Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yaaꞌoo 2 - Kafa Linguistics Project


Efesooni Kittinnee Guuphoyich Wocheeti Wocho

1 “Efesooni kittinnee guuphi maraakoyich ishichi kooribe: Shabaatte xojjeneenaꞌon bi qanne kishoona yechito, aachoochee shuuneeti shabaatte maqirajjeenaꞌo daggoona shaꞌeebeeto ishichiye:

2 Ne shuunoonaa ne aayonon, ne haaꞌiyoonoo ariibeeto taane; gondeenaꞌon haaꞌiyaache ne getonaa ebiyoommon wotta mishiraachechinaꞌo tuneyaanoon ‘Mishiraachecho noone’ ii beetinaꞌon boshaa kichaꞌa koote dojjechinaꞌo boonoshi tunoon ne danoonon ariibeeto taane.

3 Haaꞌiito neene; ta naboyicha getona duꞌeto neene; ebi bullina taahaano neene.

4 “Tunebaani neen ta ittibatemmi mooyo beetone: Ebiyee aafi ne shunoon qajjeto neene.

5 Illa amoochee ne dihito gaata gabibe; axaaxee gommoochee Yeer waan wottebe; aafi ne shuunoon tuniibe. Ebi tuno qayigaata, neech woyemmo taane; axaaxee gommoochee Yeer waan wottoon ne qayigaata, ne maqirajjoon bi xaaꞌoochee tiijjemmo taane.

6 Tunebaani ebi gaawe mooyo neech beete: Ta shixxaabeeti Niqoleenaꞌochi shuunoon newoo wotta shixxaabeeto neene.

7 “Yaafe Ayaano kittinnee guuphinaꞌoyich gettii beeton waayeebeeti waajjecho waayebe. Gondoochi giidoon kochii wochito Yeerichi yannetooch beeti kashee michi aafoochee bi maayemmoyich daaggemmo taane.


Semirineesi Kittinnee Guuphoyich Wocheeti Wocho

8 “Semirineesi kittinnee guuphi maraakoyich ishichi kooribe: Ebiyee aaf qitito, wochinnoon kashecho tuneto, Shiichoonaa Tacona ishichiye:

9 Ne toommooch shaggiti duꞌoon, ne giroonoo ariibeeto taane; tunebaani gaannecho neene. Ayihudo tuneyaanoon ‘Ayihudo noone’ ii beeti, Sheexaanoyichoo maddeebeeti guupho ne shigoon gondiyoon ariibeeto taane.

10 Ne toommooch shaggemmi iritoon shattaahine; ebiyoche, Yeeri toommooch mulloon ittoshi tooꞌiyoo iberoo bi tunoonaa tunee qayona bi bekkemmoyich, daabiloosi ittoshi daggoochee ikkikkeenaꞌon cuyee kexooch gedda ii beetone; aashire qemi duꞌoon beeggemmo ittoshine. Qitooch beddaahaa taach gibeneeton tunebe; kashee gubbichoon neech immemmo taane.

11 “Yaafe Ayaano kittinnee guuphinaꞌoyich gettii beeton waayeebeeti waajjecho waayebe. Gondoochi giidoon kochii wochito guttinnee qitoon qitaachemmone.


Phergaamooni Kittinnee Guuphoyich Wocheeti Wocho

12 “Phergaamooni kittinnee guuphi maraakoyich ishichi kooribe: Gutte baddaa gayireeti aci goraadecho ishichiye:

13 Ne beeto Sheexaanoo taateꞌi beeti xaaꞌooch bi tunoon ariibeeto taane; tunebaani ta toommooch mulloon tooꞌiyoona manjito neene. Sheexaanoo beeti ittoshi katemoochaa taach gibeneeto tuneꞌi taachon miixeti Antiphaasi wuxeehoobee yemeenoobolla, ta toommooch mulloon tooꞌiyoon nookkeyaano neene.

14 “Tunebaani neen ta ittibatemmi giisheche mooyo beete: Shahalloyich deejjeya basheeti meenon mamonaa shunee mamona Israꞌeeleenaꞌo Yeerichi gommoochee boonoshi dihemmoyich tuniiya taatoo Balaaqich kocciti Balaamichi doyoon dabbiibeeti ikkikke asheenaꞌo ne daggooch beetinaꞌone.

15 Ebiyoommon wotta Niqoleenaꞌochi doyoon dabbiibeeti asheenaꞌo ne daggooch beetinaꞌone.

16 Illa axaaxee gommoochee Yeer waan wottebe! Ebi tuno qayigaata, kaateree neech woyemmo taane; waaree ta kookkoochee kechiibeeti goraadoona boonoshin kochemmo taane.

17 “Yaafe Ayaano kittinnee guuphinaꞌoyich gettii beeton waayeebeeti waajjecho waayebe. Gondoochi giidoon kochii wochitoyich aacheeti mannoochee immemmo taane; wotta ebi aroon deqqitoyee damba asho koniyoona ariyaani andire shigo kooreeti nacce xaqqoonoo immemmo taane.


Tiyaxirooni Kittinnee Guuphoyich Wocheeti Wocho

18 “Tiyaxirooni kittinnee guuphi maraakoyich ishichi kooribe: Qaaqqee aaxxoon shaahiibeeti aafecho, qaaqqoona wociitaa shuuneeti gooshoochoommon wacciibeeti baatecho, Yeerichi Bushoo ishichiye:

19 Ne shuunoon, ne shunoon, ta toommooch mulloon ne tooꞌiyoon, taach ne maddoon, ne haaꞌiyoon, aafichoyee beshoon andi ne shuunoo woddoonoo ariibeeto taane.

20 “Tunebaani neen ta ittibatemmi mooyo beetone: Ebiyoo ta guuninaꞌoyich shunee mamonaa shahalloyich deejjeya basheeti meenon mamonon dojjaa beetinaa muriccii beetina, ‘Keemechi taane’ ii beeti ure Elizabeelin cikkii qajjeto neene.

21 Ebi ure bi shunee mamon qayiree Yeer waan bi wottemmoyich haaꞌiito taane; tunebaani aree ebin qaawaaneene.

22 Ebich beerooch maajjii (maayii) beeti biiyee toommooch biin duppemmo taane; biinna tookkii shunoon maa beetinaꞌoo ebi bi shuunoon qajjiꞌi Yeer waan wotto boonoshi qayigaata, qaaꞌi iritee toommooch boonoshin duppemmo taane.

23 Bi bushiisheenaꞌonoo wuxi ciichemmo taane. Arooba ashi mulleexi gaboonaa qaatoonon maqqaa ariibeeto ta tunoon kittinnee guuphinaꞌo bulli ariyemminaꞌone; ittoshi ikkikkoyich ittoshi shuuni shuunoommona qoccemmo taane.

24-25 Tunebaani ebi gonde doyoon dabbaani, ‘Sheexaanee maacee mooyo’ gettee beetonoo doyaani, Tiyaxiroon beeti ittoshi bullich ishichiyo: ‘Wottaa ta waammi wottoon ittoshich beeton manjiiree quyebote’ getoyee damba bare magge shaagoon ittoshi toommooch minjaache.

26-27 “Gondoochi giidoon kochii wochitonaa yemeenee ciirooch beddaahaa ta daaggoon ceechii shuunetonon, ta Nihoo taan taatiyoommon aageteenaꞌo toommooch taatiyemmo taane. Biyoo xuuree gumboona boonoshin hajjemmone; nuuqqee qiicoochoommon boonoshin buriccemmone;

28 biichoo haree xojjenoon immemmo taane.

29 Yaafe Ayaano kittinnee guuphinaꞌoyich gettii beeton waayeebeeti waajjecho waayebe.

SIM International, 2020.

ကြှနျုပျတို့နောကျလိုကျပါ:



ကြော်ငြာတွေ