Yaaꞌoo 9 - Kafa Linguistics Project

Uuchinnee Maraakoo Tiroon Hugo

¹ Uuchinnee maraakoo tiroon huggiye; shimaayoochee showooch holliti xojjenoon beeggeho. Oppee hoonoochi kelloon qechiibeeti qulfo biich ichehe.

² Biyoo oppee hoonoon qechiye; ooge qaaqqee gudoochee kechii beetoommi cufoo oppoochee kechiye; oppoochee kechiti cufoo aabeen kaappiꞌi shimaayoon manderiihe.

³ Ebi cufoochee gecheenaꞌo kechiꞌi showooch kindiyeete; boonoshichoo showeexi barahee machoochi hakkoommi hakkoo ichehe.

⁴ “Yeerichi maatemo boonoshi barooch geddeyaani asheenaꞌoyee beshetaa, showooch beeti mocoo tuneba naaxiibeeti mooyo, mixo tuneba eboshichi achooch shaggaahote” getteehe.

⁵ Ebi are asheenaꞌon uuche agenee wottoon gecheenaꞌo qaaqqiyemmoyichalli, wuxemmoyich daaggeyaanoone; asheenaꞌo qaakkeebeetoo barahee machoona kocheti asho qaakkee beetoommoniye.

⁶ Aroobee yemeenooba asheenaꞌo qitoon qaawemminaꞌone; tunebaani daneyaacheete; qitiya qaatemminaꞌone; tunetaa qitoo boonoshiyee wokkemmone.

⁷ Ebi are gecheenaꞌochi shaahoo ginee koyoyich qanniti hareshoochi shaahoommone; boonoshi shimbooch aachee gubbichoon shaahiibeeto beetone; boonoshiyoo aafoochaa ashoon shaaheenaꞌone.

⁸ Boonoshi qello genni qelloommone; boonoshi gashoo daaheree gashoommone.

⁹ Xuuree getee ginee tahoommi tahechinaꞌone; boonoshi qoshee qaaro koyooch guubbiibeeti, meeti haresheenaꞌonaa gaarinaꞌonochi qaaroommone.

¹⁰ Barahee machoochi ceeroommi ceeroonaa gayona boonoshich beetone; uuche agenee wottoon boonoshi ceereexi gayona asheenaꞌon boonoshi qaakkiyemmoyich hakkoo boonoshich ichetone.

¹¹ Boonoshichoo taatoo beetone; are taatoo oppee hoonee maraakoone; bi shigoo Hibiree noonoona Abaadooni, Giriikee noonoona Apholiyooni getteehe.

¹² Ikke shattiiti mooyo beshetone; illa ebiyee gubb batt shattii giiriiti gutte mooyo woyemmone.

Shirittinnee Maraakoo Tiroon Hugo

¹³ Shirittinnee maraakoo tiroon huggiye; Yeeri aafooch beeti, aachoochee shuuneeti deejjee gudee awudde qareenaꞌoochee qaaroon waayeho.

¹⁴ Tiroon yechiti shirittinnee maraakoyichoo “Ooge aaco Efiraaxis cucheti awudde maraakeenaꞌon biishe!” iye.

¹⁵ Asheenaꞌochi keejje beereexi ikke beeroon boonoshi wuxemmoyich, hini saatoyich, hini areddoyich, hini agenoyich, hini natoyichoo qanniꞌi beeti hini are awudde maraakeenaꞌo biicheheete.

¹⁶ Hareshechi ginee naayinaꞌochi haddoon waayeho; boonoshi haddoo gutte balle hume wottee humeenaꞌone.

¹⁷ Ebiyoommon yaaꞌoona ta beeggeti haresheenaꞌonaa boonoshin yebbetinaꞌona getee ginee tahoommi tahechinaꞌone; are tahoochi shaahoo qaaqqoommi ceello, yaakintoommi shimaayito, waageroommi keelleshoone; haresheenaꞌochi qello daaheree qelloommone; boonoshi kookkoocheenoo qaaqqoo, cufoonaa waageroona kechiye.

¹⁸ Boonoshi kookkoochee kechiti qaaqqoona, cufoonaa waageroona, ebi keejje naxeenaꞌona asheenaꞌochi keejje beereexi ikke beeroo qitiye.

¹⁹ Haresheenaꞌochi giidoo beeto boonoshi kookkoonaa boonoshi ceeroonoochiye; boonoshi ceeroo dingeroommo tuneechii qellecho bi tunetoyich aroona asheenaꞌon qoppiyeete.

²⁰ Ebi naxeenaꞌona qitaanoon muricciti asheenaꞌo andoo boonoshi gonde shuunoon qajjiꞌi Yeer waan wotteyaaneenaꞌone; yinneenaꞌoyich goyinnoon, wotta aachoonaa birewoonoochee, gooshoochee, xaqqoonaa mixonoochee kishoona boonoshi shuuneti, ciinon woyee waayoon woyee shaꞌoon hakkaani, shahalloyich goyinnoon qayaaneenaꞌone;

²¹ wotta ashoon wuxoon woyee iicoon (qaaxoon) woyee shunee mamon woyee gaayon qajjiꞌi axaaxee gommoochee Yeer waan wotteyaaneenaꞌone.