Yaaꞌoo 14 - Kafa Linguistics Project

Bagoonaa Biishee Bi Wodiiti Asheenaꞌona

¹ Aroochee ciinneho; ebiyoche Bago Tsiyooni guudooch neexeꞌi beete; bi shigoonaa bi Nihoochi shigoona boonoshi barooch kooreeti balli aabbaa awudde hume asheenaꞌo biinna tookkii beetinaꞌone.

² Shimaayoochee ooge aachi haanaatee qaaroommi qaaroonaa giidechi xeeyee qaaroommi qaaroonon waayeho; ximboon yexxechinaꞌo ooge ximboon boonoshi yexaa qaaddiibeeti qaaroommi qaaroon waayeho.

³ Taatee qeechi aafoochaa, kashechi awudde halleenaꞌonaa geeneenaꞌonochi aafoochaanoo andire shoddoon shoddeheete. Hini showooch beeti asheenaꞌo daggoochee Yeeri biishee wodiiti ebi balli aabbaa awudde hume asheenaꞌoyee beshetaa, koniyoona hini shoddoon doyiꞌi shoddoon hakkaanoone.

⁴ Eboshiyoo shaagaaneenaꞌone; maacheena tookkiinoo daneyaaneenaꞌone; ebich eeꞌaalleenaꞌone. Eboshiyoo Bago hammiibeeti xaaꞌoo bulliich biin dabbii beetinaꞌone; asheenaꞌo daggoochee biisheetinaꞌone; Yeerinaa Bagoonoyich icheti cilleenaꞌone.

⁵ Kootoon koottii ariyaaneenaꞌone; ikke bachaalleenaꞌone.

Keejje Maraakeenaꞌo Gettiti Wocho

⁶ Ebiyee gubb, showee toommooch beetinaꞌoyich, aagetoo bullich, ashi yoodo bullich, baribare noonoona yibbaateebeeti asheenaꞌo bullich, ashi yaroo bullich bi gettemmi, bulli yemeenooch beddaahaa tunemmi mishiraachee qaaroon yechiti bare maraakoo shimaayoona yoobbii bi beetaa beeggeho.

⁷ Biyoo oogeti qaaroona “Yeeri nallemmi aabo shaggitone; ebich Yeerin shatote; biich oogoon imbote; shimaayoonaa showoonon, baharoonoo, aachi xuupheenaꞌonoo hallitoyich goyinnebote” iye.

⁸ Aree hillooch bare guttinnee maraakoo dabbiꞌi, “Aageteenaꞌo bulli mashiibeeti bi shunee mami woyinee uyoon uchemmoyich tuniiti ooge katemee Baablooni dihitiyoche; dihitiyoche!” iꞌi cookiye.

⁹ Bare keejjinnee maraakoo wotta dabbiꞌi oogeti qaaroona ishichiye: “Cooxonaa cooxon shaahiitaa shuuneetonoyich goyinnemmi, bi barooch woyee bi kishooch ebi cooxochi malletoo geddeyemmi asho koniyoona bi beegaata,

¹⁰ asho mashiibeeti uyoon bi uyoommon Yeerichi kaaree shiixxee xoofoochee uchemmone. Ebi Yeerichi kaaree shiixxee xoofoo aqqayoo aalli shayone; yaafe maraakeenaꞌonaa Bagoonochi aafoochaa qaaqqoonaa micciibeeti waageroona shooddeyemmone.

¹¹ Aroochaa boonoshi shooddeebeeti qaaqqee cufoo bulli yemeenoon kuxaanoon kechemmone; cooxonaa cooxon shaahiitaa shuuneetonoyich goyinneti, bi shigee malletoon geddeeti asho koniyoona xumoonaa areddoonon shooddeyoochee kasheyaachemmone” iye.

¹² Yeerichi getoyich deꞌa ii beeti, gibeneyoona Yesuusin dabbiibeeti yaafeenaꞌochi haaꞌiyoo bi qaaweebeeto ebiyoobane.

¹³ Aroochee “Ebiyee damba Doonona tuneꞌi qitii beetinaꞌo diireetinaꞌone, getiree kooribe” immi qaaroon shimaayoochee waayeho. Yeerichi Ayaano wochiꞌi, “Iberoone; boonoshi shuuneti shuunoo gibeneetinaꞌo boonoshi tunoon miixee bi beetoyich, boonoshi maraatoochee kashemminaꞌone” iye.

Ciireexi Yeerichi Nalloo

¹⁴ Aroochee beeggeho; ebiyoche nacce qubo beete; qubee toommoochoo ashi bushoon shaahiibeeto kotetone; bi qellooch aachee gubbichoon uketone; bi kishoonoo aci magaadoon yechitone.

¹⁵ Bare maraakoo shimaajji taatee xaaꞌooch beeti yaafee kexoochee kechiꞌi qubee toommooch kotetoyich, “Maayi qeci gooroo shaggitone; showeexi maayo qecceya beddiꞌi shuuqqitone; ebich ne magaadoon tiijjiree qece” iꞌi oogeti qaaroona cookiye.

¹⁶ Qubee toommooch kotetoo bi kisheexi magaadoon showooch daachiihe; showeexi shuuqqiti maayo bulliyoo qechehe.

¹⁷ Wotta bi kishooch aci magaadoon yechiti bare maraakoo shimaajji taatee xaaꞌooch beeti yaafee kexoochee kechiye.

¹⁸ Qaaqqoon quyeebeeti bare maraakoo deejjee gudoochee kechiꞌi, aci magaadoon yechiti maraakoyich “Woyinee qombee aafee yuunjeenaꞌo gaangii kachitinaꞌone; ebich aci ne magaadoon showooch daachiiree woyinee qombee aafeenaꞌon kuxe” iꞌi oogeti qaaroona ceeggiye.

¹⁹ Maraakoo bi magaadoon showooch daachiihe; showooch beeti woyinee aafoonoo kuxxiꞌi, Yeerichi kaaree shiixxee ooge oppooch duppiye.

²⁰ Katemoyee maach beeti, woyinee aafo koteebeeti oppoochaa neechehe; ebi oppoochee deshee damba hareshee lugaamooch bede, bi gidoo keejje balle kiiloo meetirooch bede damoo kechii ufehe.