Yaaqobi 5 - Kafa Linguistics Project

Gaannechinaꞌo Ittibateyoo

¹ Wotta hini gaannechinaꞌote! Ittoshi toommooch shaggemmi xuuxoyich “Woowo!” getibee eefote.

² Ittoshi gaanno oqqii duubetone; ittoshi tahoon pilo maatone.

³ Ittoshi aachoonaa birewoona osheretone; ebi oshero ittoshi toommooch miixoo tunemmone; ittoshi meenonoo qaaqqoochoommon michemmone. Hini ciireexi aabooch gaannoon gutito ittoshine.

⁴ Ittoshi maayoon qecciti shuunechinaꞌochi shumaayoon bajjii boggito ittoshine. Ittoshi toommooch boonoshi cookii beeton eke elebote. Ebi ittoshi maayoon qeccii beetinaꞌochi qaaroon Beshe Mawe Doono Yeeri waayetone.

⁵ Showee toommooch mashaamiti beemonaa emiroona beemoyich ittoshi qaatoon ceechito ittoshine. Gubb bi bashemmi maaꞌoon asho aangiyoommon, ebiyoommon ittoshi ashittinoon aangiito ittoshine.

⁶ Cadiqo tuneti ashi toommooch nalliꞌi biin wuxito ittoshine; biyoo cikkii qajjiye.

Ciireexi Ciico

⁷ Illa ta maneenaꞌote! Doono Yesuusi waammi wottoon haaꞌiibote. Eke goyechon ciinote; biyoo qaabbe amiyonaa gubbi amiyona dihimmi wottoon haaꞌiibee showoochee daneebeeti, aaxxoo tuneti maayi aafoon quyee beetone.

⁸ Ittoshiyoo wotta haaꞌiibote; Doono Yesuusi woyemmi aabo katinnito bi tunetoyich kupphebote.

⁹ Ta maneenaꞌote! Yeeri ittoshi toommooch bi nallaachemmoyich, ittoshinaa ittoshina guruuxiyaahote. Ebiyoche, nallecho kelletooch katinniꞌi neexetone.

¹⁰ Ta maneenaꞌote! Doono Yeerichi wochoon gettiti keemechinaꞌon shalligibote. Boonoshiyoo xuuxoon haaꞌiyoona nooch shaahiyoon tunetinaꞌone.

¹¹ Haaꞌiyoona manjitinaꞌon diireetinaꞌone ii beeto noone. Iyoobichi haaꞌiyoon waayeto ittoshine; wotta ciiroochaa Doono Yeeri biich tuniiton beeggito ittoshine; Doono Yeeri oogeti deꞌoonaa ariqqechonane.

¹² Ta maneenaꞌote! Bulliyee beshoon ebin gabibote: Shimaayoona tuneba showoona, amee mooyonolla wogeyaahote. Yeeri ittoshi toommooch bi nallaachemmoyich, ittoshi yibbaatoo eeha geto bi tunegaata, eeha baach getote. Toonoone geto bi tunegaata, toonoone baach getote.

¹³ Ittoshi daggoochee koniyoona iritoo bi toommooch shaggito bi beegaata, corootibe. Emiriibeeto koniyoona bi beegaata, galletee shoddoon shoddebe.

¹⁴ Ittoshi daggoochee koniyoona biiyeto bi beegaata, kittinnee guuphon yaabiibeeti geeneenaꞌon bi waan ceege; boonoshiyoo Doono Yesuusichi shigoona zayitoon huutiree corootibeete.

¹⁵ Ebiyoommi mullee tooꞌiyoona giddeti corooto biiyeton wodiyemmone; Doono Yeeriyoo bi biiyoochee biin wodiyemmone; axaaxoon shuuneto bi tunegaatoo, biin maaremmone.

¹⁶ Ebich ittoshinaa ittoshina ittoshi axaaxoon aannibote; ittoshi biiyoochee ittoshi wodemmoyich ikkoo baroyich corootibe; cadiqe ashi corooto giidechi shuunoon shuunee beetone.

¹⁷ Eliyaasi noonoommi ashoone; amiyo dihaachemmoyich kupphiiꞌi corootiye; ebich Israꞌeelee showooch keejje nattaa shiritte agenoon amiyo dihaanoone.

¹⁸ Wochinnoon bi corootaa, shimaayoochee amiyo dihiye; showeyoo maayoon immahane.

¹⁹ Ta maneenaꞌote! Ittoshi daggoochee koniyoona iberee gommoochee bi muricaa, ikkoo biin bi wochigaata,

²⁰ axaaxechon muriccii bi hammiti gommoochee wochiibeeto, bi kashoon qitoochee wodiibeeto bi tunoon, wotta bi shuuneti wodde axaaxoyich maaroon bi daniyoon ariibe.