Yaaꞌoo 15 - Kafa Linguistics Project

Shabaatte Naxeenaꞌon Yechiti Maraakeenaꞌo

¹ Wotta bare worganikkiti ooge malletoon shimaayooch beeggeho. Yeerichi kaaree shiixxoo eboshina ceennemmi ciireexi shabaatte naxeenaꞌon yechiti shabaatte maraakeenaꞌo bekkeheete.

² Arooba qaaqqoona bacceeti burciqee baharoon shaahii beeton beeggeho; wotta cooxonaa ebi are cooxon shaahiitaa shuuneetonon, bi shigee haddoonoo kochii wochitinaꞌo Yeer waanee boonoshi deqqiti ooge ximboon yechiꞌi burciqee baharee toommooch boonoshi neexee beetaa beeggeho.

³ Yeerichi maddechi Muusichi shoddoonaa Bagoochi shoddoonon ishichii shoddeheete: “Beshe Hakkechi Nuggishoo Doono Yeero! Ne shuunoo am shaahe worganikkiti ooge shuunoone! Aageteenaꞌochi Taatoocho! Ne gommo am shaahe cadiqe, ibere gommone!

⁴ Doonocho, neen shataanoonaa ne shigoon oogiyaanoona konine? Ne ikkeeto baach yaafoo neene; cadiqe ne shuunoo bullich bekketone; ebich aageteenaꞌo bulli waaree neech goyinnemminaꞌone” iyeete.

⁵ Aroyee gubb Yeerichi miixee duukkaanoo tuneti yaafee kexo shimaajjaa qechee beetaa beeggeho.

⁶ Shabaatte naxeenaꞌon yechiti shabaatte maraakeenaꞌo yaafee kexoochee kechiyeete; boonoshiyoo muttee tuppoochee shippeti, wacciibeeti xalle tahoon taheꞌi, boonoshi getoon aachoochee shuuneeti cuyoona cuyetinaꞌone.

⁷ Kashechi awudde halleenaꞌo daggoochee ikkoo bulli yemeenoon beeyechi Yeerichi kaaree shiixxoo ceenniti shabaatte aachee xoofeenaꞌon shabaatte maraakeenaꞌoyich immiye.

⁸ Yeerichi oogee yiiroonaa bi giidoonoochee tiyitona cufoo yaafe kexooch ceenniye; shabaatte maraakeenaꞌo boonoshi ukkemmi shabaatte naxeenaꞌo ciyimmi wottoon koniyoona yaafee kexooch gimon hakkaanoone.