Woraaferasheenaꞌo 4 - Kafa Linguistics Project

Diiboori Woraaferashee Tuno

¹ Ehuudi qititoyee gubb, Israꞌeeleenaꞌo Doono Yeeri aafooch wochinnoon axaaxoon shuuneheete.

² Ebich Doono Yeeri boonoshin Hatsoori katemoochaa tuneꞌi qeejjiibeeti Kanaanee taatoo Yabiinichi kishooch beshiiꞌi immiye. Yabiinichi ginee iraashoo, bi beeyi xaaꞌoon Harosheet Hagoyimi katemooch tuniiti Siseerine.

³ Yabiinich yiixiye balle xuuree gaari beetone. Biyoo hiye naton Israꞌeeleenaꞌon neexxii hajjiye. Ebich Israꞌeeleenaꞌo Doono Yeer waan cookiyeete.

⁴ Arooba Lafidooti mechee, keemechi Diiboori woraaferashee tunaꞌa Israꞌeeleenaꞌon qeejjaa beehan.

⁵ Biyoo geppechi Efreemee showooch, Raaminaa Beeteelina daggooch beeti, Diiboori Yeebbee Mixo getteebeeti michi xepphooch kotaachaa nallaa beehan. Israꞌeeleenaꞌo taggoon taggoyich bi waan waa beeheete.

⁶ Ikke areddoon Diiboori Nifitaalee showooch, Qedeeshi katemooch beeti, Abinoꞌami bushoo Baraaqin bi waan ceekkiyaꞌa ishichiyan: “Israꞌeelee Nuggishoo Doono Yeeri ishichiye: ‘Tiyiree Nifitaali yoodoonaa Zebulooni yoodoonoochee aashire hume asheenaꞌon yeshi, Taaboori guudi toommooch hambe.

⁷ Tawoo Yabiinichi ginee iraashoo Siseeri bi gaarinaa bi ginee naayinaꞌonon yeshiree neenna koyeya Qishooni aacooch bi woyemmoyich tuniyemmo taane. Ne kishoochoo biin beshiiree immemmo taane’ itone” iyan.

⁸ Baraaqiyoo “Taanna tookkaa ne hamigaata, hammemmo taane; tunebaani taanna tookkaa hamo ne qayigaata, hamaache” iye.

⁹ Diibooriyoo biich “Tunebe; neenna tookki hammemmi taane. Tunebaani ebi tunegaata, Doono Yeeri Siseerin maachee kishooch beshiiree immemmo bi tunetoyich, ebi mooyona neech oogo daneyaachemmone” iyan. Ebina Diiboori Baraaqina tookkaa Qedeesh tiyaa hammahan.

¹⁰ Baraaqiyoo Zebuloonee asheenaꞌonaa Nifitaalee asheenaꞌonon Qedeesh ceekkiihe. Aashire hume asheenaꞌoo biin dabbiyeete. Diibooriyoo biinna tookkaa hammahan.

¹¹ Arooba Qeenee asho Hebeeri, Muusichi abboo Hobaabichi shiijjereenaꞌo tuneti Qeeneenaꞌo waanee bariꞌi hammii, bi duukkaanoon Qedeeshi katinooch, Tsananimi bakkooch beeti ikke ooge michi gaꞌooch xogitone.

¹² Abinoꞌami bushoo Baraaqi Taaboori guudooch bi keyon Siseeri waayeꞌi,

¹³ yiixiye balle xuuree gaarin, wotta biinna tookkii beeti asheenaꞌo bullin Harosheet Hagoyimi katemoochee Qishooni aacooch kiciye.

¹⁴ Areegaata, Diiboori Baraaqich ishichiyan: “Tibe! Doono Yeeri Siseerin ne kishooch beshiiꞌi bi immiti aabo hanaachiye. Doono Yeeri ne aafooch shiichiꞌi kechitone” iyan. Ebich Baraaqi aashire hume asheenaꞌon dabbiiꞌi, Taaboori guudi toommoochee kindiye.

¹⁵ Baraaqinaa bi ginee naayinaꞌona boonoshina tookkii goraadoona koyemmona, Doono Yeeri Siseerin, bi gaarinaꞌo bullinaa bi ginee naayinaꞌo bullinon keqqichiye. Siseeriyoo bi gaariichee kindiꞌi baatoona wocciye.

¹⁶ Baraaqiyoo Harosheet Hagoyim beddaahaa ebi gaarinaꞌonaa ginee naayinaꞌonon yookkii dabbiye. Siseerichi ginee naayinaꞌo bulli goraadoona qitiyeete. Kashoona echeti ikke asholla aalloone.

¹⁷ Arooba Hatsooree taatoo Yabiininaa Qeenee asho Hebeerichi yareenaꞌonochi daggooch shunoo beeto bi tunetoyich, Siseeri wocona hammiꞌi, Qeenee asho Hebeeri mechee Yaꞌeelichi duukkaanooch shaggiye.

¹⁸ Yaꞌeeliyoo maach kechaa biinna danaꞌa, “Ta doonocho, hach gibe; hach ta duukkaanooch gibe; shattaahine” iyan. Siseeriyoo ebi ureechi duukkaanooch giyiye. Ureyoo qoreddoon daammaa bi toommooch oppahan.

¹⁹ Siseeriyoo ureyich “Taan shachewiitone. Giisheche aacon taach ne imaa uyona” iꞌi qollehe. Biyoo ejji mollexxoon qechaꞌa, ejjoon bi imaa uchiye; wochinnoon qoreddoon bi toommooch oppahan.

²⁰ Aroochee Siseeri biich ishichiye: “Duukkaanee kellooch keyi neexebe; asho koniyoona waaꞌi, ‘Hiniich asho beete?’ ii bi echegaata, aalloone gete” iye.

²¹ Siseeri oogeton bi maraatetoyich, tokketooch bi qitiichaa, Hebeeri mechee Yaꞌeeli duukkaanee xogoonaa modooshoonon yechaa nibboona bi waan giddahan. Xogoon bi mallaallooch xogaꞌa showoona xaaqqiyan. Biyoo qitiye.

²² Baraaqi Siseerin yookkii dabbiibee bi waammona, Yaꞌeeli mach kechaa biinna danaꞌa, “Hach ne waataa, ne qaawaabeeti uroon neech bekkiibona” iyan. Baraaqiyoo biinna tookkii duukkaanee maac bi giyaahaa, xogoo bi mallaalloona xogeetaa Siseeri qitiꞌi, showooch yaryallii beehe.

²³ Arooba Doono Yeeri Kanaanee taatoo Yabiinin Israꞌeeleenaꞌo aafooch giishiihe.

²⁴ Ebi Kanaanee taatoo Yabiinin boonoshi aalliimmi wottoon Israꞌeeleenaꞌo kupphee kupphee hammiyeete.