Yaaqobi 3 - Kafa Linguistics Project

Noonoochee Kechiibeeti Yibbaatoon Quyo

¹ Ta maneenaꞌote! Dojjecho tuneti no toommooch beshe nalloo nalleyemmo bi tunoon ariibeeto ittoshine; ebich ittoshi daggoochee meetinaꞌo dojjechinaꞌo tunaayeete.

² No bulli wodde mooyona muriccaabeeto noone; bi yibbaateebeeti yibbaatoona muricaano koniyoona bi beegaata, are asho bi hullimalloon quyo hakkiibeeti, shappaalli ceeni ashoone.

³ Hareshoo nooch deꞌa bi gettemmoyich lugaamo qapphiibeeto noone; ebina no shunnaabeeti xaaꞌoo bulliich bi hammemmoyich tuniibeeto noone.

⁴ Ebiyoommon wotta, markabo amoommon oogeto bi tunetaa, ooge yongoonoo bi xukketaa, gasheebeeto qaawiibeeti xaaꞌoo waan bi hammemmoyich, are markaboyee gubb beeti giisheche mooyina gasheeꞌi hammiye.

⁵ Ebiyoommon wotta heciyee giisheche quume tunaachaa ogooge mooyinaꞌon bi tuniyoona geecaa beetine. Giisheche qaaqqee am shaahe oogeti kubboon bi michaabeeto gaata shalligibote.

⁶ Heciyoo qaaqqoommone; heciyoo no ashittinee quumeenaꞌo daggooch beeti gondoyich hajjeeti alemoone; no ashittino bullin eeꞌii beetone; no kashee gommo bullin michii beetone; shiweree qaaqqoochoo miccemmone.

⁷ Kubbi cooxinaꞌonaa gaceenaꞌonon, showoona shaꞌee beetinaꞌonaa aachi daggooch beeti halleenaꞌo bullinon asho dojjii beetone, wotta doyitinaꞌone.

⁸ Tunebaani koniyoona heciyoon dojjoon hakkaanoone; wuxiibeeti xuppattoona ceennitone; konichona deꞌa getaani gondoone.

⁹ Are heciyoona Doononaa Nihoona tuneti Yeerin naadiyone; are heciyoonoo Yeerichi shaahoommona halleeti asheenaꞌon uppehone.

¹⁰ Ikke noonoochee naadoonaa ufona kechiye. Ta maneenaꞌote! Ebi tun bedaani mooyone.

¹¹ Ikke aachi xuuphoochee noocciibeeti aaconaa caammiibeeti aacona kechehe?

¹² Ta maneenaꞌote! Balaasee mixo zayitee michi aafoon aafo woyee woyinee qomboo balaasee aafoon aafo hakkehe? Ebiyoommon kiiho kechiibeeti aacoochee gaawe aaco keyaanoone.

Damba Yeer Waanee Daneebeeti Shalligoo

¹³ Ittoshi daggoochee ariyechonaa shalligechona konine? Shalligoonaa shiimoona deꞌe shuunoon shuunebee gaawe bi qocoona ebin bekkiibe.

¹⁴ Tunebaani kupphe qanaatoonaa beshi bekkeya getona ittoshi mullooch bi beegaata, ariyechon shaahiree geeciyaahote; iberee toommoochoo koottaahote.

¹⁵ Ebiyoommi shalligoo damba Yeer waanee waabeeto toonoone; showee toommeexone; meechi qaateexone; yinneenaꞌo waanechone.

¹⁶ Qanaatoonaa beshi bekkeya getona beeti xaaꞌooch, aroochoo wotta hukkoonaa gonde shuunoo bullina beetone.

¹⁷ Tunebaani damba Yeer waanee waabeeti shalligee shiichaꞌa xalleene; daakkaꞌa diggoon qaawii beetine; shiimechine; deꞌa ii beetine; maaroonaa deꞌe shuunoo bullina ceennetine; heppoonaa mulloon xalloo shaahiyoona bi waan aalloone.

¹⁸ Ashoonaa ashoonon shunii beetinaꞌo diggoon halliya shookketi yaroochee boonoshi maciibeeto cadiqee aafooniye.