Yaaꞌoo 20 - Kafa Linguistics Project

Hume Naton Sheexaanoo Cucheyoo

¹ Oppee hoonoon qechiibeeti qulfoonaa ooge sansalatoonon yechiti maraakoo shimaayoochee bi kindii beetaa beeggeho.

² Wonnee dingeroon, daabiloosi, Sheexaanoo getteeti dareboon yechiye; hume nati wottoon cuchiye.

³ Oppee hoonoochoo duppiye; hume nato ceennimmi wottoon aageteenaꞌon bi muricciyaachemmoyich, oppee hoonee kelloon hicciꞌi maatemoon geddiye; hume nato ceennitoyee gubb giisheche wottoyich baach biicheyemmone.

⁴ Aroochee daakkaꞌa taatee qeeninaꞌon beeggeho. Aree toommooch kotetinaꞌoyich nallee hakkoo ichehe; Yesuusi miixeti iberoonaa Yeerichi qaaroonon boonoshi gettitoyich boonoshi qettoon kucheti asheenaꞌochi kashoon beeggeho. Cooxonaa bi shahalloonoyich goyinneyaaneenaꞌone; cooxochi malletoon boonoshi barooch woyee boonoshi kishooch gedaaneenaꞌone. Boonoshiyoo kashecho tuneꞌi Kiristoosina tookkii hume naton taateheete.

⁵ Ebiyoo qititi asheenaꞌon shiichiree Yeeri tiijjemmi batti batti aaboone. Echeti qititinaꞌo hume nato ceennimmi wottoon qitoochee tiyaaneenaꞌone.

⁶ Qitoochee shiichiree tiyemminaꞌo diireetinaꞌonaa yaafeenaꞌonane; guttinnee qitoo boonoshi toommooch giidoon daneyaachemmone. Boonoshiyoo Yeerinaa Kiristoosinochi qeesheenaꞌo tunemminaꞌone; Kiristoosina tookkiree hini hume naton taatemminaꞌone.

Sheexaanoo Toommooch Nalleyoo

⁷ Hume nato ciiremmona, Sheexaanoo bi cuchetoochee biicheyemmone.

⁸ Showee awudde kelloona beeti aageteenaꞌon, Googinaa Magooginon bi muriciyemmoyich ginee koyee xaaꞌooch kiciya kechemmone; boonoshi haddoo baharee gasheexi qacoommone.

⁹ Boonoshiyoo showoo bullich kechiꞌi, yaafeenaꞌo beeti xaaꞌoonaa Yeeri shunniibeeti katemeenon giichii guuddiyeete; tunebaani arooba qaaqqoo shimaayoochee kindiꞌi boonoshin maahe.

¹⁰ Boonoshin muriciiti daabiloosiyoo, cooxonaa koote keemechona duppeti, qaaqqoonaa waageroona micciibeeti baharooch duppehe; bulli yemeenoon areddoonaa xumoonon xuuxemminaꞌone.

Ciireexi Yeerichi Nalloo

¹¹ Aroyee gubb ooge nacce taatee qeenon, bi toommooch kotetonoo beeggeho; showoonaa shimaayoona bi aafoochee aalleheete; xaaꞌoo boonoshich daneyaanoone.

¹² Qititinaꞌo, gishiisheenaꞌonaa ogoogeenaꞌona qeechi aafooch neexeꞌi boonoshi beetaa beeggeho; macaafeenaꞌo gaxxeeheete; wotta bare macaafo gaxxeehe; aroo kashee macaafoone. Qititinaꞌoyich macaafeenaꞌooch kooreetoommon boonoshi shuuni shuunoommona boonoshi toommooch nalleehe.

¹³ Baharo bi daggooch beeti qititinaꞌon aapphiye; qitoonaa Siꞌooloona boonoshi waan beeti qititinaꞌon aapphiyeete; aroochee bi ikkikkoyich bi shuuni shuunoommona bi toommooch nalleehe.

¹⁴ Qitoonaa Siꞌooloona qaaqqee baharooch duppeheete; ebi qaaqqee baharooch duppo guttinnee qitoone.

¹⁵ Bi shigoo kashee macaafooch kooreeꞌi daneyaani asho koniyoona qaaqqee baharooch duppehe.