Yaasi 17 - Kafa Linguistics Project

¹ Minaasi Yooseefichi gutenee bushoo bi tunetoyich, bi yoodoyich ixoona shaggiti qoodee showoo ebine. Minaasichi gutenee bushoo, Gilaadi nihoo, Makiri kupphe ginee anaamo bi tunetoyich, Yoordaanoosi aacoochaa aabi-keyo waan beeti Gilaadee showoonaa Bashaanee showoona shiichiꞌi biich ichetone.

² Echeti Minaasi yoodoyich, eboshiyoo Abezeeri, Heleeki, Asreeli, Shekeemi, Hefeerinaa Shemiidinoyich boonoshi yari yaroona boonoshi qoodee showoo Yoordaanoosi aacoochaa aabi-gimo waanee ixoona shaggiye. Eboshi boonoshi yari yaroona Yooseefi bushoo Minaasichi anaami shiijjereenaꞌone.

³ Minaasi bushoo Makiri, Makiri bushoo Gilaadi, Gilaadi bushoo Hefeeri, Hefeeri bushoo Tselofaadine; Tselofaadich maache bushiishoyee besh anaami bushiishoo aalloone. Ebi bi maache bushiisheenaꞌochi shigo, Mahilaahi, Noohi, Hogili, Milikinaa Tiritsinane.

⁴ Boonoshiyoo qeeshoo Elazaari, Nuuni bushoo Yaasinaa Israꞌeeleenaꞌochi ukkireenaꞌona waan waaꞌi, “No anaami maneenaꞌona tookki showoon no qoodeyemmoyich, Doono Yeeri Muusich gettitone” iyeete. Ebich Doono Yeeri gettitoommon, Yaasi boonoshi niheesheenaꞌona tookkii boonoshi qoodee showoon maacciye.

⁵ Ebina Minaasi yoodoyich aashire kishee showoo ichehe. Ebiyoo Yoordaanoosi aacoochaa aabi-keyo waan beeti Gilaadee showoonaa Bashaanee showoonoyee baroone.

⁶ Ebi tuneto, Minaasi yoodee maache bushiisheenaꞌoyich bi anaami bushiisheenaꞌona tookkii showoo ichetoyichiye. Echeti Minaasi yoodoyich Gilaadee showoo ichehe.

⁷ Minaasi yoodee showoo Aseeri yoodee showoochee tiijjiꞌi, Shekeemaa aabi-keyo waan Mikimetaati katemooch shaggii beetone. Aroochee bi showee daaro deshi-waan besheꞌi En Taphuuhee showooch beeti asheenaꞌo waan shaggii beetone.

⁸ Taphuuhee showoo Minaasi yoodoochone; tunebaani bi showee daarooch beeti Taphuuhi katemoo Efreemi yoodoochone.

⁹ Aroochee daakkiꞌi bi dano deshi-waan beeti Qaani aacooch beddii beetone. Qaani aacoochee deshi-waan beeti katemeenaꞌo Minaasi yoodee showee daggooch boonoshi tunetaanoona, Efreemi yoodee katemeenaꞌone. Minaasi yoodee showee dano Qaani aacoochaa deshi-waani goco tuneechii, Meditiraanee baharooch neexehe.

¹⁰ Deshi-waan beeto Efreemi yoodoocho bi tunemmona, dambi-waan beeto wotta Minaasi yoodoochone; Minaasi yoodee showee daaro Meditiraanee baharoone. Dambi-waan beeto Aseeri yoodoocho bi tunemmona, aabi-keyo waan beeto Yisakoori yoodoochone.

¹¹ Wotta Yisakoorichi showoonaa Aseerichi showoonochi daggooch Beet Sheꞌaani, Ibilaami, Nafooti getteeti Doori, En Doori, Tanaakinaa Megidina, boonoshi guudoona beeti gafeenaꞌona tookkii Minaasi yoodoochinaꞌone.

¹² Tunebaani Minaasi yoodo ebi katemeenaꞌon yeshon hakkaanoone. Ebich Kanaaneenaꞌo ebi showooch beeheete.

¹³ Tunebaani Israꞌeeleenaꞌo kupphehooba, Kanaaneenaꞌo boonoshich guunon tuneree maddemmoyich tuniiheetani, ciroona yoohaaneenaꞌone.

¹⁴ Yooseefi yoodo Yaasin “Doono Yeeri noon diiritoyich, haddoona meeto noone. Ebich nooch ne immeti showoo, amoyichiye ikke qoodoonaa ikke ixoona baach bi tuneto?” iye.

¹⁵ Yaasiyoo wochiꞌi, “Ittoshi haddoo ebi shaahoon meetaa, geppechi Efreemee showoo ittoshich xebbeto bi tunegaata, Ferizeenaꞌonaa Refayeenaꞌonochi showooch keyiree shaaroon (kubboon) ittoshich dafote” iye.

¹⁶ Yooseefi yoodo wochiꞌi, “Geppechi showoo nooch bedaache; ebiyeenoo wotta Beet Sheꞌaani katemoonaa bi guudoona beeti gafeenaꞌonooch, wotta Yezireeli bamboochoo beeti Kanaaneenaꞌo bullich xuuroochee shuuneeti ogooge gaari beetone” iye.

¹⁷ Yaasiyoo Yooseefi yoodo tuneti Efreemichi yareenaꞌonaa aabi-gimo waani Minaasichi yareenaꞌonoyich ishichiye: “Ittoshi haddoona meeto, oogeti giidecho ittoshi tunetoyich, ittoshi qoodoo ikkoo baach tuneyaache.

¹⁸ Ebich geppe showoo ittoshicho tunemmone; shaaroo bi tunetaanoona, ikke gocoochee bare gocooch beddaahaa dafiree ebi showoon hajjemmo ittoshine. Kanaaneenaꞌoyich xuuroochee shuuneeti ogooge gaari bi beetaanona, wotta kuppheenaꞌo boonoshi tunetaanoona, aroochee boonoshin yoohi kichemmo ittoshine” iye.