Yaasi 11 - Kafa Linguistics Project

Yaasi Dambi-waan Beeti Taateenaꞌon Kochii Wochoo

¹ Hatsoori taatoo Yabiini Israꞌeeleenaꞌo ebi showoo bullin kochii aalliyoon bi waayehooba, Madooni taatoo Yobaab waan, Shimirooni taatoonaa Akishaafi taatoona waan wochoon daachiihe.

² Ebiyoommon wotta dambi-waan beeti geppe showooch, Kinerootee baharoochee deshi-waan beeti Yoordaanoosi bambooch, worebe showoonaa aabi-gimo waan Doori katemee gaꞌooch beeti baharee gasheexi showoonooch beeti taateenaꞌo waan wochoon daachiihe.

³ Wotta aabi-keyo waaninaa aabi-gimo waanina beeti Kanaaneenaꞌo waan, Amooreenaꞌo waan, Hiteenaꞌo waan, Ferizeenaꞌo waan, geppe showooch beeti Yebuseenaꞌo waan, ebiyoommon wotta Hermooni guudi baatooch, Mitsiphee showooch beeti Hiweenaꞌo waan wochoon daachiihe.

⁴ Eboshiyoo, boonoshi ginechinaꞌo bullina tookkii haddoona meeti haresheenaꞌonaa gaarinaꞌonon yechiꞌi kechiyeete. Boonoshi ginechinaꞌo, haddaa ciyaani baharee gasheexi qacoomminaꞌone.

⁵ Ebi taateenaꞌo bulli Israꞌeeleenaꞌon kocha boonoshi ginee naayinaꞌon ikkochiꞌi waaheete. Meroomi aachi gashooch boonoshi kaamboon geddiyeete.

⁶ Doono Yeeri Yaasin “Boonoshin shattaahine; eboshi bullin wuxemmo taane; yaach ebi goora Israꞌeeleenaꞌo kishooch beshiiree immemmo taane. Aroyee gubb boonoshi haresheenaꞌo tingoon qeccemmo neene; boonoshi gaarinaꞌonoo qaaqqoona michemmo neene” iye.

⁷ Ebich Yaasinaa bi ginechinaꞌo bullina Meroomi aacooch waa, boonoshi waan diqqoona shaggiꞌi kochiyeete.

⁸ Doono Yeeriyoo boonoshin Israꞌeeleenaꞌo kishooch beshiiꞌi immiye. Boonoshiyoo ooge katemoo Sidooninaa Misrefoot Mayimi katemoonooch beddaahaa, wotta aabi-keyo waan beeti Mitsiphi bambooch beddaahaa wuxiibee yookkiyeete. Boonoshi daggoochee kashoona echeto ikkolla aalloone.

⁹ Doono Yeeri biich bi gettitoommon, Yaasi boonoshi haresheenaꞌo tingoon qeccehe; boonoshi gaarinaꞌonoo qaaqqoona michiye.

¹⁰ Arooba Hatsoori taatoo ebi taateenaꞌo bullin hajjiibeeti taatoone. Ebich Yaasi gubb wottee hammiꞌi Hatsoorin kochii yechiye; bi taatoonoo goraadoona wuxiye.

¹¹ Ebi Hatsoori katemee daggooch beeto bullin goraadoona ciroona wuxii aalliiheete; kashoona echeto ikkolla aalloone. Hatsoori katemoonoo qaaqqoona michiye.

¹² Yaasi ebi katemeenaꞌo bullinaa boonoshi taateenaꞌo bullinon kochii yechiye; Doono Yeeri guuno Muusi biich bi gettitoommon, goraadoona boonoshin ciroona wuxii aalliihe.

¹³ Tunebaani Yaasi michiti Hatsooriyee besh, Israꞌeeleenaꞌo aroyee aaf happeechii, wochinnoon uxereeti katemeenaꞌon michaaneenaꞌone.

¹⁴ Israꞌeeleenaꞌo ebi katemeenaꞌoochee daneti keco bullinaa gijjeenaꞌonon boonoshi qellich tuniiheete; tunebaani asheenaꞌo bullin goraadoona wuxii aalliiheete; kashoona echeto ikkolla aalloone.

¹⁵ Ebiyee aaf Doono Yeeri bi guuno Muusich bi gettiton, Muusi Yaasich gettitone. Yaasiyoo ebi getoon ceechiye. Doono Yeeri Muusich gettito bulliichee Yaasi tuniyaani ikke mooyolla aalloone.

Yaasi Kochii Yechiti Showeenaꞌo

¹⁶ Yaasi showoo bullin kochii yechiye; ebiyoo geppe showoonaa geppee baatooch beeti showoo bullinon, Negeebi barahoo bullin, Gooshenee showoo bullin, aabi-gimo waani woreboonaa Yoordaanoosi bamboonon kochii yechiye.

¹⁷ Ebiyoommon Seyiree showee gaꞌooch beeti Halaaqi guudoochee tiijjiꞌi, Hermooni guudi baatooch beeti Libanoosi bambooch beeti Baꞌaal Gaad beddaahaa beeti showoo bullin kochii yechiye. Boonoshi taateenaꞌo bullin yechiye; eboshinoo qeccee wuxiye.

¹⁸ Yaasi ebi taateenaꞌona tookkii meeti naton koyetone.

¹⁹ Gibeꞌoon beeti Hiweenaꞌoyee besh, Israꞌeeleenaꞌona tookkii wogoon giyiti, bare ikke katemoona aalloone; bullin boonoshi yechito, ginoonane.

²⁰ Doono Yeeri Muusich bi gettitoommon, Israꞌeeleenaꞌona koyeree, ikke ariqqaalloon ciroona wuxaa boonoshi aallemmoyich, ebi katemeenaꞌooch beeti asheenaꞌo mulloon muumiito, Doono Yeerine.

²¹ Arooba wotta Yaasi geppe showoo, ebiyoo Kebiroon, Debiirinaa Anaabinooch, ebiyoommon Yihudee showeexi geppe showoonaa Israꞌeelee showeexi geppe showoo bullinooch beeti Anaaqeenaꞌon wuxii aalliihe; boonoshi katemoo bullinoo ciroona aalliihe.

²² Eboshiichee giishecheenaꞌo baach Gaaza, Gaatinaa Ashidoodinooch echeteetani, Israꞌeelee showee daggooch Anaaqee yareenaꞌoochee ikkolla echeyaanoone.

²³ Ebina Doono Yeeri Muusich gettitoommon, Yaasi showoo bullin kochii yechiye; boonoshi yoodi yoodee haddoona qoodiꞌi, Israꞌeeleenaꞌoyich maacciye. Aroochee showoo ginoochee kashehe.