Yaaqobi 1 - Kafa Linguistics Project

¹ Yeerinaa Doono Yesuus Kiristoosinochi guuno tuneti Yaaqobi waanee, Showee toommooch shaceꞌi beeti, aaraa gutte yoodeenaꞌoyich: Diggoo ittoshich tunebe.

Kiristoosi Toommooch Mullee Tooꞌiyee Naboona Iritee Beego

^2-3 Ta maneenaꞌote! Baribare iritoo ittoshi toommooch bi shagiyooba, Kiristoosi toommooch mulloon tooꞌiyoona ittoshi manjoo haaꞌiyoon immiibeeto bi tunoon ariiree, ebiyoommi iritoon ceeni emiroommon shaahiree ciinote.

⁴ Ittoshich shappiti mooyo amolla aalli, shappaalli ceeno ittoshi tunemmoyich haaꞌiyoo bi shuunoo bullin shuunebe.

Yeer Waanee Daneebeeti Shalligoo

⁵ Ittoshi daggoochee koniyoona shalligoo biich shappi gaata, qoonaanoon mulloochee tiijjiꞌi bullich immiibeeti Yeerin qollebe; biichoo ichemmone.

⁶ Tunebaani amoonolla bi mulloon guttiyaanoon Yeeri immemmo bi tunoon iberiiree qollebe; mulloon guttiibeeti asho yongo shuurikkiibeeti aachi aayoniye bi shaahiibeeto.

^7-8 Gutte gabechi asho, bi shuuneebeeti shuunoonoo okk hach ii beeti are asho Doono Yeer waanee ikke mooyinona danemmo shaahiree biich bekkaaye.

Girechinaꞌonaa Gaannechinaꞌonoyich Icheti Ciico

⁹ Girecho tuneti kittinnoo bi oogoona,

¹⁰ gaannecho wotta bi giishoona, geecibe. Ebiyoo gaanno mocee bungoochoommon oojjemmo bi tunetoyichye.

¹¹ Aabeyoo oogeti gaamoona keyiree mocoon shoolliyemmine; mocee bungoo oojjemmone; bi malletee gaawoo aallemmone; ebiyoommon gaannecho shuunee toommooch beebee aallemmone.

Gaawetoani Gonde Mooyo Yeer Waanee Womi Qayo

¹² Iritoo bi toommooch shagiyooba haaꞌiibeeti asho diireetone; iritoon haaꞌiyoona bi beshiitoyee gubb, Yeeri biin shunnii beetinaꞌoyich bi gibenikkiti bulli yemeenee kashee gubbichoon danemmone.

¹³ Koniyoona bi toommooch shaggiti iritee naboona axaaxoon shuuneya bi gabigaata, “Yeerine axaaxoon ta shuunemmoyich tuniibeeto” gettaaye. Yeerinaa gondoonoyich ikkittino aalloone; bi qelloona bi, koninolla “Axaaxoon shuuniibona” iꞌi gabaache.

¹⁴ Tunebaani asho bi ikkikkoon axaaxoon shuuneya bi gabiibeeto, gonde bi qaatoo dawushiꞌi biin bi geechenane.

¹⁵ Aroyee gubb ebi uroochi gonde qaatoo yeqqefeꞌi axaaxoon shiyihe; axaaxoo diccii oogeꞌi qitoon shiyihe.

¹⁶ Ta shunnaabeeti ta maneenaꞌote! dawusheyaahote.

¹⁷ Gaawe wojjoo bulli, beshaa beshiti diiroo bulliyoo bi waabeeto damba shimaayoochee, bekkeenaꞌochi Nihoo waaneeniye. Bi waan yiirittoochoommon guudo woyee shaddeyoo aalloone.

¹⁸ Bi hallitinaꞌo daggooch qaabboo no tunemmoyich, bi hajjee daaggoona iberee qaaroona noon shiyihe.

Yeerichi Qaaroon Waayeꞌi Shuunee Toommooch Heechiyoo

¹⁹ Ta shunnaabeeti ta maneenaꞌote! Ebin shalligibote. Asho bulli waayoyich afaafinecho, yibbaatoyich nibbecho, kaaroyichoo nibbecho tunebe.

²⁰ Ashi kaaro Yeerin emirikkiibeeti cadiqee shuunoon shuuneyaachemmone.

²¹ Ebich tiyaariibeeti shuunoo bullinaa gonde qoco bullinon bayiichi, ittoshi kashoon wodiyoon hakkiibeeti, Yeeri ittoshi mullooch bechiti qaaroyich ittoshi qelloon yittiiree deꞌa getote.

²² Ittoshi waayeebeeti Yeerichi qaaroon shuunee toommooch heechiibotalli, ittoshi qelloon wochi dawushibee waayee beeton baach tuneyaahote.

²³ Yeerichi qaaroon waayeechii, shuunee toommooch heechiyaani asho bi beegaata, bi aafoon heeraawoona beeggiibeeti ashooniye bi shaahiibeeto.

²⁴ Ebi are asho bi shaahoon beeggiichii hammiye; bi shaahoo amoommo gaata bekkech battehe.

²⁵ Tunebaani axaaxoochee biishee beeti, shappaalli ceeni sheeroon ciinniꞌi are sheeroona manjiibeeti, waayeenoo batteyaanoon shuunee toommooch heechiibeeti asho, bi shuuneebeeti shuunoona diireyemmone.

²⁶ “Yeerich goyinnaabeeto taane” ii beeti asho bi heciyoon quyo bi qayigaata, bi goyinno duuboone; bi qellooniye bi dawushii beeto.

²⁷ Nihoo Yeer waanaa xalloo tuneti ibere goyinno ebine: Nihaalli bushiisheenaꞌonaa xuume maacheenaꞌonochi iritoon gaacho, hini alemooch beeti tiyaariibeeti mooyoocheenoo bi qelloon quyoone.