Yaaꞌoo 4 - Kafa Linguistics Project

Shimaayooch Beeti Taatee Qeeno Bekko

¹ Aroyee gubb ciinneho; ebiyoche shimaajji taatee xaaꞌooch qecheeti kello beete; shiichaꞌa ta waayeti tiree qaaroommi qaaro, “Hach damba keyi wobe! Ebiyee gubb tunemmi mooyon neech bekkiyemmo taane” iye.

² Bekkech Yeerichi Ayaanee giidoo ta toommooch tunehe; arooba shimaajji taatee xaaꞌooch taatee qeenon, are qeechi toommoochoo koteton beeggeho.

³ Are taatee qeenooch koteꞌi beeto, bi shaahoo yasphiidoochoommon, saridiyoonoochoommonoo waccii beetone; maarigidoochoommon oogichii wacciibeeti ximbittoo taatee qeechi guudoona beehe.

⁴ Ebi are taatee qeechi guudoona bare hiyaa awudde taatee qeeninaꞌo beeheete; ebi qeeninaꞌo toommooch nacce tahoon taheꞌi boonoshi qellooch aachee gubbichoon uketi hiyaa awudde geeneenaꞌo koteꞌi beeheete.

⁵ Are taatee qeenoocheenoo xeeyee phaqqoo, ooge qaaroonaa xeeyee qaaroona kechii beehe; taatee qeechi aafoochoo shabaatte ceechee conjoo aaxxee beehe; boonoshiyoo Yeerich maddeebeeti shabaatte ayaaneenaꞌone.

⁶ Taatee qeechi aafoochoo biriloommi burciqee baharo beehe. Ebi daggooch beeti taatee qeechi guudoona, aafinaa gubbinoochaa dofee aafo boonoshich beeti kashechi awudde halleenaꞌo beeheete.

⁷ Ikkinnee kashechi halloo daaheroon shaahoone; guttinnee kashechi halloo bariyoon shaahoone; keejjinnee kashechi halloochi aafo ashoon shaahoone; awuddinnee kashechi halloo yoobbiibeeti booyon shaahoone.

⁸ Ebi kashechi awudde halleenaꞌo boonoshi ikkikkoyich shiritti shiritte qoshoo beetone; boonoshi achee guudoonaa boonoshi qoshee maacinooch aafo ceennitone. Boonoshiyoo “Aafoo beeti, andoo beeti, gubboo beeyemmi, Beshe Mawe Doono Yeeri yaafoo, yaafoo, yaafoone” iibee areddoonaa xumoonon kasheyaaneenaꞌone.

⁹ Ebi kashechi awudde halleenaꞌo taatee qeenooch koteti, bulli yemeenoon beeyechoyich “Oogee yiirecho neene; oogoo neene; ne tuniito bullichoo galleteeto neene” boonoshi immona,

^10-11 hiyaa awudde geeneenaꞌo taatee qeenooch koteto aafooch baroona guufeꞌi bulli yemeenoon beeyechoyich goyinneebee, “No Doono, no Nuggishoocho! Bulli mooyon hallitine; ne daaggoonoo tunetone, halleetone. Ebich ‘Oogee yiirecho neene; oogoo neene; giidecho neene’ getteya beddehine” iibee boonoshi uketi gubbichoon kindii taatee qeenooch koteto aafooch kotiiheete.