi tuniitoyee gubb, wochiree gonde mooyon ittoshi toommooch tuniyemmone; ittoshin aalliyemmone” iye.

²¹ Tunebaani asheenaꞌo Yaasich “Tuneyaache; Doono Yeerich goyinne maddemmo noone” iyeete.

²² Aroochee Yaasi “Illa Doono Yeerich goyinne maddeya goommii ittoshi kaacon ittoshi toommooch miixoo ittoshine” iye. Boonoshiyoo “Eeha, miixoo noone” iyeete.

²³ Yaasiyoo “Ishigaata, ittoshi daggoochee bare nuggisheenaꞌon wokkiibote; ittoshi mulloon Israꞌeelee Nuggishoo Doono Yeer waan wochibote” iye.

²⁴ Asheenaꞌo Yaasich “No, no Nuggishoo Doono Yeerich goyinne maddemmo noone; biichoo deꞌa gettemmo noone” iyeete.

²⁵ Arooba Yaasi asheenaꞌona tookkii wogoon giyiye; boonoshin yaabemmi qociyoonaa doyoonon Shekeemaa boonoshich immiye.

²⁶ Yaasiyoo ebi qaareenaꞌon Yeerichi Sheeree Macaafooch kooriye; ikke ooge xaqqoon daammii, Doono Yeerichi yaafee duukkaanee gaꞌooch beeti ooge michi baatooch neechiye.

²⁷ Arooba Yaasi asheenaꞌo bullich, “Doono Yeeri nooch gettito bullin bi waayetoyich, hini xaqqo no toommooch miixemmone. Ebich ittoshi, ittoshi Nuggishoo toommooch hukkoon ittoshi shuunegaata ittoshi toommooch miixemmone” iye.

²⁸ Aroochee Yaasi asheenaꞌon boonoshich icheti showi showooch wotte boonoshi hammemmoyich tuniihe.

Yaasinaa Elazaarina Qitii Duukko

²⁹ Ebiyee gubb, Nuuni bushoo Doono Yeeri guuno Yaasi bi shiijjeti balli aashire natona qitiye.

³⁰ Geppechi Efreemee showoo beeti, Gaashi guudoochaa dambi-waan beeti, bi hajjee showoo Timinaat Seeraaha biin duukkiyeete.

³¹ Yaasi kashoona bi beeti yemeeno bullin Israꞌeeleenaꞌo Doono Yeerich goyinnee maddeheete; wotta Yaasi qititoyee gubb, Doono Yeeri Israꞌeeleenaꞌoyich tuniito bullin ariibeeti geeneenaꞌo kashoona beeti yemeeno bullin Doono Yeerich goyinnee maddeheete.

³² Israꞌeeleenaꞌo Gibitsee boonoshi deebiti Yooseefichi shaawusho Shekeem duukkehe. Ebi bi duukketi showoo wonna Yaaqobi balle xure birewoona Shekeemi nihoo Hamoori yareenaꞌo waanee bi kemetone. Ebi showoo Yooseefi shiijjereenaꞌo woraashiti showoone.

³³ Ebiyee gubb, Harooni bushoo Elazaari qitiye. Aroo geppechi Efreemee showooch beeti, bi bushoo Finihaasich icheti Gibaahi katemooch duukkehe.