Yaasi 10 - Kafa Linguistics Project

Aabee Aafe Neexo

¹ Yaasi Yaarikinaa bi taatoonochi toommooch bi tuniitoommon, Aayin yechiꞌi ciroona bi aalliyoon Yerusaalemi taatoo Adon Tsedeeqi waayehe. Wotta Gibeꞌooni asheenaꞌo Israꞌeeleenaꞌona tookkii wogoon boonoshi gimonaa Israꞌeeleenaꞌo daggooch boonoshi beemonon waayehe.

² Ebina biinnaa bi asheenaꞌona oogichiꞌi shattiyeete. Ebiyoo Gibeꞌooni, taatee katemoo bullichoommon ooge katemoo, Aayiyee beshe katemoo, wotta bi asheenaꞌoo ginee anaaminaꞌo boonoshi tunetoyichiye.

³ Ebich Yerusaalemi taatoo Adon Tsedeeqi Kebirooni taatoo Hohaam waan, Yarimuuti taatoo Firaam waan, Lakishi taatoo Yafiyinaa Egilooni taatoo Debiirina waan ishichiibeeti wochoon daachiihe:

⁴ “Gibeꞌooni asheenaꞌo Yaasinaa Israꞌeeleenaꞌona tookkii shunee wogoon boonoshi giyitoyich, ta waan waaree taan ittoshi gaachetaa boonoshin koyona” iye.

⁵ Arooba uuche Amooree taateenaꞌo, boonoshiyoo Yerusaalemi taatoo, Kebirooni taatoo, Yarimuuti taatoo, Lakishi taatoonaa Egilooni taatoona ikkottee boonoshi ginechinaꞌo bullin kiciꞌi, Gibeꞌoonin giichii kochiyeete.

⁶ Gibeꞌooni asheenaꞌo, “Geppechi showooch beeti Amooree taateenaꞌo bulli boonoshi ginee naayinaꞌon ikkochiꞌi no toommooch waatinaꞌone. Ne guuno noon duppaahine. Noon gaachebe. Kaate waaree noon wodiibe” iꞌi Galigala beeti Israꞌeeleenaꞌo kaambooch, Yaas waan wochoon daachiiheete.

⁷ Ebich Yaasinaa bi ginechinaꞌo bullina ginee anaaminaꞌo bullina tookkii, Galigalee kechiyeete.

⁸ Arooba Doono Yeeri Yaasich “Boonoshin shattaahine; boonoshi bullin ne kishooch beshii immeto taane; boonoshi daggoochee neenna koyeree neen wochemmo ikkolla aalloone” iye.

⁹ Yaasinaa bi ginechinaꞌona Galigalee tiyii, xumo bullin qaxiriibee qeyiꞌi, Amooreenaꞌo beetooch shaggii diqqoona kochiyeete.

¹⁰ Doono Yeeriyoo Amooree ginechinaꞌon Israꞌeeleenaꞌo aafoochee betiihe. Israꞌeeleenaꞌo Gibeꞌoonaa boonoshin wuxii ciichiyeete. Beet Horooni katemooch daammiibeeti, geppechi gommi deshee damboon yookkii dabbiyeete. Azeqinaa Maqidinooch beddaahaa, boonoshin yookkii dabbii wuxiyeete.

¹¹ Israꞌeeleenaꞌo aafoochee boonoshi wocee beetaa, Beet Horooni katemoochee Azeqi dugillooch daammiibeeti, geppechi gommoochaa Doono Yeeri xaqqoommi giidechi baderoon shimaayoochee boonoshi toommooch kindiihe; boonoshiyoo qitiyeete. Israꞌeeleenaꞌo goraadoona wuxitinaꞌoyee baderoo wuxitinaꞌo besheenaꞌone.

¹² Doono Yeeri Amooreenaꞌon Israꞌeeleenaꞌo kishooch beshiiꞌi bi immiti aabooba, Yaasi Doono Yeerich Israꞌeeleenaꞌo aafoochaa ishichiye: “Aabeene, shuuraanoon Gibeꞌooni katemee toommooch neexebe; ageneene, Ayalooni bambee toommooch neexebe” iye.

¹³ Ebich Israꞌeelee aagetoo boonoshi etteenaꞌo toommooch nichoon kichimmi wottoon, aabe shuuraanoon bi beetooch neexahan; ageneyoo shuuraanoon bi beetooch yagiyan. Ebi mooyo Yashaari Macaafooch kooreetone. Aabe shuuraanoon shimaayooch neexaa, ikke heeyon giyaanoon heechahan.

¹⁴ Doono Yeeri ashi getoon bi waayeti, ebiyoommi aabo, aroyee aaf tuneba aroyee gubb, ciroona aalloone. Doono Yeeri Israꞌeeleenaꞌo qoodoon koyehe.

¹⁵ Aroochee Yaasinaa Israꞌeelee ginee naayinaꞌo bullina Galigala beeti boonoshi kaambooch wotteheete.

Uuche Amooree Taateenaꞌo Qitoo

¹⁶ Ebiyooba ebi uuche Amooree taateenaꞌo muriccii waaꞌi, Maqidi katemee gaꞌooch beeti xaqqee gofooch aashetinaꞌone.

¹⁷ Uuche taateenaꞌo ebi xaqqee gofooch aasheꞌi beemon Yaasi waayehe.

¹⁸ Ebich Yaasi ishichiye: “Gofee kellooch ogooge xaqqeenaꞌon gederikki hicote; quyechi asheenaꞌonoo arooch neechibote.

¹⁹ Tunebaani ittoshi arooch yagiyaahote. Ittoshi etteenaꞌon yichi dabbiree wuxi aalliibote; boonoshi katemooch boonoshi giyaachemmoyich bayote. Ittoshi Nuggishoo Doono Yeeri boonoshin ittoshi kishooch beshii immitone” iye.

²⁰ Ebich Yaasinaa Israꞌeelee ginechinaꞌona boonoshi etteenaꞌo hidaa aallemmi wottoon, wuxii ciichiyeete; tunebaani giishecheenaꞌo mishigechi boonoshi katemeenaꞌooch gimon hakkitinaꞌone.

²¹ Aroochee ginechinaꞌo bulli diggoona wotteꞌi Yaasi beeti, Maqidi gaꞌooch beeti Israꞌeeleenaꞌo kaambooch waaheete. Are showooch beeti asheenaꞌoochee Israꞌeeleenaꞌo toommooch noonoon wochiti ikke asholla aalloone.

²² Yaasiyoo “Gofee kelloon qechiree, ebi uuche taateenaꞌon kichi taach deebote” iye.

²³ Ebi uuche taateenaꞌon, eboshiyoo Yerusaalemi taatoon, Kebirooni taatoon, Yarimuuti taatoon, Lakishi taatoonaa Egilooni taatoonon kichii deebiyeete.

²⁴ Ebi taateenaꞌon boonoshi kichii deebimmona, Yaasi Israꞌeeleenaꞌo bullin bi waan ceeggiꞌi, ginooch biinna tookkii hammiti ginee iraasheenaꞌon “Hach aaf gidderee, ebi taateenaꞌo qettooch neexote” iye. Boonoshiyoo aaf giddeꞌi, boonoshi baatoona ebi taateenaꞌo qettooch neexxiyeete.

²⁵ Yaasiyoo boonoshich ishichiye: “Shattaahote; keqqiyaahote; kupphe manjibote. Ittoshi kochemmi etteenaꞌo bulli toommooch Doono Yeeri ebiyoommon tuniyemmone” iye.

²⁶ Aroochee Yaasi ebi uuche taateenaꞌon wuxiꞌi, uuche mixooch yooddiye. Xumemmi wottoon, boonoshi dubeno aroochee kindaanoone.

²⁷ Aabe giya iyaa, Yaasi ebi taateenaꞌo dubenoon mixoochee kindiiree, aaf boonoshi aasheti gofooch daami boonoshi duppemmoyich bi getaa, daammii duppiyeete. Gofee kelloonoo ogooge xaqqeenaꞌona keppheheete. Ebi xaqqeenaꞌo hanaach beddaahaa arooch beetinaꞌone.

Amooreenaꞌochi Bare Katemeenaꞌon Yaasi Kochii Yesho

²⁸ Ebi arooba Yaasi Maqidin yechiye. Are katemeexi asheenaꞌonaa bi taatoonon goraadoona wuxiye. Ikke ashoonolla echiyaanoon katemee daggooch beeto bullin hidii aalliihe. Yaariki taatoo toommooch bi tuniitoommon, ebiyoommon hini are Maqidi taatoo toommooch tuniihe.

²⁹ Aroochee Yaasinaa biinna tookkii beeti Israꞌeelee ginechinaꞌo bullina Maqidee Libina besheꞌi kochiyeete.

³⁰ Doono Yeeri ebi katemoonaa bi taatoonon wotta Israꞌeeleenaꞌo kishooch beshiiꞌi immiye. Yaasi are katemee daggooch beeti asheenaꞌo bullin goraadoona wuxii aalliihe. Ikke ashoonolla echiyaanoone. Yaariki taatoo toommooch bi tuniitoommon, ebiyoommon hini are Libini taatoo toommooch tuniihe.

³¹ Aroochee Yaasinaa biinna tookkii beeti Israꞌeelee ginechinaꞌo bullina Libinee Lakish besheꞌi, giichii kochiyeete.

³² Doono Yeeriyoo Lakishin Israꞌeeleenaꞌo kishooch beshiiꞌi immiye. Yaasi guttinnee qemooba ebi katemoon yechiye. Libini toommooch bi tuniitoommon, ebiyoommon hini are Lakish beeto bullin goraadoona wuxii aalliihe.

³³ Ebiyooba Gezeeri taatoo Horaami Lakish beetinaꞌon gaacheya waahe. Tunebaani Yaasi ikkoonolla echiyaanoon taatoonaa bi ginechinaꞌonon wuxii ciichiye.

³⁴ Aroochee Yaasinaa biinna tookkii beeti Israꞌeelee ginechinaꞌo bullina Lakishee Egiloon besheꞌi, giichii kochiyeete.

³⁵ Ebi arooba katemoon yechiyeete; are katemeexi asheenaꞌo bullinoo goraadoona wuxiyeete. Yaasi, Lakishi toommooch bi tuniitoommon, ebiyoommon hini are katemoonaa bi daggooch beeto bullinon ciroona wuxii aalliihe.

³⁶ Aroochee Yaasinaa biinna tookkii beeti Israꞌeelee ginechinaꞌo bullina Egiloonee Kebiroon besheꞌi kochiyeete;

³⁷ katemoon yechiyeete; bi taatoon, are katemoonaa bi guudeexi gafeenaꞌonooch beeti asho bullin goraadoona wuxiyeete. Yaasi, Egilooni toommooch bi tuniitoommon, ikke ashoonolla echiyaanoon, hini are katemoonaa bi daggooch beeto bullinon ciroona aalliihe.

³⁸ Aroochee Yaasinaa biinna tookkii beeti Israꞌeelee ginechinaꞌo bullina gubb wotteꞌi Debiirin kochiyeete.

³⁹ Katemoon, bi taatoonaa bi guudeexi, gishiishi katemeenaꞌonon kochii yechiyeete; are katemeenaꞌooch beeto bullin goraadoona wuxii ciroona aalliiheete; ikke ashoonolla echiyaaneenaꞌone. Yaasi, Kebirooni toommooch, Libininaa bi taatoonochi toommooch bi tuniitoommon, ebiyoommon hini are Debiirinaa bi taatoonochi toommooch tuniihe.

⁴⁰ Ebiyoommi gommona Yaasi showoo bullin kochiꞌi yechiye; geppe showooch, Negeebi barahooch, worebe showoonaa geppee gaadoonooch beeti taateenaꞌo bullin kochiꞌi, Israꞌeelee Nuggishoo Doono Yeeri gettitoommon, bullin ciroona hidii wuxii aalliihe; ikke ashoonolla echiyaanoone.

⁴¹ Yaasi Qadeesh Barinee Gaaza beddaahaa, ebiyoommon Gibeꞌoon beddaahaa Gooshenee showoo bullin kochiꞌi bullehe.

⁴² Israꞌeeleenaꞌo Nuggishoo Doono Yeeri Israꞌeeleenaꞌo qoodoon koyeto bi tunetoyich, Yaasi ebi taateenaꞌo bullinaa boonoshi hajjiibeeti showoonon ikkinnee hamona kochii yechiye.

⁴³ Ebiyee gubb, Yaasi Israꞌeelee ginechinaꞌo bullina tookkii Galigala beeti, kaambooch wottehe.