Yaaꞌoo 5 - Kafa Linguistics Project

Shimaajji Taatee Xaaꞌooch Bekketi Bago

¹ Aroyee gubb taatee qeechi toommooch kotetochi qanne kishooch maacinaa maachina kooreeti, qoddeti macaafoon beeggeho; aroo shabaatte maatemoona nashaa dooggitone.

² Ikke giidechi maraakoo oogeti qaaroona “Qoddeti macaafoon yaggoyich, maatemeenaꞌon gaxxoyichoo bedo konine?” ii bi awaajjii beetaa beeggeho.

³ Shimaayoochoo tuneba showooch, showee dechoo tuneba ebi macaafoon gaxxii yaggoonaa bi daggooch beeton beꞌonoyich beddito koniyoona aalloone.

⁴ Ebi macaafoon gaxxii yaggoonaa bi daggooch beeton beꞌonoyich beddito koniyoona dano qajjitoyich, oogeton eeppeho.

⁵ Arooba geeneenaꞌo daggoochee ikkoo taach ishichiye: “Qaye, eeppaahine. Ebiyoche, Yihudi yoodoochee tuneti daaheroo, biyoo Daawitichi colloonaa yaroona tuneto bi shixechinaꞌon kochii wochitone; ebich qoddeti macaafoon yaggoyich, shabaatte maatemeenaꞌon gaxxoyichoo beddito tuneꞌi danetone” iye.

⁶ Taatee qeeno dagg beetaa, bi guudoona kashechi awudde halleenaꞌo beetaa, boonoshi guudoona geeneenaꞌo beeti gutte daggooch guureetoommi Bago neexeꞌi beeton beeggeho; shabaatte qaroonaa shabaatte aafoona biich beetone; ebi shabaatte aafo showoo bulliich wocheeti, Yeerich maddeebeeti shabaatte ayaaneenaꞌone.

⁷ Giddeꞌinoo taatee qeenooch kotetochi qanne kishoochee macaafoon daammiye.

⁸ Macaafoon bi daammimmona, kashechi awudde halleenaꞌonaa hiyaa awudde geeneenaꞌona Bago aafooch baroona guufeheete. Boonoshi ikkikkoona ximboonaa yaafeenaꞌochi corootee malletoo tuneti ixaano ceenniti, aachoochee shuuneeti qiicoonon yechiꞌi,

⁹ ishichiibee andire shoddoon shoddeheete: “Qoddeti macaafoon daamoyich maatemeenaꞌon gaxxoyichoo beddeto tunaꞌa daneto neene; guureeꞌa ne damoona Yeericho boonoshi tunemmoyich, ashi yoodo bulliichee, asho yibbaateebeeti noonoo bulliichee, ashi yaroo bulliichee, aagetoo bulliicheenoo asheenaꞌon biisheto neene;

¹⁰ boonoshinoo no Nuggishoyich maddeebeeti qeesheenaꞌonaa bi taatee asheenaꞌonon tuniito neene; showee toommoochoo taatemminaꞌone” iyeete.

¹¹ Wochinnoon beeggeho; taatee qeechi guudoona beeti kashechi awudde halleenaꞌonaa geeneenaꞌonochi guudoona kiceeti wodde maraakeenaꞌochi qaaroon waayeho; boonoshiyoo haddaa ciyaani humaa xumeenaꞌone;

¹² oogeti qaaroona “Guureeti Bagoyich giidoo, gaanno, ceeni shalligoo, hakkoo, oogo, oogee yiiroonaa galletoona tuno bede mooyone” iyeete.

¹³ Shimaayooch, showoochoo, showee dechoo, baharee toommoochoo beeti halleenaꞌo bulli, boonoshi daggoochoo beeti halleenaꞌo bulli “Taatee qeenooch kotetonaa Bagoonoyich galleto, oogo, oogee yiiroonaa giidoona bulli yemeenoon tunebe” boonoshi ii beetaa waayeho.

¹⁴ Kashechi awudde halleenaꞌoo “Ameena” iyeete; geeneenaꞌoo baroona guufeꞌi goyinneheete.