Yaaꞌoo 22 - Kafa Linguistics Project

^1-2 Ebi are maraakoo Yeerinaa Bagoonochi taatee qeenoochee kechii, are katemee daggeexi ooge gommi gutte daggoona ufeebeeti, biriloochoommon wacciibeeti kashee aacon taach bekkiihe. Aachi okkinaa hachinooch agen agenoona aafeebee, natooch aaraa gutte wottoon aafeebeeti kashee mixo beehe; hini are michi waamo aageteenaꞌon wodiyoyich gaacciibeeti attoone.

³ Ebiyee bekk hini are katemeech ufo beetaachemmone; Yeerinaa Bagoonochi taatee qeeno are katemee daggooch tunemmone; bi guuninaꞌo aroochaa biich goyinnemminaꞌone.

⁴ Bi aafoonoo beeggemminaꞌone; bi shigoo boonoshi barooch tunemmone.

⁵ Ebiyee bekk xumo beetaachemmone; Doono Yeeriyoo boonoshich bekko tunemmone; ebich ceechee bekkoonaa aabee aaxxoona boonoshich qaawiyaachemmone; bulli yemeenoon taatemminaꞌone.

Yesuusichi Wottee Womo

⁶ Ebi are maraakoo taach “Neech getteeti mooyinaꞌo gibeneetinaꞌonaa ibereenaꞌonane; bi Ayaanoon bi keemechinaꞌoyich immiti Doono Yeeri katini aabee daggooch tunemmi mooyon bi maddechinaꞌoyich bekkiiya iꞌi bi maraakoon wochee deejjiye” iye.

⁷ Yesuusi “Ebiyoche, kaateree woyemmo taane; hini macaafooch kooreeti keemee qaaroon quyee beetinaꞌo diireetinaꞌone” iye.

⁸ Ebinoo ta waamona waayeto, ta aafoonoo beeggeto, Yowannisi taane; ta waayaa beeggehooba, ebin taach bekkiiti maraakoyich goyinneya bi baatooch baroona guufeho.

⁹ Tunebaani aroo “Neen ariibe! Eechiyaahine! Neechoommon, keemechi ne maneenaꞌochoommon, hini macaafooch kooreeton quyee beetinaꞌochoommonoo Yeerichi guuno taane; Yeerich baachiye ne goyinnemmo!” iye.

¹⁰ Taach daakkiꞌi ishichiye: “Yemeeno katinnitone; ebich hini macaafeexi keemee qaaroon maatemoona hiccaahine.

¹¹ Hukkecho hukkoon andoo shuune beebe; tiyaariibeeti shuunoon shuuneebeeto andoo shuune beebe; cadiqe asho andoo cadiqee shuunoon shuune beebe; yaafoo andoo bi yaafittinoona beebe” iye.

¹² Yesuusiyoo ishichiye: “Ebiyoche, kaateree woyemmo taane; ta woyemmo, asho bi ikkikkoyich ta qoccemmi bi shuuni shuunee gatiyoon yeshireeshiye.

¹³ Alfoonaa Oomeegoona, Aafichonaa Gubbichona, Shiichoonaa Tacona taane” iye.

¹⁴ Boonoshich daaggeetaa, kelloona katemee maac giyiree kashee michi aafoochee boonoshi maayemmoyich, boonoshi qoreddoon machii xallii beetinaꞌo diireetinaꞌone.

¹⁵ Kunaaneenaꞌo, kaayechinaꞌo, shunimaayeenaꞌo, ashoon wuxii beetinaꞌo, shahalloyich goyinnee beetinaꞌo, kootee kooton shunnii beetinaꞌonaa kootee kooton doyitinaꞌo bullinoyich hini are katemeech gimo ciroona daaggeyaache.

¹⁶ “Ta Yesuusi kittinnee guuphinaꞌo tuneti ittoshich ebi bullin bi gettemmoyich ta maraakoon wocheto taane. Daawitichi colloonaa yaroona taane; aaxxeebeeti haree xojjenoommo taane” iye.

¹⁷ Yaafe Ayaanoonaa Bagoochi woꞌeena “Wobe!” ii beetinaꞌone. Ishin waayeebeeto bulli “Wobe!” gete. Shacheweto bulli wobe; qaawiibeeto bulliyoo kashoon immiibeeti aacon baad cikki daambe.

Ciireexi Shalligichoo

¹⁸ Hini macaafooch kooreeti keemee qaaroon waayeebeeto bullich xiishii gettoye; koniyoona hini toommooch amee mooyinona bi daakkigaata, Yeeri hini macaafee daggooch kooreeti naxeenaꞌon bi toommooch kindiyemmone.

¹⁹ Wotta koniyoona hini macaafooch kooreeti keemee qaaroochee amee mooyinona bi shappiigaata, hini macaafooch kooreeti kashoon immiibeeti michi aafoonaa yaafe katemeenoochee bi ixoon shappiyemmone.

²⁰ Ebi mooyinaꞌon gettiibeeto “Eeha, kaateree woyemmo taane” ii beetone. Ameena; Doono Yesuuso, wobe!

²¹ Doono Yesuusichi wojjoo ittoshi bullina tookki tunebe.