Yaaꞌoo 18 - Kafa Linguistics Project

Baablooni Dihoo

¹ Ebiyee gubb, ooge hakkechi bare maraakoo shimaayoochee kindii beetaa beeggeho; bi oogee yiiroochee tiyitona showee toommooch bekko tunehe.

² Oogeti qaaroona cookiibee, “Ooge katemee Baablooni dihitiyoche; dihitiyoche! Yinneenaꞌo bulli qeyi xaaꞌee tunetiyoche! Eeꞌeenaꞌonaa tiyaariitinaꞌona tuneti kafeenaꞌo [cooxinaꞌoo] kuppee xaaꞌee tunetiyoche!

³ Aageteenaꞌo bulli mashiibeeti bi shunee mami woyinee uyoon uchitinaꞌone; showeexi taateenaꞌo biinna tookkii shunoon maatinaꞌone; showeexi giixechinaꞌo mashaamiti bi beemoochee tiyitona gaanneheete” iye.

⁴ Aroochee daakkiꞌi ishichiibeeti bare qaaroon shimaayoochee waayeho: “Ta macceenaꞌote! Bi axaaxee daggooch ittoshi bacceyaachemmoyich, bi toommooch kindemmi naxoo ittoshin bi xaaqqaachemmoyich, bi waanee bari keyote!

⁵ Bi axaaxoo tummeeꞌi shimaayooch bedditone; Yeeriyoo bi xuꞌoon gabitone.

⁶ Bareenaꞌo toommooch gondoon bi shuunetoommon, bi toommooch aroommon gaacote. Bi tuniiti gutte kishoon tuniiree minjibote. Bareenaꞌo uchemmoyich bi qanniiti shayi uyee xoofooch bi shachemmoyich, gutte kishoon wuurii bacciree biich uchibote.

⁷ Bi qelloon bi oogiitoommonaa mashaamiti beemon bi beetoommonon xuuxoonaa muushenoonon bi toommooch shakkiibote. Bi mulloona ‘Taatee tunaꞌa qeenooch koteti taane; xuumee toonee taane; ciroona muusheneyaache’ itine.

⁸ Ebich ikke areddoon qitoo, muusheno, shaacoo tuneti naxeenaꞌo, bi toommooch shaggemminaꞌone; bi toommoochoo nallemmi Doono Yeeri giidecho bi tunetoyich, qaaqqoo biin maayemmine.

⁹ “Biinna tookkii shunoon maati, mashaamiti bi beemoochee tookkii qoodeeti showeexi taateenaꞌo bi micaa kechiibeeti cufoon beegiree, ‘Woowo!’ geti cookemminaꞌone; eefeshoo gettemminaꞌone.

¹⁰ Bi xuuxoon beegi shatiree wohooch neexeechi, ‘Hini ooge giidechi katemee Baabloone! Diqqoona Yeerichi nalloo ne toommooch shaggitoche! Neech woowo!’ getibee cookemminaꞌone.

¹¹ “Boonoshi markaboona kiciꞌi boonoshi deebiibeeti qiicoon ebiyee bekk kememmo aallo bi tunetoyich, showeexi giixechinaꞌo eefemminaꞌone; muusheneshoo gettemminaꞌone.

¹² Boonoshi deebiibeeti qiiceenaꞌo, aachoo, birewoo, aaxxe xaqqeenaꞌo, inqeenaꞌo, muttee tuppoochee cicii yokketaa shippeti taho, damere taho, haaro getteebeeti nire qoreddoo, maddoo, cinnechi mixo bulli, dangichi gashoochee shuuneeti qiico bulli, oogeti aaxxe mixoochee shuuneeti qiico bulli, gooshoochee, xuuroochee, mallet gaawe xaqqoochee shuuneeti qiico bulli,

¹³ qarefoo, qimaamo, ixaano, cinnechi huuto, hareboo, woyinee uyo, zayito, qacini buddino, teepphoo, miimo, bago, hareshoo, gaari, guuninaꞌonaa ginoona kecceti asheenaꞌona, eboshine.

¹⁴ “Giixechinaꞌo hini are katemeyich ‘Ne qaatiti gaawe mooyo bulli ne waanee aalletone; mashaamiti ne beemonaa macecikkiti gaawe mooyo bullina ne waanee aalletinaꞌone; ebiyee bekk ciroona daneyaachemminaꞌone’ gettemminaꞌone.

^15-17 Ebin shaahe mooyon giixeebee gaannetinaꞌo eefi muushenebee, ‘Hini ooge katemeene, neech woowo, neech woowo! Muttee tuppoochee cicii yokketaa shippeti tahoon, damere tahoonaa maddoonon tahaabee echetine; aachoona, aaxxe xaqqeenaꞌona, inqeenaꞌonoo shashaabee echetine; ebi shaahe beshiti gaanno diqqoona bekkech aalletoche!’ getibee, bi toommooch shaggitoommo boonoshi toommooch bi shagaachemmoyich shatiree wohooch neexemminaꞌone. “Markabee ukkireenaꞌo bulli, markaboona amee xaaꞌoochona hammii beetinaꞌo bulli, markabee daggeexi shuunechinaꞌo, boonoshi beemon baharee toommooch tuniitinaꞌo bulli wohooch neexeechi,

¹⁸ bi micaa kechiibeeti cufoon beegiree, ‘Hini katemeen shaahe ooge katemoo cir aalloone’ geti cookemminaꞌone.

¹⁹ Buttoon boonoshi shimbooch shahiree eefi muushenebee ishichi cookemminaꞌone: ‘Giixoyich baharoon markaboona kimmii beetinaꞌo bullin bi gaannoona gaanniiti hini ooge katemeech woowo! Diqqoona bekkech aallehane!’ geti cookemminaꞌone” iye.

²⁰ Shimaayooch beetinaꞌote, emiribote! Yaafeenaꞌote, mishiraachechinaꞌote, keemechinaꞌote, ittoshi toommooch bi tuniiti mooyo bullichi gaacoon Yeeri bi toommooch bi nallitoyich emiribote.

²¹ Arooba ikke giidechi maraakoo ooge yiikke xaqqoommi xaqqoon tiijjiꞌi baharee daggooch ishichiibee duppiye: “Ooge katemee Baabloonin Yeeri ebiyoommon oogeti giidoona dufi aalliyemmone; ebiyee bekk ciroona daneyaachemmine.

²² Ximboon yexxechinaꞌonaa shoddee qiicee ariyechinaꞌonochi qaaro, shametoonaa tiroonochi huggi qaaro, ebiyee bekk ciroona ne waanee waayeyaachemmone; kishee shuunee ariyecho ebiyee bekk ciroona ne waanee daneyaachemmone; maayoon yiikkeebeeti yiikke xaqqee qaaro ebiyee bekk ciroona ne waanee waayeyaachemmone.

²³ Bekkiibeeti ceechoo ebiyee bekk ne daggooch ciroona aaxxe bekkeyaachemmone; woꞌee kenoochi qaaroonaa woꞌechi qaaroona ebiyee bekk ciroona ne waanee waayeyaachemmone; ebi tuneto, ne giixechinaꞌo showeexi ogoogeenaꞌo boonoshi tunetoyichiye; iicaabee (qaaxaabee) aageteenaꞌo bullin ne muricciitoyichiye” iye.

²⁴ Are Baablooni katemee daggoochoo keemechinaꞌonaa yaafeenaꞌonochi damoo, showoochaanoo guuraa qititi asheenaꞌo bullichi damoo danetone.