Titoosi 3 - Kafa Linguistics Project

Yaafeeti Qoco

¹ Ne waan beeti kittinneenaꞌon, iraasheenaꞌonaa ukkireenaꞌonoyich hajjee beetinaꞌonaa deꞌa ii beetinaꞌona, deꞌe shuunoo bullichoo qannitinaꞌo,

² koninolla oonaaneenaꞌo, hayoochee wokkitinaꞌo, shiimechinaꞌo, asho bulli aafooch boonoshi qelloon giishii beetinaꞌo boonoshi tunemmoyich shalligichibe.

³ Ebiyee aaf no wotta mullaallo, deꞌa getaano, muriccaabeeto, baribare meechi qaatoonaa meenon emirikkoonoyich guunochoommon hajjeebeeto, gonde moochecho, ashi wodoon shixxaabeeto, ashoona shichaa beeto, noonnaa noonna mateebeeto noone.

⁴ Tunebaani noon Wodiyechi Yeeri bi deꞌittinoona ashoon bi shunonon bi gaxxiyooba,

⁵ noon bi wodiito bi maaree beshoonalli, no shuuneti cadiqee shuunoona toonoone; noon bi wodiito guttinnee shiijjoon no daneti machoonaa Yaafe Ayaanee andiriyoonane.

⁶ Are Ayaanoon noon Wodiyechi Yesuus Kiristoos waanaa no toommooch ceenoona kindiihe;

⁷ ebin bi tuniito, bi wojjoona cadiqiree gibenoona no quyeebeeti bulli yemeenee kashoon no woraashemmoyichiye.

⁸ Ebi bullich bi qaaro gibeneetone; mulloon Yeeri toommooch tooꞌiiti asheenaꞌo deꞌe shuunoon shuunoona boonoshi kupphemmoyich, eboshin gaawichiree gete. Ebi mooyo deꞌoone; asho bullichoo gaaccemmone.

⁹ Tunebaani gaacaalli gajjiteyoochee, qaabbechinaꞌochi shigee haddoochee, hayoochee, sheeree naboona tiyiibeeti kaaroocheenoo wohe; eboshi bulli gaacaani duubeenaꞌone.

¹⁰ Barbarittinoon halliibeeti ashoon ikke wottoon woyee gutte wottoon ne ittibatetaa bi mawigaata, biyee wohe.

¹¹ Ebiyoommi asho xummoonaa axaaxechonane. Biyoo bi toommooch wochii nallito bi tunoon ariibe.

Ciireexi Yibbaatoonaa Diggiyoona

¹² Hini yooyon Niqopooli katemoochaa kichiya ta gabaa beetoyich, Arixemaasin woyee Tikiqoosin ne waan ta daachiigaata, kaateree ta waan wobe.

¹³ Wottoo sheeree ariyechi Zenaasinaa Aphiloosinon gommoochaa boonoshi iriteyaachemmoyich ne hakkimmo bullin tuniibe; boonoshich qaawiibeeti mooyo bullin boonoshich ceechibe.

¹⁴ No macceenaꞌo wotta aafaalloon tuneree boonoshi echeyaachemmoyich, boonoshich qaawiibeeti mooyo beeyemmoyich buushaarechi shuunee yeshon doyibeete.

¹⁵ Taanna tookkii beetinaꞌo bulli neen diggii beetinaꞌone. Shucheti kittinnee no maneenaꞌoyich no diggiyoon bechibe. Yeerichi wojjoo ittoshi bullina tookki tunebe.