Yaaꞌoo 13 - Kafa Linguistics Project

Gutte Cooxinaꞌo

¹ Arooba ikke cooxo baharee aacoochee bi kechii beetaa beeggeho. Aashire qaroonaa shabaatte qelloona biich beetone; ebi qareenaꞌo toommooch aashire gubbichoo beetone; ebi qello bi ikkikkooch Yeerin naaggiibeeti shigo kooreetone.

² Ebi ta beeggeti cooxo maahoon shaahoone; bi baatoo diibee baatoommo, bi kookkoo daaheree kookkoommone; dareboo bi giidoonaa bi taatee qeenonon, ooge hakkoonoo biich immiye.

³ Are cooxochi qelleexi ikkoo yexxee qitiya beddiꞌi mayeton beeggeho; tunebaani qitiya beddiꞌi mayeto wodiye. Showooch beeti asheenaꞌo bulli worganeꞌi ebi cooxon dabbiyeete.

⁴ Dareboo cooxoyich hakkoon bi immitoyich, asheenaꞌo dareboyich goyinneheete; cooxoyichoo wotta “Hini cooxona tatemmo aabine? Biinna koyoon hakkemmo, konine?” iibee biich goyinneheete.

⁵ Geecee mooyonaa naagee qaaroonon bi gettemmi noonoo cooxoyich ichehe; aabbaa gutte agenoon hakkecho tuneree bi shuunemmoyich biich daaggeehe.

⁶ Yeerinaa bi shigoonon, bi qeyi xaaꞌoonoo, shimaajji taatee xaaꞌooch beetinaꞌonoo naagooch giyiye.

⁷ Yaafeenaꞌona bi koyemmoyich, koyeshoo bi wochemmoyich biich daaggeehe; ashi yoodoonaa ashi yaroona, baribare noonoon yibbaateebeeti asheenaꞌonaa aageteenaꞌo bullinochi toommooch hakkoo biich ichehe.

⁸ Showoonaa shimaayoona halleyaan beetaa guureeti Bagoochi kashee macaafooch boonoshi shigo kooreyaani, showee toommooch beeti asheenaꞌo bulli biich goyinnemminaꞌone.

⁹ Waayeebeeti waajjecho bi beegaata, waayebe.

¹⁰ Kecee hamoyich daaggeeto koniyoona bi beegaata, kecceeꞌi hamo echeyaani mooyone; goraadoona bi qitemmoyich daaggeeto koniyoona bi beegaata, goraadoona qitemmone. Yaafeenaꞌochi gibeneyoonaa haaꞌiyoona bi qaaweebeeto ebiyoobane.

¹¹ Aroyee gubb bare cooxo showoochee bi kechii beetaa beeggeho. Bagee qaroommi gutte qarechone; dareboochoommonoo yibbaatee beetone.

¹² Aafi cooxo immiti hakkoona bulli mooyon bi aafooch tunii beetone. Qitiya beddiichii mayee woditi aafi cooxoyich, showee toommooch beetinaꞌo bulli goyinnemmoyich tuniyemmone.

¹³ Qaaqqoonolla shimaayoochee showooch asho bulli aafooch bi kindiimmi wottoon ogooge malleteenaꞌon bekkii beetone.

¹⁴ Aafi cooxo aafooch bi bekkiyemmoyich daaggeeti malletoona showee toommeexi asheenaꞌo bullin muricciihe; goraadoona bi mayetaanona, batt kashoona beeti cooxoyich bi shahalloon boonoshi shuunemmoyich showee toommooch beeti asheenaꞌoyich gettiye.

¹⁵ Wotta aafi cooxochi shahalloyich kashee hiinnoon bi immemmoyich hakkoo biich ichehe; ebiyoo ebi cooxochi shaahallo bi yibbaatemmoyich, wotta biich goyinneyaaneenaꞌo wuxeyemmoyich bi tuniyemmoyichiye.

¹⁶ Asheenaꞌo bullich, gishiisheenaꞌonaa ogoogeenaꞌonoyich, gaannechinaꞌonaa girechinaꞌonoyich, xalle yareenaꞌonaa guuchi yareenaꞌonoyich malletoo boonoshi qanne kishooch woyee boonoshi barooch giddoona geddiye.

¹⁷ Cooxochi shigo woyee bi shigee haddoo beeti ebi malletoo biich aalli asho koniyoona kemon woyee kemoon bi hakkaachemmoyich bajjiye.

¹⁸ Shalligoo bi qaawiibeeto ebiichaane: Ebi haddoo ashi haddoo bi tunetoyich, shalligecho bi beegaata, cooxochi haddoo ama geto gaata haddiree ariibe; ebi haddoo shiritte ballaa shichaa shirittoone.