Yaasi 1 - Kafa Linguistics Project

Yaasich Doono Yeeri Gettiti Geto

¹ Doono Yeeri guuno Muusi qititoyee gubb, Muusich gaachoo tuneti, Nuuni bushoo Yaasich Doono Yeeri ishichiye:

² “Ta guuno Muusi qititone. Illa and neennaa hini asheenaꞌo bullina tibote; Israꞌeeleenaꞌoyich ta immemmi showooch gimoyich Yoordaanoosin kimbote.

³ Muusich ta gibenikkitoommon, ittoshi baatoo neexximmi showoo bullin ittoshich immeto taane.

⁴ Ittoshi showee daaro, deshi-waan beeti barahoochee tiijjiree, dambi-waan beeti Libanoosi guudinaꞌooch beddemmone; aabi-keyoochaa ooge aaco Efiraaxisee tiijjiree, Hiteenaꞌo showoon gedi, aabi-gimo waan beeti Meditiraanee baharooch beddemmone.

⁵ Kashoona ne beemmi yemeeno bullin koniyoona neen koyi wochemmo aalloone. Muusina tookkii ta tunetoommon, neenna tookki tunemmo taane. Neen dufaachemmo taane; neen qayaachemmo taane.

⁶ “Kupphebe, maac kuxo tunebe. Boonoshi qaabbechinaꞌoyich imma ta wogeti showoon hini asheenaꞌo woraashemmoyich tuniyemmo neene.

⁷ Ne baach kupphebe, maac kuxoonoo tunebe; ta guuno Muusi neech immiti sheeroo bullin manjii quyeree ceechibe. Ne hammemmo bulliich neech bi kaamemmoyich, are sheeroochee qanna yoocha gettaahine.

⁸ Hini Sheeree Macaafo ne noonoochee baraaye. Bi daggooch kooreeto bullin manjiiree ne ceechemmoyich, areddoonaa xumoonon shalligibee shemmebe. Ebin ne tuniigaata, bulli mooyo neech mashaami kaamemmone.

⁹ Ne Nuggishoo Doono Yeeri ta, ne hammaabeeti xaaꞌoo bulliich neenna tookkaa taane. Ebich ‘Kupphebe; maac kuxo tunebe’ iyaꞌa neech ta getteton shalligibe. Ciroona shattaahine; kirikiichiyaahine” iye.

Yaasi Asheenaꞌoyich Gettiti Geto

¹⁰ Aroochee Yaasi asheenaꞌochi ukkireenaꞌoyich ishichiꞌi gettiye:

¹¹ “Kaambee daggoona beshebote. Asheenaꞌoyich ‘Ittoshi Nuggishoo Doono Yeeri ittoshich immemmi showooch giyiree beemoyich, keejje qemoyee gubb Yoordaanoosin kimmemmo ittoshine. Ebich ittoshi shohoon qanniibote’ getote” iye.

¹² Yaasi Roobeelinaa Gaadinochi yoodeenaꞌonaa Minaasi yoodoochee qatinaꞌonoyich ishichiye:

¹³ “Doono Yeeri guuno Muusi ‘Ittoshi Nuggishoo Doono Yeeri ittoshin kashiyemmone; hini showoonoo ittoshich immemmone’ iꞌi bi gettiton gabibote.

¹⁴ Ittoshi mecheenaꞌonaa ittoshi bushiisheenaꞌona, ebiyoommon ittoshi gijjeenaꞌoo, Muusi ittoshich immiti, Yoordaanoosi aacoochaa aabi-keyo waan beeti, hini showooch beebeete. Tunebaani koyoyich bedditi, ginee anaamo tuneti ittoshi bulli, cuye qanniree ittoshi maneenaꞌon ittoshi gaachemmoyich, boonoshiyee shiichi kimbote.

¹⁵ Boonoshin ittoshi gaachemmo, ittoshi Nuggishoo Doono Yeeri ittoshich bi tuniitoommon, boonoshin bi kashiimmi wottoonaa ittoshi Nuggishoo Doono Yeeri boonoshich immimmi showoon boonoshi woraashimmi wottoononiye. Ebiyee gubb wotteree, Doono Yeeri guuno Muusi ittoshich immiti, Yoordaanoosi aacoochaa aabi-keyo waan beeti, hini ittoshi hajjiti showooch kotemmo ittoshine” iye.

¹⁶ Boonoshiyoo Yaasich wochiꞌi, “Nooch ne getteto bullin tuniyemmo noone; ne wochemmo bulliich hammemmo noone;

¹⁷ bulli mooyona Muusich deꞌa no getoommon, neechoo deꞌa gettemmo noone. Ne Nuggishoo Doono Yeeri baach Muusina tookkii bi tunoommon, neenna tookki tunebe.

¹⁸ Ne geto bullin qajjimmo, ne getaa waayeyaano bulli qitibe. Ne baach kupphebe; maac kuxoonoo tunebe” iyeete.