Yaaꞌoo 8 - Kafa Linguistics Project

Macaafeexi Shabaattinnee Maatemoon Bago Gaxxoo

¹ Bagoo shabaattinnee maatemoon bi gaxximmona, qachi saatee wottoon shimaajji taatee xaaꞌooch bulli mooyo shashewimiye.

² Aroochee Yeeri aafooch neexeebeeti shabaatte maraakeenaꞌon beeggeho; shabaatte tiroo boonoshich ichehe.

³ Bare maraakoo ixaano shookkeebeeti aachee qiicoon yechii waaꞌi, deejjee gudee gaꞌooch neexehe. Taatee qeechi aafooch beeti, aachoochee shuuneeti deejjee gudee toommooch yaafeenaꞌo bullichi corootoona tookki bi giddiyemmi dofee ixaano biich ichehe.

⁴ Ixaanee cufoo yaafeenaꞌochi corootoona tookkii ebi maraakoo kishoochee Yeeri aafooch kechiye.

⁵ Aroyee gubb maraakoo ixaano shookkeebeeti qiicoon yechii, deejjee gudeexi qaaqqoochee ceennimmi wottoon geddiichii showooch duppiye; xeeyee qaaroonaa ooge qaaroona, xeeyee phaqqoonaa showee qewoona tunehe.

Awudde Maraakeenaꞌo Tiroon Hugo

⁶ Aroyee gubb shabaatte tiroon yechiti shabaatte maraakeenaꞌo tiroon hugga qanniyeete.

⁷ Batti batti maraakoo tiroon huggiye. Damoo bacceeti baderoonaa qaaqqoona tunehe; ebi aroo showooch duppehe; showee keejje beereexi ikke beeroo micciye; mixinaꞌochi keejje beereexi ikke beeroo micciye; cammiti mocoo bulliyoo miccii aallehe.

⁸ Guttinnee maraakoo tiroon huggiye; micciibeeti ooge guudon shaahiibeeti mooyo baharooch duppehe; baharee keejje beereexi ikke beeroo damoon tunehe.

⁹ Are baharooch beeti kashechi halleenaꞌoochee keejje beereexi ikke beeroo qitiye; markabeenaꞌochi keejje beereexi ikke beeroo aallehe.

¹⁰ Keejjinnee maraakoo tiroon huggiye; qaaqqee conjoochoommon micciibeeti ooge xojjeno shimaayoochee kindiꞌi aacinaꞌochi keejje beereexi ikke beeroonaa aachi xuupheenaꞌonochi toommooch holliye.

¹¹ Ebi are xojjeno shigoo Caamo getteehe; aacinaꞌochi keejje beereexi ikke beeroo caammiye; aaco caamo bi tunetoyich, ebi are caame aachi naboona meeti asheenaꞌo qitiyeete.

¹² Awuddinnee maraakoo tiroon huggiye; aabee keejje beereexi ikke beeroo, agenee keejje beereexi ikke beeroo, xojjeneenaꞌochi keejje beereexi ikke beeroo yexxehe; eboshichi keejje beereexi ikke beeroo manderehe; areddee keejje beereexi ikke beerooch, xumee keejje beereexi ikke beerooch bekko aallehe.

¹³ Aroyee gubb ikke booyo shimaayee daggoona yoobbii bi beetaa beeggeho. Oogeti qaaroona “Bare keejje maraakeenaꞌo tiroon huggemminaꞌo boonoshi tunetoyich, showee toommooch beeti asheenaꞌoyich woowo, woowo, woowo!” bi ii beetaa waayeho.