Yaaꞌoo 7 - Kafa Linguistics Project

Malletoo Boonoshi Barooch Geddeti Yeerichi Asheenaꞌo

¹ Aroyee gubb showeechi awudde kelloona neexeti awudde maraakeenaꞌon beeggeho. Boonoshiyoo showee toommooch tuneba baharee toommooch, amee michi toommoochoo yongo yongeyaachemmoyich awudde kelloona yongeebeeti yongeenaꞌon yechii bajjiyeete.

² Beeyechi Nuggishoo Yeerichi maatemoon yechiti bare maraakoo aabi-keyo waanee kechii bi beetaa beeggeho. Biyoo showoonaa baharee aaconochi toommooch gonde mooyon boonoshi tuniyemmoyich daaggeeti awudde maraakeenaꞌoyich oogeti qaaroona cookiꞌi,

³ “No Nuggishoochi guuninaꞌo barooch maatemoon no geddemmi wottoon, showee toommoochoo tuneba baharee toommoochoo, mixinaꞌochi achoochoo, shaggaahote” iye.

⁴ Malletoo geddeti asheenaꞌochi haddoon waayeho: Israꞌeeleenaꞌo boonoshi yoodi yoodoochee malletoo geddetinaꞌo balli aabbaa awudde humeenaꞌone.

⁵ Yihudi yoodoochee aaraa gutte humeenaꞌo, Roobeeli yoodoochee aaraa gutte humeenaꞌo, Gaadi yoodoochee aaraa gutte humeenaꞌo,

⁶ Aseeri yoodoochee aaraa gutte humeenaꞌo, Nifitaali yoodoochee aaraa gutte humeenaꞌo, Minaasi yoodoochee aaraa gutte humeenaꞌo,

⁷ Simooni yoodoochee aaraa gutte humeenaꞌo, Lewi yoodoochee aaraa gutte humeenaꞌo, Yisakoori yoodoochee aaraa gutte humeenaꞌo,

⁸ Zebulooni yoodoochee aaraa gutte humeenaꞌo, Yooseefi yoodoochee aaraa gutte humeenaꞌo, Biiniyaami yoodoochee aaraa gutte humeenaꞌo, malletoon geddeheete.

Shimaajji Taatee Xaaꞌooch Dofee Asheenaꞌo Neexeꞌi Bekko

⁹ Aroyee gubb ciinneho; areegaata aagetoo bulliichee, ashi yoodo bulliichee, ashi yaroo bulliichee, asho yibbaateebeeti noonoo bulliichee kiceeti, haddaa ciyaani dofee asheenaꞌon beeggeho. Nacce tahoon tahee yeebbee waamon yechiꞌi taatee qeenonaa Bagoonochi aafooch neexeheete.

¹⁰ Oogeti qaaroona cookiibee, “Wodiyoo, taatee qeenooch koteti no Nuggishoochonaa Bagoochonane” iyeete.

¹¹ Maraakeenaꞌo bulliyoo taatee qeechi guudoona, geeneenaꞌonaa kashechi awudde halleenaꞌonochi guudoona neexee beeheete; taatee qeechi aafooch baroona guufeheete; Yeerichoo goyinneebee,

¹² “Ameena, galleto, oogee yiiroo, shalligoo, naadoo, oogo, giidoonaa hakkoona bulli yemeenoon no Nuggishoyich tunebe. Ameena” iyeete.

¹³ Geeneenaꞌo daggoochee ikkoo tiyiꞌi, “Nacce tahoon taheti eboshi ameexinaꞌone? Amoochee waatinaꞌone?” iꞌi taan echehe.

¹⁴ Tawoo wochaꞌa biich “Ta doonocho, neene ariibeeto” iyo. Taach ishichiye: “Eboshi magge xuuxoochee waatinaꞌone; boonoshi tahoonoo Bagoochi damoona machiꞌi naccoo tuniitinaꞌone.

¹⁵ Ebich, Yeerichi taatee qeechi aafooch beechii, areddoonaa xumoonon yaafe bi kexoochaa biich maddee beetinaꞌone; taatee qeenooch kotetoo boonoshi toommooch yiiroo tunemmone.

¹⁶ Illa ebiyee bekk shaaceyaachemminaꞌone; ebiyee gubb shacheweyaachemminaꞌone; aabo boonoshin yexaachemmone; gaamoo amolla boonoshin michaachemmone.

¹⁷ Ebiyoo, taatee qeechi gutte daggooch beeti Bago boonoshich qiddoo tuneree, kashee aachi tunooch boonoshin bi yaabemmoyichiye. Yeeriyoo boonoshi acimo bullin boonoshi aafoochee hidemmone” iye.