Yaaꞌoo 12 - Kafa Linguistics Project

Ureenaa Dareboonochi Mooyo

¹ Arooba oogeton worganikkiti mooyo shimaayooch bekkehe; aabeen taheti, ageneen bi baatee dechiich geddeti, aaraa gutte xojjenechi gubbichoon bi qellooch uketi ikke ure beehan.

² Biyoo yeqqefechine; shiya maaxoo biin maataa iriteeꞌa bunnahan.

³ Bare worganikkiti mooyo shimaayooch bekkehe; shabaatte qelloonaa aashire qaroona, bi qellee haddoonoo shabaatte gubbichoo beeti ooge ceelle dareboo beehe.

⁴ Bi ceeroona shimaajji xojjeneenaꞌo daggoochee keejje beereexi ikke beeroon geechii showooch kindiihe. Hini are dareboo ure bi shiyigaata shiijjemmi bushoon maaya iꞌi bi aafooch neexehe.

⁵ Aageteenaꞌo bullin xuuree gumboona hajjemmi anaami bushoon shiyahan; bushoonoo Yeerinaa Yeerichi taatee qeenona beetooch daammiyeete.

⁶ Ureyoo ikke humaa gutte ballaa shiche qemon aroochaa boonoshi shiimemmoyich, Yeeri qanniiti xaaꞌoo barahooch aashaa hammahan.

⁷ Shimaajji taatee xaaꞌooch ginee koyo tunehe; Mikaꞌeelinaa bi yeshi maraakeenaꞌona dareboonaa bi hilleexi bare maraakeenaꞌona koyeheete.

⁸ Dareboon kochii wochiyeete; aroyee gubb shimaajji taatee xaaꞌooch dareboonaa bi hilleexi maraakeenaꞌonoyich xaaꞌoo daneyaanoone.

⁹ Alemooch beeti asheenaꞌo bullin muricciibeeti daabiloosi woyee Sheexaanoo getteeti ooge dareboo, biyoo wonnee dingero, showee toommooch duppehe; bi hilleexi maraakkeenaꞌoo biinna tookkii duppeheete.

¹⁰ Oogeti qaaro shimaajji taatee xaaꞌoochaa ishichii beeton waayeho: “And no Nuggishoo bi asheenaꞌon wodiitone; ooge bi giidoon bekkiibee taatemmone; bi kaacciti Kiristoosiyoo tiyi bullin hajjemmone; no Nuggishoo aafoochaa areddoonaa xumoonon no maneenaꞌon taggeebeeti taggecho shimaayoochee duppetone.

¹¹ Boonoshiyoo deejjeeti Bagoochi damoonaa boonoshi miixeti Yeerichi qaaree naboona biin kochii wochiyeete; qitooch beddaahaanona boonoshi kashoon aaxxiyaaneenaꞌone.

¹² Ebich shimaayoonaa bi daggoonooch beetinaꞌote, emiribote! Showoonaa baharoonooch beetinaꞌote, ittoshich woowo! Daabiloosi giisheche aabo baach biich echeto tunoon ariiꞌi oogeti kaaroona ittoshi waan kinditone” iye.

¹³ Dareboo showee toommooch bi duppoon ariiꞌi, anaami bushoon shiyeti ureen yookkiye.

¹⁴ Dareboo waanee wohiree keejje nattaa qaton barahooch shiimetaa bi beeyemmi xaaꞌooch yoobi bi hammemmi gutte ogooge booyee qoshoo ureyich ichehe.

¹⁵ Dareboo ureen aacona maanjiya qaawiꞌi ooge woce aacoommi aacon bi kookkoochee ureechi hillooch kuufiye.

¹⁶ Showee ureen gaachahan; bi kookkoon gaxxaꞌa dareboo bi kookkoochee kuufiti aacon uchahan.

¹⁷ Arooba dareboo ureena ippeꞌi, Yeerichi getoyich deꞌa ii beeti, Yesuusi miixeti iberoon gibenoona quyeebeeti ureechi yaroochee echetinaꞌon kocha hammiye;

¹⁸ hammiꞌi baharee gashooch beeti qacooch neexehe.