Yaaꞌoo 10 - Kafa Linguistics Project

Gaxxeeti Giisheche Macaafeen Yechiti Maraakoo

¹ Aroyee gubb bare giidechi maraakoo quboon taheꞌi, shimaayoochee kindii bi beetaa beeggeho; bi shimbooch ximbittoo beetone; bi aafoochaa aabeechoommon aaxxee beetone; bi baatoo qaaqqee aaxxee conjoommone.

² Gaxxeeti giisheche macaafeen bi kishooch yechitone; bi qanne baatoon baharee toommooch, bi yooche baatoonoo showee toommooch geddiye.

³ Daaheroochoommon oogeti qaaroona ciddiye; bi ciddimmona, shabaatte xeeyo xeejjiye.

⁴ Shabaatte xeeyo xeejjimmona, ta waayeti mooyon kooriya iyo; tunebaani shimaayoochee “Shabaatte xeeyo xeeyaa getteeti mooyon maatemoona hicalli kooriyaahine” immi qaaroon waayeho.

⁵ Aroochee baharoonaa showoonooch neexeꞌi bi beetaa ta beeggeti maraakoo bi qanne kishoon shimaajj kaama wochii yaggiye.

⁶ Shimaayoonaa bi daggooch beetinaꞌonon, showoonaa bi daggooch beetinaꞌonon, baharoonaa bi daggooch beetinaꞌonon halliti, bulli yemeenoon beeyechona wogeꞌi, “Yeeri tuniiya bi gabiton ceechoyich yagaachemmone;

⁷ shabaattinnee maraakoo tiroon bi hugaa qaaro waayeehooba, Yeeri bi maddechi keemechinaꞌoyich bi gettiti wochoommon, bi gabiti bi maacee mooyo ceennemmone” iye.

⁸ Shimaayoochee ta waayeti qaaro wochinnoon taach “Hamiree baharoonaa showoonooch neexeti maraakoo kishooch beeti gaxxeeti macaafeen deꞌe” ii bi getaa waayeho.

⁹ Maraakoo waanoo hammaꞌa, “Giisheche macaafeen taach imbe” iyo. Biyoo “Daamiree mame; ne maacee daggoochaa caammemmine; tunebaani ne kookkoochaa eeyochoommon nooccemmine” iye.

¹⁰ Maraakoo kishoochee ebi giisheche macaafeen daammaꞌa maaho; ta kookkoochaa eeyochoommon nooccahan; tunebaani ta maatoyee gubb ta maacee daggoochaa caammahan.

¹¹ Ebiyee gubb, “Meeti ashi yareenaꞌochon, aageteenaꞌochon, baribare noonoona yibbaateebeeti asheenaꞌochonaa taateenaꞌochonon wochinnoon keemoon keemmemmo neene” getteeho.