Solomooni 7 - Kafa Linguistics Project

Gurimaashoo

¹ Taatoo busheene, ne baatoo caammee daggoochaa am shaahoon gaawehe! Ne doshoo, shuuna ariyecho kishoona shuuneeti shashoommone.

² Ne yundo woyinee uyo ceenniti xoofoon shaahiye; ne demmo, naddee bungoo bi guudoona caacceeti, teepphee ubon shaahiye.

³ Gutte ne xaninaꞌo mato shiijjeti gutte doollee bushiishoomminaꞌone.

⁴ Ne qettimixo dangeyi gashoona shuuneeti dilaaloommone. Ne aafo Beet Rabiimi kellee gaꞌooch beeti, Heshiboni kote aacoommone. Ne muddoo, Damaasiq waan ciinoyich neexeti, Libanoosi dilaaloommone.

⁵ Ne qello, Qermeloosi guudoochoommon, gidoon neech tajjitone; phaqqiibeeti naalle ne qelli yilloo aaꞌi dameroone; taatoo ne qelli yilloona mullo manjetone.

⁶ Ta shiiqqe, am shaahe phixxaashe korootee neene! Am shaahoon shuchiiti neene!

⁷ Yeebbee mixoommi genjee neene; ne xanoo bi yuunjoommone.

⁸ Yeebbee mixooch kechemmo taane; bi yuunjoonoo yechemmo taane. Ne xano woyinee yuunjoommon, ne kashee cinnoo appiloommon,

⁹ ne noonoo gaawe woyinoommon, taach tunebe. Woyinee uyo toolibee, ta shiiqqichi noonoonaa gashoonooch kindibe.

Gidiide Bushee

¹⁰ Ta, shiiqqichi taane; bi qaatiibeeto taaniye.

¹¹ Ta shiiqqo, ne waataa gaddooch hambone; xumoonoo gafeenaꞌooch qebone.

¹² Maaddiyee woyinee budooch hambone; woyino bungii aapphito gaata, romaano bungito gaata, beegone; aroochaa taan neech beshii immemmi taane.

¹³ Dudayimo cinnetone; shaawi michi aafo bulli natoonaa andiroona no kellooch ceennitone; ta shiiqqo, neech kotiiti taane.