Yaasi 23 - Kafa Linguistics Project

Yaasichi Ciireexi Yibbaatoo

¹ Meeti yemeeno beshetoyee gubb, Doono Yeeri Israꞌeeleenaꞌon boonoshi guudoona beeti etteenaꞌo bulli kishoochee bi kashiitoyee gubb, Yaasi oogeton geenee baayehe.

² Yaasi Israꞌeeleenaꞌo bullin, boonoshi geeneenaꞌon, ukkireenaꞌon, nallechinaꞌonaa iraasheenaꞌo bullinon ceeggiꞌi ishichiye: “Ta, geenee baayeto taane.

³ Ittoshi Nuggishoo Doono Yeeri ittoshicha iꞌi ebi aageteenaꞌo bulli toommooch bi tuniito bullin beeggito ittoshine; ittoshi qoodoon koyeto, ittoshi Nuggishoo Doono Yeerine.

⁴ Aabi-keyo waan beeti Yoordaanoosi aacoochee tiijjiꞌi, aabi-gimo waan beeti Meditiraanee baharooch beddaahaa beeti showoon, ebiyoo batt echeti aageteenaꞌonaa ebiyee aaf ta kochaa wochiti aageteenaꞌonochi showoon, ittoshi yoodeenaꞌoyich qoodaꞌa immeto taane.

⁵ Ittoshi Nuggishoo Doono Yeeri ebi aageteenaꞌon gubb shokiyemmone; ittoshi aafoochee yoohi kichemmone; ittoshi Nuggishoo Doono Yeeri ittoshich bi gibenikkitoommon, boonoshi showoon hajjemmo ittoshine.

⁶ Ebich kupphebote; yoocha qanna getaanoon Muusichi Sheeree Macaafooch kooreeto bullin quyoonaa ceechoonoyich ittoshin ariibote!

⁷ Ittoshi daggooch echeꞌi beeti aageteenaꞌona tookki bacceyaahote; boonoshi goyinneebeeti nuggisheenaꞌochi shigoon ceeggaahote; boonoshina wogeyaahote; boonoshich goyinne maddeyaahote.

⁸ Hanaach beddaahaa ittoshi tuniitoommon, ittoshi Nuggishoo Doono Yeerin manjiiree yeshote.

⁹ “Doono Yeeri arichetinaꞌonaa giidechinaꞌona tuneti aageteenaꞌon ittoshi aafoochee yookkii kichitone; hanaach beddaahaa koniyoona ittoshin kochii wochoon hakkaanoone.

¹⁰ Ittoshi Nuggishoo Doono Yeeri ittoshich bi gibenikkiti gibenoommon, ittoshi qoodoon koyeebeeto bi tunetoyich, ittoshi daggoochee ikkoo humoon yookkemmone.

¹¹ Ebich ittoshi Nuggishoo Doono Yeerin shunniibeeto ittoshi tunoon manjiiree ariibote.

¹² “Tunebaani Yeer waanee gubb shokiꞌi, hini ittoshi daggooch echeꞌi beeti bare aageteenaꞌona tookkii ikkittinoon geddii, naacheꞌi, boonoshi maache bushiishoon ittoshi shaagigaata woyee ittoshi maache bushiishoon boonoshich ittoshi shaakkiigaata,

¹³ ittoshi Nuggishoo Doono Yeeri ebiyee bekk boonoshin ittoshi aafoochee yoohi kichaachemmo bi tunoon ebin ariibote. Ittoshi Nuggishoo Doono Yeeri ittoshich bi immiti hini gaawe showoochee ittoshi aallemmi wottoon, ittoshich shaachoonaa olloonon, ittoshi gubboon yexxiibeeti arengoon, ittoshi aafoon kochiibeeti angixon tunemminaꞌone.

¹⁴ “Ebiyoche, and qitiya beddeto taane. Ittoshi bulli, Nuggishoo Doono Yeeri ittoshich bi gibenikkiti gaawe gibeno bulliichee ikkeenolla echiyaano bi tunoon ittoshi mulloona, ittoshi kashoonoo ariibeeto ittoshine; ikkolla echeyaanoon bulliyona ittoshich ceennitone.

¹⁵ Tunebaani ittoshi Nuggishoo Doono Yeeri ittoshich bi gibenikkiti gaawe mooyo bullin bi ceechoommon, ebiyoommon ittoshi Nuggishoo Doono Yeeri ittoshich bi immiti gaawe showoochee ittoshin bi aalliimmi wottoon, bi gettiti gonde mooyo bullin ittoshi toommooch deebemmone.

¹⁶ Ittoshi Nuggishoo Doono Yeeri gettiti wogoon ittoshi shaaddegaata, hammiꞌi bare nuggisheenaꞌoyich ittoshi goyinnee maddegaata, Doono Yeeri kaaro ittoshi toommooch cufemmone; ittoshich bi immiti gaawe showoochee kaateree aallemmo ittoshine” iye.