Yaaꞌoo 11 - Kafa Linguistics Project

Yeeri Wochee Deejjiti Gutte Miixeenaꞌo

¹ Genje gumboon shaahiibeeti qellayee gumbo taach ichehe. Taachoo ishicheehe: “Yeerichi yaafee kexonaa deejjee gudoonon qellayibe; arooch goyinnee beetinaꞌonoo haddibe.

² Yaafee kexoyee maach beeti addibaaboo Aageteenaꞌoyich icheto bi tunetoyich qaye; qellayiyaahine. Boonoshiyoo aabbaa gutte agenoon yaafe katemeen neexi hajjemminaꞌone.

³ Gutte ta miixeenaꞌon woche deejjemmo taane; boonoshiyoo muushenee tahoon taheree ebi are ikke humaa gutte ballaa shiche qemon keemoon keemmemminaꞌone” iye.

⁴ Ebi gutte miixeenaꞌo showoo bullichi Doono tuneti Yeeri aafooch neexeebeeti gutte zayitee mixinaꞌonaa gutte maqirajjeenaꞌonane.

⁵ Asho koniyoona boonoshi toommooch gondoon halliya bi qaawigaata, boonoshi kookkoochee qaaqqoo kechemmone; boonoshi shixechinaꞌonoo michi aalliyemmone. Boonoshi toommooch gondoon halliya qaawiibeeto bulli, ebiyoommi gommona qitoo biich echeyaanoone.

⁶ Eboshi keemoon boonoshi keemmiibeeti aabooba, “Amiyo dihaaye” iꞌi shimaayoon hicoyich hakkoo boonoshich beetone; boonoshi shunnitoommon boonoshi qaawimmi areddoo bullin aacon damoo tuniyoyich, showee toommooch beetinaꞌonoo naxo bullina shooddiyoyich hakkoo boonoshich beetone.

⁷ Miixee boonoshi ciichitoyee gubb, oppee hoonoochee kechemmi cooxo boonoshina koyemmone; boonoshin koyi wochemmone; wuxishoo gettemmone.

⁸ Boonoshi dubenoo boonoshi Doono yooddeti ooge katemee daggeexi gommooch qeyemmone; ebi are katemee geto, ayaanee yibbaatoochaa, Sodoomi woyee Gibitsi getteetine.

⁹ Ashi yaroochee, yoodoochee, baribare noonoona yibbaateebeeti asheenaꞌonaa aageteenaꞌonoochee tuneti asheenaꞌo keejje qemonaa qatonon ebi boonoshi dubenoon ciinnemminaꞌone; are dubenoo bi duukkeyemmoyich daaggaachemminaꞌone.

¹⁰ Ebi gutte keemechinaꞌo showee toommooch beeti asheenaꞌon boonoshi xuuxii beetoyich, showee toommooch beeti asheenaꞌo ebi keemechinaꞌo qititoyich, oogeton emiremminaꞌone; gifiroon gedi maabee, boonoshinaa boonoshina ikkoo baroyich emiree wojjoon daachiyemmone.

¹¹ Keejje qemonaa qatonoyee gubb Yeer waanee tuneti kashee hiinno ebi keemechinaꞌochi dubenooch giyiye; kashechon tuneꞌi boonoshi hajjee baatoona neexeheete; boonoshinoo beeggitinaꞌo keqqoona qitiyeete.

¹² Arooba hini are keemechinaꞌo “Hach keyote” immi ooge qaaroon shimaayoochee waayeheete; boonoshi shixechinaꞌo ciinnii beetaa, quboona shimaajj kechiyeete.

¹³ Bekkech oogeti showee qewo tunehe; are katemeexi kexinaꞌo daggoochee aashiroochee ikke beeroo dihiye; ebi showee qewoona shabaatte hume asheenaꞌo qitiyeete; echetinaꞌoo keqqoona qeweheete; shimaajj beeti Yeerin oogiiheete.

¹⁴ Guttinnee shattiiti mooyo beshetone; illa ebiyee gubb, shattii giiriibeeti keejjinnee mooyo kaate woyemmone.

Shabaattinnee Maraakoo Tiroon Hugo

¹⁵ Shabaattinnee maraakoo tiroon huggiye; shimaayoochaa “Showee toommeexi taatittino bulli no Doono Yeericho, bi kaacciti Kiristoosicho tunetone; bulli yemeenoon taatemmone” ii beeti ogooge qaareenaꞌon waayeho.

¹⁶ Yeeri aafooch boonoshi qeeni qeenooch koteti hiyaa awudde geeneenaꞌo baroona guufeꞌi Yeerich goyinneebee,

¹⁷ ishichiyeete: “And beeti, aafoo beeti, Beshe Hakkechi Nuggishoo Doono Yeero! Ooge ne giidoon yechaꞌa ne taatetoyich neen galletehone.

¹⁸ Aageteenaꞌoo oogichii kaareheete; tunebaani ne kaaroo kindiye; qititinaꞌo toommooch ne nallemmi yemeeno shaggitone; neech maddeebeeti ne keemechinaꞌonaa ne shigoon oogiibeeti yaafeenaꞌonoyich, gishiisheenaꞌonaa ogoogeenaꞌonoyich, boonoshi shuunee gatiyoon ne qoccemmi, showoon aalliyechinaꞌon ne aalliyemmi, yemeeno shaggitone” iyeete.

¹⁹ Shimaajj beeti Yeerichi yaafee kexo qecheehe; Yeerichi wogee taabootoo ebi yaafe bi kexoochaa bekkehe; xeeyee phaqqoo, ooge qaaroonaa xeeyee qaaroona, showee qewoonaa giidechi baderoona tunehe.