Woraaferasheenaꞌo 1 - Kafa Linguistics Project

Yihudi Yoodoonaa Simooni Yoodoona Taatoo Adon Bezeeqin Koyo

¹ Yaasi qititoyee gubb, Israꞌeeleenaꞌo “No daggoochee shiichi hamiree Kanaaneenaꞌon koni koya?” ii Doono Yeerin echeheete.

² Doono Yeeriyoo “Yihudi yoodo shiichiree hambe. Tawoo showoon bi kishooch beshiyaꞌa immeto taane” iye.

³ Yihudi yoodo bi manoo tuneti Simooni yoodoon “Nooch icheti showooch beeti Kanaaneenaꞌon ittoshi waataa hamiree tookki koyone. Nowoo ebiyoommon ittoshicho tuneti showooch tookkiree hammemmo noone” iye. Ebina Simooni yoodoonaa

⁴ Yihudi yoodoona koyooch tookkii hammiyeete. Doono Yeeriyoo Kanaaneenaꞌonaa Ferizeenaꞌonon boonoshi kishooch beshiiꞌi immiye. Boonoshiyoo aashire hume asheenaꞌon Bezeeqaa wuxiyeete.

⁵ Aroochaa Adon Bezeeqina daneꞌi koyeheete. Kanaaneenaꞌonaa Ferizeenaꞌonon kochii wochiyeete.

⁶ Adon Bezeeqiyoo wocciye; boonoshiyoo yookkii yechiꞌi bi kishee indecheenaꞌonaa baatee indecheenaꞌonon kuxxiyeete.

⁷ Adon Bezeeqiyoo “Boonoshi kishee indecheenaꞌonaa baatee indecheenaꞌona kucheti shabe taateenaꞌo ta madee ooyoon maciibee echetinaꞌone. Ebi boonoshi toommooch ta tuniitoommon, Yeeri ta toommooch tuniitone” iye. Biinoo Yerusaalem daammiyeete. Biyoo aroochaa qitiye.

Yihudi Yoodo Yerusaaleminaa Kebirooninon Kochii Yesho

⁸ Yihudi yoodee asheenaꞌo Yerusaalemin kochii yechiyeete; are katemeexi asheenaꞌon goraadoona wuxiyeete; katemoonoo qaaqqoona michiyeete.

⁹ Aroyee gubb, geppe showooch, Negeebi barahoonaa woreboonooch beeti Kanaaneenaꞌon kocha hammiyeete.

¹⁰ Boonoshiyoo Kebiroon koteti Kanaaneenaꞌon kocha hammiyeete. Aroochaa Sheshaayi, Ahimaaninaa Talimayinochi shiijjereenaꞌon kochii wochiyeete. Kebirooni arooba Qiriyaat Aribi getteehe.

Otineeli Debiirin Kochii Yesho

¹¹ Aroochee Yihudi yoodee asheenaꞌo Debiiri katemeexi asheenaꞌon kocha hammiyeete. Aroyee aaf Debiiri, Qiriyaat Sefeeri gettee beetone.

¹² Kaaleebiyoo “Qiriyaat Sefeerin kochii yechimmoyich ta bushee Akisaahin immemmo taane” iye.

¹³ Kaaleebichi guuche manoo Qenaazi bushoo Otineeli are katemoon kochii yechiye. Kaaleebiyoo bi bushee Akisaahin biich immiye.

¹⁴ Akisaahi Otineel waan bi waati gaaree aabooba, bi nihoo Kaaleeb waanee goyee budon bi qollemmoyich, Otineeli bushech gettiye. Busheyoo bi kuree toommoochee kindiyan. Kaaleebiyoo biich “Amoon neech ta tuniyemmoyichiye ne qaawaabeeto?” iye.

¹⁵ Busheyoo “Taach wojjoon imbe; taach ne immeti showoo beeto Negeebi barahoochiye. Ebich aachi xuupheenaꞌon taach imbe” iyan. Kaaleebiyoo dambee aachi xuuphoonaa deshi aachi xuuphoonon biich immiye.

Yihudinaa Biiniyaaminochi Yoodeenꞌo Daneti Wudoo

¹⁶ Muusi abboochi shiijjereenaꞌo tuneti Qeenee asheenaꞌo Yihudi yoodoona tookkii tuneꞌi, yeebbee mixo bi daggooch beeti Yaarikee tiyii, Araadi gaꞌooch, Negeebi barahooch beeti Yihudee showooch hammiyeete. Hammiꞌi are showeexi asheenaꞌona tookkii koteheete.

¹⁷ Yihudi yoodo Simooni yoodoona tookkii hammiꞌi Tsefaati katemooch beeti Kanaanee asheenaꞌon kochiyeete. Are katemoonoo ciroona hidii aalliiheete. Ebich are katemoo Horimi getaa ceekkehe.

¹⁸ Yihudi yoodo Gaazin, Ashiqelooninaa Eqirooninon, ebi katemeenaꞌochi guudoona beeti showoona tookkii yechiye.

¹⁹ Doono Yeeri boonoshina tookkii bi tunetoyich, geppe showoon yechiyeete; tunebaani yimaane showooch beeti asheenaꞌoyich meeti xuuree gaari bi beetoyich, boonoshin yookkii kichoon hakkaaneenaꞌone.

²⁰ Muusi gettitoommon tuniiꞌi, Kebiroonin Kaaleebich immiyeete. Biyoo Anaaqichi keejje bushiisheenaꞌo shiijjereenaꞌon yookkii kichiye.

²¹ Tunebaani Biiniyaami asheenaꞌo Yerusaalem beeti Yebuseenaꞌon yookkii kichaaneenaꞌone. Ebich Yebuseenaꞌo hanaach beddaahaa Biiniyaami asheenaꞌona tookkii arooch koteꞌi beetinaꞌone.

Yooseefichi Shiijjereenaꞌo Beeteelin Kochii Yesho

^22-23 Yooseefi shiijjereenaꞌo wotta Beeteelin kocha hammiyeete. Beeteeli arooba Luuzi getteehe. Doono Yeeriyoo boonoshina tookkii tunehe. Boonoshiyoo qiiddechinaꞌon are katemooch daachiiheete.

²⁴ Are qiiddechinaꞌo katemoochee maach kechiibeeti ikke uroona daneꞌi, “Katemooch giyeebeeti kelloon nooch bekkiibe; nowoo neech deeyemmo noone” iyeete.

²⁵ Biyoo katemee kelloon boonoshich bekkiihe. Boonoshiyoo hini are uroonaa bi kechi asheenaꞌonoyee besh, are katemooch beeti asheenaꞌo bullin goraadoona ciichiyeete.

²⁶ Ebi uro Hiteenaꞌo showooch hammiꞌi arooch katemoon shuunehe. Are katemoonoo Luuzi iꞌi shigiihe. Hanaach beddaahaa ebi katemoo ceekkeebeeto are shigoonane.

Israꞌeeleenaꞌo Yookkii Kichaani Asheenaꞌo

²⁷ Minaasi yoodo Beet Sheꞌaan, Tanaak, Door, Ibilaam, Megidinaa ebi katemeenaꞌochi guudoona beeti gafeenaꞌonooch beeti asheenaꞌon yookkii kichaanoone. Ebich Kanaaneenaꞌo are showoochee shuuraanoon manjiꞌi koteheete.

²⁸ Tunebaani Israꞌeeleenaꞌo boonoshi kupphehooba, ebi asheenaꞌo guunon tuneree boonoshich maddemmoyich tuniiheetani, ciroona yookkii kichaaneenaꞌone.

²⁹ Efreemi yoodo Gezeer beeti Kanaaneenaꞌon yookkii kichaanoone. Ebich Kanaaneenaꞌo boonoshina tookkii Gezeer koteheete.

³⁰ Zebulooni yoodo Qitirooninaa Nahaloolinooch beeti asheenaꞌon yookkii kichaanoone. Ebich Kanaaneenaꞌo boonoshina tookkii koteheete. Boonoshichoo guunon tuneꞌi maddeheete.

³¹ Aseeri yoodo Aak, Sidoon, Ahilaab, Akiziib, Helibaah, Afeeqinaa Rehoobinooch beeti asheenaꞌon yookkii kichaanoone.

³² Yookkii kichoo bi qajjitoyich, Aseeri yoodo are showooch beeti Kanaaneenaꞌona tookkii arooch kotehe.

³³ Nifitaali yoodo Beet Shemeeshinaa Beet Anaatinooch beeti asheenaꞌon yookkii kichaanoone. Ebich boonoshiyoo are showooch beeti Kanaaneenaꞌona tookkii arooch koteheete. Tunebaani ebi Beet Shemeeshi asheenaꞌonaa Beet Anaati asheenaꞌona boonoshich guunon tuneꞌi maddeheete.

³⁴ Daani yoodo yimaane showooch kindaanoon geppe showooch baach bi beeyemmoyich Amooreenaꞌo boonoshin xuqqiyeete.

³⁵ Ebi Amooreenaꞌo Hereesi guudooch, Ayalooninaa Shaꞌalibiminooch manjiꞌi koteheete. Tunebaani Yooseefi shiijjereenaꞌo giidehooba, boonoshich guunon tuneꞌi maddeheete.

³⁶ Amooreenaꞌo dano Aqirabiimi Deshee Damboochee, Selaahee tiijjiꞌi kaama kechii beetone.