Yaasi 2 - Kafa Linguistics Project

Yaasi Qiiddechinaꞌon Yaarika Daachiyoo

¹ Aroochee Nuuni bushoo Yaasi “Hami, Kanaanee showoon aashoona qiidote. Bulliyee beshoon Yaarikin qiidote” iꞌi, Shixiimee gutte qiiddechinaꞌon wochee daachiihe. Boonoshiyoo hammii shaggiꞌi, Rahaabi getteebeeti yahechi ure kexooch qeya giyiyeete.

² Arooba Yaariki taatoo Israꞌeeleenaꞌo daggoochee ikkikkeenaꞌo showoon qiidda aroobee xum katemooch giyitinaꞌo boonoshi tunoon waayehe.

³ Ebich Yaariki taatoo “Ne kexooch waati asheenaꞌo no showoo bullin qiidoyich waatinaꞌo boonoshi tunetoyich, maach kichibe” ii beeti wochoon Rahaabich daachiihe.

^4-6 Tunebaani Rahaabi ebi gutte asheenaꞌon daammaa kechi toommeexi xaaꞌooch muttee galloon ukiyaꞌa aachiyan. Biyoo ishichiyan: “Iberoone; asheenaꞌo ta waan waatinaꞌone. Tunetaa amoochee boonoshi waato gaata ariyaanee taane. Showoo xumetaa katemee kello hicheyaan beetaa, kechii hammitinaꞌone. Aabi waan boonoshi hammito gaata ariyaanee taane. Kaatee dabbii ittoshi hamigaata, yeshon hakkiyote. Ebich dabbibote” iyan.

⁷ Ebina taatoochi wocheyechinaꞌo qiiddechinaꞌon yeshoyich Yoordaanoosi kimooch daammiibeeti gommon yechiꞌi, dabbii hammiyeete. Ebi asheenaꞌo kechii hammimmona, bekkech katemee kello hichehe.

⁸ Qiiddechi asheenaꞌo tokketeyaan beetaa, ure boonoshi beeti kechi toommooch kechaꞌa,

⁹ boonoshich ishichiyan: “Doono Yeeri hini showoon ittoshich bi imon, oogeti shato ittoshi naboona no toommooch bi kindoon, hini showeexi asheenaꞌo bulla keqqoona muuyonoo ariiti taane.

¹⁰ Gibitsee ittoshi keyiyooba, Ceelle baharoon Doono Yeeri ittoshi aafooch aabichiꞌi bi shuuꞌiito gaata, ittoshiyoo Yoordaanoosi aachee beqachi gutte Amooree taateenaꞌo Sihooninaa Ooginon aabichiꞌi ciroona ittoshi aalliito gaata waayeto noone.

¹¹ Ebin no waayehooba, no mullo keqqoona goojjitone. Ittoshin shatoochee tiyitona keqqaani ikke asholla aalloone. Ittoshi Nuggishoo Doono Yeeri damba shimaayooch, desh showoochoo Nuggishoone.

¹² Illa ittoshich gaaweton ta tuniitoommon, ittoshiyoo ebiyoommon ta nihoochi kechi asheenaꞌoyich gaaweton ittoshi tuniyemmoyich, Doono Yeerina wogebote. Ebi wogo manjoo bi tunoon bekkiibeeti malletoon taach imbote.

¹³ Ta nihoonaa ta indeenon, ta maneenaꞌon, ebiyoommon boonoshicho tuneto bullinoo wodiibote. No bulliyoo kashoona no beeyemmoyich tuniibote” iyan.

¹⁴ Asheenaꞌo ishichiyeete: “No giyeti wogoommon no ceechoo qayigaata, Yeeri noon aalliibe. No tuniyaabeeti mooyon konichona geto ne qayigaata, Doono Yeeri hini showoon nooch bi imiyooba, gaawe mooyon neech tuniyemmo noone” iyeete.

^15-21 Boonoshichoo ishichiyan: “Ittoshin yeshoyich yichiibeeti asheenaꞌo ittoshin boonoshi daneyaachemmoyich, geppooch hambote. Asheenaꞌo wottemmi wottoon, arooch keejje qemon aashebote. Aroyee gubb ittoshi gommon hambote” iyan. Asheenaꞌo ureyich ishichiyeete: “Noon ne wogiiti wogoon quyoon no hakkemmo, hini showooch no giyiyooba, ebi ceelle woderoon noon ne kindiiti mallee kellooch ne yeenderikkigaata, ebiyoommon ne nihoonaa ne indeenon, ne anaami maneenaꞌonaa ne nihoochi kechi asheenaꞌo bullinon ne kexooch ne kici gaatane. Koniyoona ne kexoochee maach bi keyigaata, bi damoo bi toommoochiye bi tunemmo; no echeyaachemmo noone. Neenna tookkii kexooch beeto koniyoona bi tunegaata, bi toommooch shaggimmi mooyoyich bi damoo no toommooch tunemmone. Tunebaani no tuniyaabeeti mooyon konichona ne getigaata, noon ne wogiiti wogee mangoo no toommooch shagaachemmone” iyeete. Ureyoo “Ittoshi gettitoommon tunebe” iyan. Ureechi kexo katemee xaqqee uxeroona yeshiitaa shuuneeto bi tunetoyich, asheenaꞌon mallee kelloona kichaa, woderoona maach kindiihan; ebina boonoshin daachiihan. Boonoshiyoo kechii hammiyeete. Boonoshi hammitoyee gubb, are ceelle woderoon bi mallee kellooch yeenderikkiyan.

²² Boonoshiyoo kechii, geppoo beetooch hammiyeete. Boonoshin yecha qaawii hammiti asheenaꞌo gommo bulliich qaawii mucceꞌi boonoshi wottemmi wottoon, keejje qemon arooch aasheheete.

²³ Arooba ebi gutte qiiddechinaꞌo geppoochee kindii, aacon kimmii, Nuuni bushoo Yaas waan shaggiꞌi, boonoshi toommooch shaggiti mooyo bullin biich gettiyeete.

²⁴ Boonoshiyoo daakkiꞌi, “Iberoon Doono Yeeri are showoo bullin no kishooch beshiiꞌi immitone; are showooch beeti asheenaꞌo bulli noon shatoochee tiyitona, keqqoona boonoshi muuyon beeggeto noone” iyeete.