Yaasi 13 - Kafa Linguistics Project

Batt Yecheyaani Showoo

¹ Ebiyee gubb, Yaasi geenee baayehe; Doono Yeeriyoo biich ishichiye: “And illa geenaa baayeto neene; yecheya bede oogeti gamini showoo batt beetone.

² “Yecheyaanoon batt echeti showoo ebine: Filsixeemeenaꞌo showoo bulli, Geshuureenaꞌo showoo bullinaa

³ Aweenaꞌo showoonane. Gibitsaa aabi-keyo waan beeti Shihoori aacoochee tiijjiꞌi, dambi-waan beeti Eqirooni katemee daarooch beddaahaa beeti showoo bulli Kanaaneenaꞌo showoo tuniitaa haddeetone. Gaazi, Ashidoodi, Ashiqelooni, Gaatinaa Eqirooninooch beechii hajjiti uuche Filsixeemee taateenaꞌo beetinaꞌone.

⁴ Deshi-waan Kanaaneenaꞌo showoo bullinaa Sidooneenaꞌo beeti Meraahee tiijjiꞌi, Amooreenaꞌo showee daaro Afeeqi katemooch beddaahaa beeti showoo,

⁵ Gebaaleenaꞌo showoonaa Hermooni guudi baatooch beeti Baꞌaal Gaadee tiijjiꞌi, Hamaat beshe kaattooch beddaahaa beeti, aabi-keyo waan beeti Libanoosee showoo bullinane.

⁶ “Ebi showoo Libanoosee tiijjiꞌi, Misrefoot Mayimi katemooch beddaahaa beeti geppe showooch beeti, Sidooneenaꞌo bullichi showoone. Ta, ta qelloona ebi are aageteenaꞌon Israꞌeeleenaꞌo aafoochee yoohi kichemmo taane. Ne baach, neech ta gettetoommon, showoon qoodiree Israꞌeeleenaꞌoyich maace.

⁷ Ebinoo yiixiye Israꞌeelee yoodoonaa Minaasi yoodoochee qatinaꞌonoyich qoodiree maace” iye.

Aabi-keyo Waani Showoo Qoodeyoo

⁸ Ebiyee aaf Roobeelinaa Gaadinochi yoodeenaꞌo, ebiyoommon wotta Minaasi yoodoochee qatinaꞌo Doono Yeeri guuno Muusi boonoshich maacciti, boonoshi qoodee showoon woraashitinaꞌone. Ebi showoo beeto, Yoordaanoosi aacoochaa aabi-keyo waaniye.

⁹ Boonoshi woraashiti showoo, Arinooni bambee gocooch beeti Aroꞌeeri katemoonaa bambee daggooch beeti katemoonoochee tiijjiꞌi, Diibooni katemooch beddaahaa beeti Medeebi geppeexi naqqe showoo bulliniye.

¹⁰ Ebiyoommon wotta Heshiboni beechii qeejjiti, Amooneenaꞌo showee daarooch beddaahaa hajjiti, Amooreenaꞌo taatoo Sihoonichi katemeenaꞌo bulliniye.

¹¹ Wotta Gilaadee showoo, Geshuureenaꞌo showoonaa Maꞌakeenaꞌo showoona, Hermooni guudo bullinaa Saleeki katemooch beddaahaa beeti Bashaanee showoo bullinoniye.

¹² Ashitarooti katemoonaa Edireyi katemoonooch tuneꞌi hajjiti Oogi taateti Bashaanee showoo bulliniye. Oogi Refayeenaꞌoochee curo tuneꞌi echeti asheenaꞌo daggoochee ikkoone. Eboshinoo Muusi kochii wochiꞌi, boonoshi showoochee yookkitone.

¹³ Tunebaani Israꞌeeleenaꞌo Geshuureenaꞌonaa Maꞌakeenaꞌonon boonoshi showoochee yookkii aalliyaaneenaꞌo boonoshi tunetoyich, hanaach beddaahaa Israꞌeeleenaꞌo daggooch beetinaꞌone.

¹⁴ Muusi Lewi yoodoyich iristoon imaanoone. Doono Yeeri Muusich bi gettitoommon, boonoshi iristo Israꞌeelee Nuggishoo Doono Yeerich michaa giddeebeeti deejjoone.

¹⁵ Muusi Roobeeli yoodoyich boonoshi yari yaroona boonoshi qoodee showoon qoodiꞌi, maacciye.

¹⁶ Boonoshi showoo, Arinooni bambee gocooch beeti Aroꞌeeri katemoonaa bambee daggooch beeti katemoonoochee tiijjiꞌi beeti showoo tunemmona, Medeebi katemee guudooch beeti geppeexi naqqe showoo bulline.

¹⁷ Wotta Heshiboni katemoonaa geppeexi naqqe showooch beeti katemeenaꞌo bullina, eboshiyoo Diibooni, Baamoot Baꞌaali, Beet Baꞌaal Meꞌooni,

¹⁸ Yahaatsi, Qedemooti, Mefaati,

¹⁹ Qiriyatayimi, Sibimi, bambee daggooch beeti geppooch beeti Tseret Shahaari,

²⁰ Beet Feꞌoori, Fisigi guudeexi sharebe showoonaa Beet Yeshimootinane.

²¹ Eboshiyoo geppeexi naqqe showooch beeti katemeenaꞌo bullinaa Heshibon beechii qeejjiti, Amooreenaꞌo taatoo Sihoonichi taatee showoo bullinane. Muusi taatoo Sihooninaa Miidiyamee iraasheenaꞌo Eewi, Reqeemi, Tsuuri, Huurinaa Reebinon kochii wochitone. Eboshi bulli taatoo Sihooniyee desh tuneꞌi showoon qeejjiibee echetinaꞌone.

²² Israꞌeeleenaꞌo goraadoona wuxitinaꞌo daggoochee Beꞌoori bushoo, kaayechi Balaami ikkoone.

²³ Roobeeli yoodee showee daaro Yoordaanoosine. Roobeeli yoodo boonoshi yari yaroona maacheti showoo, are showooch beeti katemeenaꞌonaa boonoshi guudoona beeti gafeenaꞌona eboshine.

²⁴ Wotta Muusi Gaadi yoodoyich, boonoshi yari yaroona boonoshi qoodee showoon qoodiꞌi, maacciye.

²⁵ Boonoshi showoo, Yazeeri katemoonaa Gilaadee showooch beeti katemeenaꞌo bullina, Raabi katemoochaa aabi-keyo waan beeti, Aroꞌeeri katemooch beddaahaa beeti Amooneenaꞌo showee qato,

²⁶ Heshibonee tiijjiꞌi, Ramaat Mitsiphinaa Betoniiminooch beddaahaa beeti showoonaa Mahanayimee tiijjiꞌi Debiiree showee daarooch beddaahaa beeti showoonane.

²⁷ Wotta Heshiboni katemoochaa taateti, Amooreenaꞌo taatoo Sihooni hajjiti showoon, ebiyoo Yoordaanoosi bambee daggooch beeti, Beet Haraami, Beet Nimiraahi, Sukootinaa Tsafooninane. Aabi-gimo waani boonoshi showee daaro Kinerootee baharooch beddaahaa beeti Yoordaanoosine.

²⁸ Gaadi yoodo boonoshi yari yaroona boonoshi maacheti showoo, are showooch beeti katemeenaꞌonaa ebi katemeenaꞌochi guudoona beeti gafeenaꞌona eboshine.

²⁹ Muusi Minaasi yoodoochee qatinaꞌoyich, boonoshi yari yaroona boonoshi qoodee showoon qoodiꞌi, maacciye.

³⁰ Boonoshi showoo, Mahanayimi katemoochee tiijjiꞌi, Bashaanee showoo bullin, ebiyoo Bashaanee taatoo Oogichi showoo bullinaa Bashaanee showooch beeti, Yaꞌiiri kochii yechiti shiche katemeenaꞌo bullinane.

³¹ Wotta Gilaadee showee qato, Bashaanee taatoo Oogichi beeyi katemeenaꞌo tuneti, Ashitarootinaa Edireyinane. Eboshin Minaasi bushoo Makiri shiijjereenaꞌoochee qatinaꞌo boonoshi yari yaroona qoodeetinaꞌone.

³² Muusi Moꞌabee showeexi bakkooch beechii bi qooditi, Yaarikaa aabi-keyo waan, Yoordaanoosi aachee beqach beeti showoo ebine.

³³ Tunebaani Lewi yoodoyich Muusi iristoon imaanoone. Doono Yeeri boonoshich bi gettitoommon, Leweenaꞌochi iristo Israꞌeelee Nuggishoo Doono Yeerine.