Yaasi 18 - Kafa Linguistics Project

Echeti Showoo Qoodeyoo

¹ Showoon kochii boonoshi yechitoyee gubb, Israꞌeeleenaꞌo bulli Shiloohi katemooch kiceeheete. Danee duukkaanoonoo arooch xogiyeete.

² Israꞌeeleenaꞌo daggoochee batt boonoshi qoodee showoon daneyaani shabaatte yoodeenaꞌo beetinaꞌone.

³ Ebich Yaasi Israꞌeeleenaꞌoyich ishichiye: “Ittoshi qaabbechi niheenaꞌochi Nuggishoo Doono Yeeri ittoshich immiti showoon deꞌaanoon ittoshi kote beeyemmo, aati wottooniye?

⁴ Andoo ikkikke yoodoochee keejj keejje ashoon kaacote. Showoon guudi boonoshi beeggemmonaa ikkikke yoodo dan bede qoodoon koori boonoshi deebemmonoyich, boonoshin woche daachiyemmo taane. Aroochee ta waan wotte woyemminaꞌone.

⁵ Showoonoo shabaatte beera qoodemminaꞌone. Yihudi yoodo deshi-waan, Yooseefi yoodo dambi-waan boonoshich qoodeeti boonoshi showooch kotemminaꞌone.

⁶ Shabaatte beera qoodeeti showeechon gettiibeeti mooyon kooriree taach deebote. Tawoo no Nuggishoo Doono Yeeri aafoochaa ittoshich ixoon duppemmo taane.

⁷ Tunebaani Leweenaꞌo Doono Yeerich boonoshi maddeebeeti qeeshittinee maddoo boonoshi qoodoo bi tunetoyich, ittoshi daggoochee showee qoodoon daneyaachemminaꞌone. Gaadinaa Roobeelinochi yoodeenaꞌoyich, wotta Minaasi yoodoochee qatinaꞌoyich, Doono Yeeri guuno Muusi Yoordaanoosi aacoochaa aabi-keyo waanee boonoshi qoodee showoon shiichiꞌi boonoshich immitone” iye.

⁸ Aroochee showee mooyon koorii deeboyich asheenaꞌo tiyimmona, Yaasi boonoshich, “Hami showoon guudi beegote; ebi showee mooyon kooribote; aroochee ta waan wotte wobote. Tawoo hini Shiloohaa, Doono Yeeri aafoochaa ixoon ittoshich duppemmo taane” iye.

⁹ Ebich asheenaꞌo hammiꞌi showoon guuddii beeggiyeete; katemi katemeenaꞌona tookkii shabaatti beera qoodiꞌi, yaaroona kooriyeete. Aroochee Shilooha beeti Yaas waan wottee waaheete.

¹⁰ Yaasi Shiloohaa, Doono Yeeri aafoochaa boonoshich ixoon duppiye; showoonoo boonoshi yoodi yoodoona Israꞌeeleenaꞌoyich qoodiye.

Biiniyaami Yoodoyich Ixoona Shaggiti Showoo

¹¹ Biiniyaami yoodoyich, batti batti ixoo boonoshi yari yaroona kechiye; ixoona boonoshich shaggiti showoo beeto, Yihudi yoodoonaa Yooseefi yoodoonochi showee gutte daggoochiye.

¹² Dambi-waani boonoshi daaro Yoordaanoosee tiijjiꞌi, Yaarikaa dambi-waani deshee dambooch shaggii, aabi-gimo waan beeti geppe showoona beshee Beet Aweeni barahooch neexehe.

¹³ Aroochee ebi daaro deshi-waanaa Beeteeli getteeti Luuzi katemee gaꞌooch beeti sharebe showooch kechiichii, dugilla wotteꞌi, Deshi Beet Horooni katemoochaa deshi-waan beeti guudi toommeexi Axaroot Adaari katemooch shaggiye.

¹⁴ Aroochee bi dano bare badd guuddii, Desh Beet Horooni katemee ciinooch beeti geppee aabi-gimo waanee, deshi-waan guuddii, Yihudi yoodee katemoo tuneti Qiriyaat Baꞌaal, ebiyoo Qiriyaat Yeꞌariimi getteeti katemooch neexehe. Ebi illa aabi-gimo waan beeti danoone.

¹⁵ Deshi-waani dano wotta, Qiriyaat Yeꞌariimi katemee gocoochee tiijjiꞌi, aabi-gimo waanaa Nefitoohi aachi xuupheenaꞌooch beddiye.

¹⁶ Aroochee Refayee bambee dambi-waani ciirooch beeti Hinoomi bushoo bambee ciinoona besheꞌi, guudi baatooch shaggiye; wotta aroochee tiijjiꞌi, Yebuseenaꞌochi katemee deshi-waan beeti sharebe showoona tuneꞌi, Hinoomi bambooch shaggii, En Rogeeli beddiye.

¹⁷ Wotta dambi-waan, En Shemeesh waan wotteꞌi, Adumiimi deshee dambee ciinooch beeti Geliloot shaggiye; aroochee dugilla wotteꞌi, Roobeeli bushoo Bohaanichi Xaqqooch shaggiye.

¹⁸ Daakkiꞌi Beet Arabi katemee dambi-waani sharebe showoona besheꞌi, dugilla Yoordaanoosi bambooch shaggiye.

¹⁹ Aroochee dambi-waani Beet Hogili katemoo beeti geppoona besheꞌi, deshi-waan Yoordaanoosi aaco giyiibeeti, dambi-waani Kiikki baharee gashooch neexehe; ebiyoo deshi-waani daaroone.

²⁰ Aabi-keyo waani dano Yoordaanoosine. Biiniyaami yoodo boonoshi yari yaroona boonoshi hajjee showoon tuniiꞌi boonoshi woraashiti showee dano ebine.

^21-24 Biiniyaami yoodoyich boonoshi yari yaroona icheti aaraa gutte katemeenaꞌo eboshine: Yaariki, Beet Hogili, Emeeq Qeziizi, Beet Arabi, Tsemarayimi, Beeteeli, Awiimi, Faari, Ofiri, Kefaramooni, Ofininaa Geebinane; ebi katemeenaꞌo bullichi guudoona gafeenaꞌo beetinaꞌone.

^25-28 Wotta aaraa awudde katemeenaꞌo, Gibeꞌooni, Raami, Beerooti, Mitsiphi, Kefiraahi, Mosaahi, Reqeemi, Iripeeli, Taralaahi, Tselaahi, Haꞌeleefi, Yebuseenaꞌochi katemoo Yerusaalemi, Gibaahinaa Qiriyaat Yeꞌariiminane; ebi katemeenaꞌo bullichi guudoona gafeenaꞌo beetinaꞌone. Illa, Biiniyaami yoodo boonoshi yari yaroona boonoshi woraashiti showoo, ebine.