Titoosi 1 - Kafa Linguistics Project

Diggiyoo

¹ Yeeri kaaccitinaꞌo Kiristoosi toommooch mullee tooꞌiyoona boonoshi kupphemmoyich, wotta Yeerin oogiibeeti beemon beemooch bechiibeeti iberoon boonoshi ariyemmoyich tuniyoyich wocheeti, Yeerichi guuno, Yesuus Kiristoosichi mishiraachecho tuneti Phawuloosi waanee:

² Ebi mullee tooꞌiyoonaa iberoon ariyoona bulli yemeenee kashoon danee gibenee toommooch neexetone; ebi kashoyichoo kootaani Yeeri, yemeeno bulliyee aaf gibenikkitone.

³ Bi daaggiti yemeenooba, noon Wodiyechi Yeerichi getoona taach adero icheti wochee gommona bi qaaroon gaxxiye.

⁴ Kiristoos Yesuusi toommooch mulloon no tooꞌiyoona ibere ta bushoo tuneti Titoosich: Nihoo Yeerinaa noon Wodiyechi Kiristoos Yesuusina waanee wojjoonaa diggoona neech tunebe.

Kittinnee Guuphi Geeneenaꞌochi Qoco

⁵ Qerixeesee showooch neen ta echiiti naboo, neech ta gettetoommon echeti shuunoon ne ceechemmonaa katemoo bulliich beeti kittinnee guuphoyich geeneenaꞌon kaaciree shuunooch ne neechemmonoyichiye.

⁶ Kittinnee guuphi geeno tunemmi asho, gonde mooyona oonneyaano, ikke mechecho, boonoshi mulloon Kiristoosi toommooch tooꞌiiti, wotta gonde qocoonaa wochee waayee qayona taggeyaani bushiishecho tunebe.

⁷ Hini are kittinnee guuphon yaabii qeejjiibeeti geeno Yeerichi shuunoon kaachi bi shuunemmoyich, gonde mooyona oonneyaano, geecaano, kaatee kaareyaano, masheyaano, damoo gufeyaano, gijjoon hiriggaano tunebe.

⁸ Wotta iibboon iibbiibeeto, deꞌe mooyon shunniibeeto, bi qellee ariyecho, kaamoo, Yeerich diireeto, bi qelloon quyecho tunebe.

⁹ Gaawe kittinnittinee doyoona bi ciiccemmoyich, wotta gaawe doyoon shixxii beetinaꞌon bi xoobiyemmoyich, ibere doyoo beeti, gibeneeti qaaroon manjiiree yeshe.

¹⁰ Ishichaꞌa neech ta gettaabeeto, hukkechinaꞌo, baade hayechinaꞌonaa dachechinaꞌona, eboshiyeenolla “Ayihudeenaꞌochi sheeroon ceechibote” ii beeti meeti asheenaꞌo beetoyichiye.

¹¹ Eboshi cikki qajjemmoyich tuniyoo qaawiihee; ebiyoo yeelliibeeti gaboona gaacoon danoyich tuneyaani mooyon ashich dojjiibee kechi asheenaꞌo bullin boonoshi shuurikkii beetoyichiye.

¹² Qerixeesee asheenaꞌochi daggeexi ikke keemecho “Qerixeesee asheenaꞌo bulli aaboon kooteenaꞌo, gonde cooxoomminaꞌo, maayi buujjeenaꞌonaa shuuna biisheenaꞌonane” iꞌi,

^13-14 bi miixeti miixittino iberoone. Ebichi naboyich Ayihudeenaꞌochi tochoonaa iberee qaaroyich deꞌa getaani dojjechinaꞌo tuniibote iꞌi boonoshi gettiibeeti mooyonon elleyaahote gete. Kiristoosi toommooch mullee tooꞌiyoona boonoshi manjemmoyich manjii ittibatebe.

¹⁵ Xalleenaꞌoyich bulli mooyo xalloone; tunebaani eeꞌeenaꞌonaa Kiristoosi toommooch mulloon tooꞌiyaaneenaꞌoyich xalloo tuneti mooyo amolla aalloone; halla boonoshi gaboonaa boonoshi mulloona eeꞌetone.

¹⁶ “Yeerin ariibeeto noone” ii beetinaꞌone; tunebaani tiyaarii beetinaꞌonaa deꞌa getaaneenaꞌona, ikke deꞌe mooyon shuunoyichona bedaaneenaꞌoo boonoshi tunetoyich, boonoshi shuunoona Yeerin nookkee beetinaꞌone.