Yaaqobi 4 - Kafa Linguistics Project

Yeerich Hajjeyoo

¹ Ittoshi daggooch hayoonaa kaaroona amoochee waahe? Ittoshi ashittinee daggooch koyeebeeti, hini showeexi beemi gaawoon ittoshi qaatiibeeti qaatoochee waato toone?

² Qaatiyote; ittoshich tuneyaache; ebich ashoon wuxiibeeto ittoshine. Kupphiinoo qanaatehote; ittoshi qaatiton danoon hakkaachote; ebich kaarehote; hayeenoo iyote. Yeerin qolloon ittoshi qajjitoyich, ittoshich tuneyaache.

³ Ittoshi qaatiibeeti mooyon Yeeri ittoshich bi immemmoyich qollehote; tunebaani ittoshi qaatoon ceechoyicha iꞌi gonde gaboona ittoshi qollee beetoyich, bi waanee daneyaachote.

⁴ Yeerich gibeneyaaneenaꞌote! Hini alemoon shuno Yeerin shixo bi tunoon ariyaachote? Illa alemoon shuno Yeerina shixecho tunoone.

⁵ Yaafe Macaafoochaa “Yeeri no mullooch bi kotiiti Yaafe Ayaano qanaatoona qaatii beetone” getaa kooreeto duuboon getteeto ittoshich shaahii beete?

⁶ Yeeri beshiti wojjoon immii beetone; ebich Yaafe Macaafoochaa, “Yeeri geecechinaꞌoyich mooyo kaameyaachemmoyich tuniihe; tunebaani boonoshi qelloon giishii beetinaꞌoyich wojjoon immiye” getaa kooreetone.

⁷ Illa Yeerich hajjeebote; daabiloosinoo koyebote; biyoo ittoshi waanee wokkemmone.

⁸ Yeer waan katinote; biyoo ittoshi waan katinnemmone. Hini axaaxechinaꞌote, ittoshi kishoon xalliibote. Gutte gabechinaꞌote, ittoshiyoo wotta ittoshi mulloon xalliibote.

⁹ Tuumiree oogichi ayinibote; eefote. Ittoshi miico oogeti ayinooch, ittoshi emiroo tuumooch shaddeebe.

¹⁰ Doono Yeeri aafooch ittoshi qelloon giishiibote; biyoo ittoshin oogiyemmone.

Bi Manoo Toommooch Nallee Qayo

¹¹ Ta maneenaꞌote! Ittoshinaa ittoshina ooneyaahote; bi manoon oonniibeeto, bi oonniibeeto sheerooniye; bi manoo toommooch nallii beetoo, bi nalliibeeto sheeree toommoochiye. Wotta sheeree toommooch ne nalligaata, nallee gabberooch koteto nealli, sheeroon quyeebeeto toono neene.

¹² Sheeroon immechonaa nallechona ikke Yeeri baachiye; wodiyoonoo aalliyoonoo hakkiibeeto bi baachiye. Tunebaani neenoommi ne manoo toommooch nallemmi ne, koni neene?

Gubb Tunemmi Mooyon Ariyaano No Tuno

¹³ “Hanaach woyee yaach ebiyoommi katemooch hammemmo noone; arooch naton kotemmo noone; giixeree shiijjemmo noone” ii beetinaꞌote, ellebote.

¹⁴ Yaach tunemmon ariyaano ittoshine. Ittoshi kashe ameene? Ciinniyaa bekkeechii, bekkech aalleebeeti hiinneyoommi tooneene?

¹⁵ Ebich aree qoodoon “Doono Yeeri daaggigaata, beeyemmo noone; hininoo woyee okk ebinoo tuniyemmo noone” getote.

¹⁶ Tunetaa and ittoshi qelloon oogiibee geeciibeeto ittoshine; ebiyoommi geecee yibbaatoo bulli gondoone.

¹⁷ Illa koniyoona bi tunegaata, deꞌoon shuunoon ariibee shuuno bi qayigaata, are ashoyich axaaxoone.