Woraaferasheenaꞌo 9 - Kafa Linguistics Project

Abimeleeki Mooyo

¹ Aroochee Yerubaꞌali bushoo Abimeleeki Shekeem beeti bi iyeenaꞌo waan hammiꞌi, boonoshinaa bi indeechi yareenaꞌo bullinoyich ishichiye:

² “Shekeemi asheenaꞌo bullich ishichi getote: ‘Yerubaꞌalichi shabe bushiisheenaꞌo bulli ittoshin hajjoo gaawiye woyee ikke asho ittoshin hajjoo gaawiye?’ getote. Ebiyeenoo wotta ta, ittoshi meenonaa ittoshi damoona ta tunoon batteyaahote” iye.

³ Bi iyeenaꞌo bi qoodoon tuneꞌi ebi mooyo bullin Shekeemi asheenaꞌo bullich gettiyeete. Shekeemi asheenaꞌo “Bi, no manoone” iꞌi Abimeleekin dabbiya gabiꞌi tiyiyeete.

⁴ Biichoo Baꞌaal Beriitee yaafee kexoochee shabe sheqeelee birewoon immiyeete. Biyoo ebi birewoona gaacaalli gonde asheenaꞌon kemehe; boonoshiyoo biin dabbiyeete.

⁵ Aroochee Ofira beeti bi nihoo kexooch hammiye. Yerubaꞌali bushiisheenaꞌo tuneti shabe bi maneenaꞌon ikke xaqqee toommoochaa guuriye. Tunebaani Yerubaꞌalichi guuche ciire bushoo Yotaami baach aasheꞌi wodiye.

⁶ Shekeeminaa Beet Miilinooch beeti asheenaꞌo bulli kiceeꞌi hammii Shekeem beeti, ikke xaqqee giimbee gaꞌooch beeti ooge michi xepphoochaa Abimeleekin taatiiheete.

⁷ Yotaamiyoo ebi mooyon waayeꞌi, Gerizimi guudi toommooch hammii neexeechii, boonoshi waan cookiibee ishichiye: “Shekeemi asheenaꞌote, Yeeri ittoshi qolloon bi waayemmoyich, ta gettaa beeton waayebote.

⁸ Ikke areddoon mixinaꞌo boonoshi toommooch taatoon taatiiya hammiyeete. Boonoshiyoo zayitee mixon ‘No toommooch taatebe’ iyeete.

⁹ “Tunebaani zayitee mixo wochiꞌi, ‘Nuggisheenaꞌonaa asheenaꞌonon oogiibeeti zayitoon imon qayiichi, mixinaꞌo toommooch yaaddeya hambote?’ iye.

¹⁰ “Mixinaꞌoo balaasee mixon ‘Ne waaree no toommooch taatebe’ iyeete.

¹¹ “Balaasee mixo wochiꞌi, ‘Shaawiibeeti, gaawe ta aafoon aafo qayiichi, mixinaꞌo toommooch yaaddeya hambote?’ iye.

¹² “Aroochee mixinaꞌo woyinee qomboon, ‘Ne waaree no toommooch taatebe’ iyeete.

¹³ “Woyinee qomboo wochiꞌi, ‘Nuggisheenaꞌonaa asheenaꞌonon emirikkiibeeti woyinee uyoon imon qayiichi, mixinaꞌo toommooch yaaddeya hambote?’ iye.

¹⁴ “Ciiroochaa mixinaꞌo hammii angichi tushoon ‘Ne waaree no toommooch taatebe’ iyeete.

¹⁵ “Angichi tusho mixinaꞌoyich wochiꞌi, ‘Iberoon ittoshi toommooch taan taatiyoyich qaawiibeeto ittoshi tunegaata, waaree ta yiirooch kotebote. Ebi tuno qayigaata, qaaqqoo angichi tushoochee keyiree Libanoosi geppooch beeti yigoon michi aalliibe’ iꞌi gettiye” iye.

¹⁶ Yotaamiyoo daakkiꞌi ishichiye: “Illa and Abimeleekin ittoshi taatiibeeto iberittinoonaa gaawe gaboona bi tunegaata, Yerubaꞌalinaa bi kechi asheenaꞌonon gaawe aafoona ciinniꞌi, bi tuniiti mooyoyich biich gabito ittoshi tunegaata, tunebe!

¹⁷ Ta nihoo ittoshicha iꞌi bi koyoonaa bi kashoon beshii imona Miidiyameenaꞌo kishoochee ittoshin bi wodiyoonon shalligibote.

¹⁸ Tunebaani ittoshi hanaach ta nihoochi kechi asheenaꞌo toommooch tiyito ittoshine; shabe bi bushiishoonoo ikke xaqqee toommoochaa guurito ittoshine. Ta nihoo bi gonnee waanee bi shiyiti bushoo Abimeleeki ittoshi xiboo bi tunetoyich, Shekeemi asheenaꞌo toommooch biin taatiito ittoshine.

¹⁹ Illa and Yerubaꞌalinaa bi kechi asheenaꞌonochi toommooch ebin ittoshi tuniito iberittinoonaa gaawe gaboona bi tunegaata, Abimeleekina emiribote; biyoo ittoshina emiribe.

²⁰ Ebi toono gaata, qaaqqoo Abimeleek waanee keyiree, Shekeemechi ittoshinaa Beet Miilechi ittoshinon michi aalliibe; wotta qaaqqoo Shekeemechi ittoshinaa Beet Miilechi ittoshina waanee keyiree, Abimeleekin michi aalliibe” iye.

²¹ Aroochee Yotaami woccii aallehe; bi manoo Abimeleekin bi shattitoyich, Beeri katemooch hammiꞌi arooch kotehe.

²² Abimeleekiyoo Israꞌeeleenaꞌo toommooch keejje naton taatehe.

²³ Yeeriyoo Abimeleekinaa Shekeemi asheenaꞌonon kaariyemmi yinnoon deejjiye. Boonoshiyoo Abimeleeki toommooch hukkoon tiijjiyeete.

²⁴ Ebi bi tuneto, Yerubaꞌalichi shabe bushiisheenaꞌo toommooch tuneti magge mooyonaa ufeti boonoshi damoona boonoshin wuxiti boonoshi manoo Abimeleeki toommooch, wotta bi maneenaꞌon bi wuxemmoyich bi mochoon kupphiiti Shekeemi asheenaꞌo toommooch bi shaggemmoyichiye.

²⁵ Shekeemi asheenaꞌo Abimeleekin oti quyemmi asheenaꞌon guudinaꞌo toommooch kotiiheete; ebi are asheenaꞌo are gommona beshee beetinaꞌo bullin boggiyeete. Abimeleekiyoo ebi mooyon waayehe.

²⁶ Ebiyooba Ebeedi bushoo Gaꞌaali bi maneenaꞌona tookkii Shekeem waahe. Shekeemi asheenaꞌo biin gibeneheete.

²⁷ Boonoshiyoo boonoshi woyinee goyo beetooch hammii, woyinee aafoon maciꞌi woyinee uyoon duuchiyeete; baaroonoo baariyeete; boonoshi nuggishoochi yaafee kexooch hammiyeete; aroochaanoo maa uchiyeete; Abimeleekinoo naaggiyeete.

²⁸ Ebeedi bushoo Gaꞌaaliyoo ishichiye: “Abimeleeki konine? Wotta Shekeemechi no, koni noone biich hajjeyemmo? Bi, Yerubaꞌali bushoo toone? Zebuuliyoo biyee deshi iraashoo toone? Shekeemi nihoo Hamoorichi asheenaꞌoyich hajjeebote. Halla Abimeleekich no hajjeyaabeeto, amoyichiye?

²⁹ Ebi asheenaꞌo ta kishooch tuneto gaata, Abimeleekin aalliyesho taane. Abimeleekichoo ‘Ne ginee naayinaꞌon woddiiree hach wobe’ gettesho taane” iye.

³⁰ Are katemee iraashoo Zebuuli ebi Ebeedi bushoo Gaꞌaalichi yibbaatoon waayeꞌi oogeton ippehe.

³¹ Biyoo aashoona Abimeleek waan wochoon daachiiꞌi ishichiye: “Ebeedi bushoo Gaꞌaalinaa bi maneenaꞌona Shekeem waaꞌi, hini katemeexi asheenaꞌo ne toommooch tiyemmoyich tuniitinaꞌone.

³² Ebich neennaa ne asheenaꞌona xumoona waaree, bakkooch oti quyebote.

³³ Yaach, aabe kechaahaa, maaddi tiyiree katemooch afaafinoona wobote. Gaꞌaalinaa bi asheenaꞌona neenna koyeya boonoshi kechimmona, boonoshi toommooch ne tuniiya bede mooyo bullin tuniibe” iye.

³⁴ Ebina Abimeleekinaa bi asheenaꞌo bullina xumoona tiyii hammii, awudde beera qoodeeꞌi Shekeemi katemoyee maach ottii koteheete.

³⁵ Ebeedi bushoo Gaꞌaali maach kechiꞌi katemee gimi kellooch neexehe. Abimeleekinaa biinna tookkii beeti asheenaꞌona ottiꞌi boonoshi quyeebeeti xaaꞌoochee tiyiyeete.

³⁶ Gaꞌaaliyoo asheenaꞌon beeggiꞌi, Zebuulich “Guudinaꞌoo toommoochee asho dugilla waa beeton ciine” iye. Zebuuliyoo biich wochiꞌi, “Guudinaꞌochi yiirittoone neech ashoon shaahiꞌi bekkeebeeto” iye.

³⁷ Gaꞌaaliyoo “Ciine! Asheenaꞌo geppee toommoochee kindii beetinaꞌone. Ikke kuxoo mareccee maaccechochi ooge mixo beetona dugilla waa beetone” iye.

³⁸ Zebuuliyoo wochiꞌi, “ ‘Abimeleekich no maddemmo, bi koni tunetenane?’ iyaabee ne gokketi goho, and illa aaye? Boonoshin ne hoxeti asheenaꞌo eboshi tooneete? And illa eke hamiree koyebe” iye.

³⁹ Gaꞌaaliyoo Shekeemi asheenaꞌon bi hillooch dabbii kechii hammiꞌi, Abimeleekina koyehe.

⁴⁰ Tunebaani Abimeleeki biin yoohaa, bi aafoochee woccii aallehe. Katemee kellooch boonoshi shaggimmi wottoon meeti asheenaꞌo koyaa dihiyeete.

⁴¹ Abimeleekiyoo Aruumi katemooch kotehe; tunebaani Zebuuli Gaꞌaalinaa bi maneenaꞌonon Shekeemee yookkii kichiye; ebiyee gubb arooch beemon hakkaaneenaꞌone.

⁴² Bi dechara asheenaꞌo goyooch hammii beeheete. Abimeleekiyoo ebin waayehe.

⁴³ Bi asheenaꞌonoo daammii keejje beera qoodiꞌi, gaddooch ottii quyee beehe. Asheenaꞌo katemoochee keyon beeggiꞌi bi aashetoochee boonoshin kocha kechiye.

⁴⁴ Abimeleekinaa biinna tookkii beeti, ikke kuxi asheenaꞌona wocona hammii katemee kellooch neexeꞌi beetaa, ohe gutte kuxi asheenaꞌo goyooch beeti asheenaꞌo waan afaafinoona hammii boonoshin wuxii ciichiyeete.

⁴⁵ Arooba Abimeleeki are katemee asheenaꞌona koyeebee heechiꞌi, ciiroochaa are katemoon yechiye. Are katemooch beeti asheenaꞌon wuxii ciichiye; katemoonoo happii aalliihe; kiihon bi toommooch shookkiye.

⁴⁶ Arooba Shekeemi katemee xaqqee dilaalooch beeti asheenaꞌo bulli ebin waayeꞌi, El Beriitichi yaafee kexooch beeti mishigooch hammii giyiyeete.

⁴⁷ Abimeleekiyoo Shekeemi katemee xaqqee dilaalooch beeti asheenaꞌo bulli arooch boonoshi kiceyoon waayehe.

⁴⁸ Ebich biinnaa biinna tookkii beeti asheenaꞌo bullina Tsalimooni guudi toommooch hammiyeete. Abimeleekiyoo qofiyon daammii michi kishoon kuxxiꞌi, bi gogooch shaaggiye. Biinna tookkii beeti asheenaꞌonoo “Ebi ta tuniitaa ittoshi beeggitoommon, kaateree tuniibote” iye.

⁴⁹ Ebich asheenaꞌo bulliyoo michi kishoon kuxxiyeete; Abimeleekin dabbii hammiꞌi mishigee kellooch gutiyeete. Asheenaꞌo bi maac beetaa, ebi mishigooch qaaqqoon geddiyeete. Ebina Shekeemi xaqqee dilaalooch beeti asheenaꞌo bulli qitii ciireheete; eboshiyoo anaamonaa maacheena dagg bulli ikke humi bedeenaꞌone.

⁵⁰ Aroochee Abimeleeki Tebeetsi katemooch hammiꞌi katemoon giichii yechiye.

⁵¹ Are katemee daggooch kupphe xaqqee dilaaloo bi beetoyich, anaamo tuneba maache, asheenaꞌo bulli arooch wocee giyiichii kelloon hicciyeete. Are xaqqee dilaalee toommoochoo kechiyeete.

⁵² Abimeleekiyoo xaqqee dilaalooch hammiꞌi koyeebee, are xaqqee dilaaloon qaaqqoona michiya kellooch katinniye.

⁵³ Areegaata, ikke ure xaqqee maanoon awuraꞌa bi qellee koofon tiichahan.

⁵⁴ Biyoo bekkech bi quyee naayo tuneti gurimaashoon ceeggiꞌi, “ ‘Maacheene biin wuxiti’ bi getteyaachemmoyich, ne goraadoon kaaciree taan wuxibe” iye. Abimeleeki bi aafee bushoo koyaa qitiye.

⁵⁵ Israꞌeeleenaꞌo bi qitoon beeggiꞌi, boonoshi kexi kexooch wotteheete.

⁵⁶ Ebina, Abimeleeki shabe bi maneenaꞌon wuxoona bi nihoo toommooch bi tuniiti gonde mooyon Yeeri bi toommooch wochiye.

⁵⁷ Ebiyoommon wotta Shekeemi katemee asheenaꞌochi gonde shuunoon boonoshi toommooch wochiye. Yerubaꞌali bushoo Yotaami uppiti ufo boonoshi toommooch shaggiye.