Yaaꞌoo 16 - Kafa Linguistics Project

Yeerichi Kaaree Shiixxoo Ceenniti Shabaatte Xoofeenaꞌo

¹ Aroyee gubb shabaatte maraakeenaꞌoyich “Hamiree Yeerichi kaaree shiixxoo ceenniti shabaatte xoofeenaꞌon showee toommooch ukkibote” immi ooge qaaro yaafee kexoochaa getaa waayeho.

² Batti batti maraakoo hammiꞌi bi yechiti xoofoon showooch ukkiye; cooxochi malletoo boonoshich geddeti, biin shaahiitaa shuuneetoyich goyinneebeeti asheenaꞌochi achooch shachirii, biichiibeeti mayo tunehe.

³ Guttinnee maraakoo bi yechiti xoofoon baharee toommooch ukkiye; baharee aacoo qititi ashi damoommon tunehe; baharee daggooch beeti kashechi halleenaꞌo bulli qitii ciireheete.

⁴ Keejjinnee maraakoo bi yechiti xoofoon aacinaꞌonaa aachi xuupheenaꞌonochi toommooch ukkiye; eboshi bulliyoo damoon tuneheete.

⁵ Aacinaꞌon quyeebeeti maraakoo: “Aafoo beeti, andoo beeti Yaafoocho! Eechaꞌa ne nallitoyich cadiqo neene.

⁶ Yaafeenaꞌonaa keemechinaꞌonochi damoon ukkitinaꞌone; ebich ne wotta damoon boonoshich uchitine; ebiyoo boonoshich tuno tatoone” ii bi getaa waayeho.

⁷ Deejjee gudoochaa “Eeha, iberoone; Beshe Hakkechi Nuggishoo Doono Yeero, ne nalliti nalloo iberoonaa cadiqoonane” immi qaaroon waayeho.

⁸ Awuddinnee maraakoo bi yechiti xoofoon aabe toommooch ukkiye; aabeyoo qaaqqoo gaamoommon gaamiree ashoon bi michemmoyich daaggeehe.

⁹ Asheenaꞌo oogeti gaamoona micciyeete; asheenaꞌoo ebi naxeenaꞌo toommooch hakkoo biich beeti Yeerichi shigoon naaggiyeete; oogee yiirecho bi tunetoyich biin galleteya axaaxee gommoochee bi waan wotteyaaneenaꞌone.

¹⁰ Uuchinnee maraakoo bi yechiti xoofoon cooxochi taatee qeechi toommooch ukkiye; ebi cooxochi taatittinee showoo manderehe; wotta asheenaꞌo oogeton boonoshi shooddetoyich boonoshi heciyoon shaaccii cokkeheete.

¹¹ Boonoshi shooddetoyich, boonoshi acheexi mayo biijjii shachiritoyich shimaajji Nuggishoon naaggiyeetalli boonoshi gonde shunoon qajjii Yeer waan wotteyaaneenaꞌone.

¹² Shirittinnee maraakoo bi yechiti xoofoon ooge aaco Efiraaxisi toommooch ukkiye; aabi-keyo waanee woyemmi taateenaꞌoyich gommo qannemmoyich aaco tahiye.

¹³ Dareboochi kookkoonaa cooxochi kookkoonoochee, koote keemechochi kookkoocheenoo woqqeqqeenaꞌon shaahiibeeti keejje yinneenaꞌo kechii beetaa beeggeho.

¹⁴ Eboshiyoo malletoon bekkiibeeti yinneenaꞌone; hini are yinneenaꞌo showee toommeexi taateenaꞌo bulli waan kechii beetinaꞌone; boonoshi kechiibeetoo, Beshe Hakkechi Yeerichi nallee ooge aabooba tunemmi ginee koyee xaaꞌooch boonoshin kicii deeboyichiye.

¹⁵ Doono Yesuusi ishichiye: “Ebiyoche, gaayoochoommon diqqoona woyemmo taane; shokkaachoo tuneree bi hamaachemmoyich, shokkaachoo bi beetaa asho biin beegaa bi yeelleyaachemmoyich, qaalliꞌi bi tahoon quyeebeeti asho diireetone” iye.

¹⁶ Hini are yinneenaꞌo showee toommeexi taateenaꞌon Hibiree noonoona Arimagedooni getteebeeti xaaꞌooch kiciyeete.

¹⁷ Shabaattinnee maraakoo bi yechiti xoofoon yongee toommooch ukkiye; yaafee kechi maac beeti taatee qeenoochaa “Mooyo bulli ceennite” immi ooge qaaro waayeehe.

¹⁸ Xeeyee phaqqoo, ooge qaaroonaa xeeyee qaaroona tunehe; oogeti showee qewo tunehe. Asho halleetoochee tiijjiꞌi ebiich beddaahaa ebiyoommi ooge showee qewo tunee ariyaanoone; hini bulliyee beshe shattiiti showee qewoone.

¹⁹ Arooba ooge katemee keejj beera gaahaa qoodeehan; wotta aageteenaꞌochi katemeenaꞌo bulli dihiyeete. Yeeri ebi ooge katemee Baablooni shuuneti gondoon gabiye; asho mashiibeeti uyoon bi uyoommon ooge bi kaaree shiixxoo ceenniti xoofoon Baablooni katemeech uchiye.

²⁰ Buure showeenaꞌo aalleheete; guudinaꞌoo wotta aalleheete.

²¹ Ikke baderoo baach aabbaa uuche kiilo giraamo tuneti ogooge baderoo asheenaꞌo toommooch shimaayoochee kindiye; ebi shaahe shattiiti ooge baderee naxoon boonoshi toommooch bi kindiitoyich, asheenaꞌo Yeerin naaggiyeete.