Yaaꞌoo 6 - Kafa Linguistics Project

Shabaatte Maatemo Gaxxeyoo

¹ Bago shabaatte maatemoochee ikkinnoon bi gaxxaa beeggeho; kashechi awudde halleenaꞌo daggoochee ikkoo xeeyee qaaroommi qaaroona “Wobe!” bi getaa waayeho.

² Beeggaanoo iyo; areegaata nacce hareshoon beeggeho; aroon yebbeto kishooch maꞌo beetone; biichoo gubbichoo ichehe; kochii wochechon tuneꞌi bi shixechinaꞌon koyi wochiya shimaajji taatee xaaꞌoochee kechii hammiye.

³ Bago guttinnee maatemoon bi gaxximmona, kashechi awudde halleenaꞌo daggoochee guttinnoo “Wobe!” bi getaa waayeho.

⁴ Bare hareshoo kechiye; biyoo ceelloone; aroon yebbetoyich, asheenaꞌo boonoshinaa boonoshina ikkoo baroon wuxemmonaa diggoon showee toommoochee bi aalliyemmonoyich hakkoo ichehe; wotta ooge goraado biich ichehe.

⁵ Bago keejjinnee maatemoon bi gaxximmona, kashechi awudde halleenaꞌo daggoochee keejjinnoo “Wobe!” bi getaa waayeho; beeggaanoo iyo; areegaata aaꞌi hareshoon beeggeho; aroon yebbeto machoon bi kishoona yechitone.

⁶ Kashechi awudde halleenaꞌo daggoochee qaaro “Ikke diinaaroyich ikke kobbaye teepphoo, ikke diinaaroyich keejje kobbaye sheqoo tunebe; tunebaani zayitee mixonaa woyinee qomboonochi achooch shaggaahine” bi getaa waayeho.

⁷ Bago awuddinnee maatemoon bi gaxximmona, kashechi awudde halleenaꞌo daggoochee awuddinnoo “Wobe!” bi getaa waayeho.

⁸ Beeggaanoo iyo; areegaata daashe hareshoon beeggeho; aroon yebbetochi shigo Qitoo getteehe; Siꞌooloo biin dabbiye. Showee toommooch beeti asheenaꞌo daggoochee awudde beeroochee ikke beeroon ginoona, shaacoona, naxoonaa ashoon maabeeti kubbi cooxinaꞌona boonoshi wuxemmoyich hakkoo boonoshich ichehe.

⁹ Bago uuchinnee maatemoon bi gaxximmona, Yeerichi qaaroon boonoshi gettitoyich, gibeneeto tuneꞌi boonoshi miixetoyichoo wuxeeti asheenaꞌochi kasho deejjee gudee dechiich beeton beeggeho.

¹⁰ Ebi are wuxeeti asheenaꞌochi kasho oogeti qaaroona cookiibee, “Yaafoonaa iberoona tuneti Mawe Doono Yeero, nallaanoon ne yagemmo, showooch beetinaꞌo toommooch no damee nichoon ne gaacaachemmo aati wottooniye?” iyeete.

¹¹ Boonoshi ikkikkoyich nacce taho ichehe. “Ittoshina tookkii Kiristoosich maddeti ittoshi maneenaꞌo ittoshichoommon wotta wuxaa boonoshi haddoo ceennimmi wottoon, giisheche yemeenoon kashebote” getteeheete.

¹² Bagoo shirittinnee maatemoon bi gaxximmona beeggeho; oogeti showee qewo tunehe; aabeyoo shiixxoon shaahaꞌa aaqqahan; ageneyoo damoon shaahaa ceellahan.

¹³ Balaasee mixo giidechi yongoona shuuriꞌi bi aafo shekiroommon, xojjeneenaꞌo shimaayoochee showooch shekiree holliyeete.

¹⁴ Shimaayoo yeebboochoommon qodeꞌi aallehe; guudinaꞌonaa buure showeenaꞌo bullinoo boonoshi xaaꞌoochee aalleheete.

¹⁵ Showee toommeexi taateenaꞌo, woraaferasheenaꞌo, ginee iraasheenaꞌo, gaannechinaꞌo, giidechinaꞌo, guuchi yareenaꞌonaa xalle yareenaꞌo bullinoo gofoonaa xaqqee guudi gogginonooch aasheheete.

¹⁶ Geppeenaꞌonaa xaqqee guudinaꞌonon “No toommooch dihibote! Taatee qeenooch koteto aafoochee, Bagoochi kaaree shiixxoocheenoo noon aachibote!

¹⁷ Shattii giiriiti boonoshi kaaree shiixxee aabo waatone; konine neexoon hakkemmo?” iyeete.