Solomooni 6 - Kafa Linguistics Project

Nuucheenaꞌo

¹ Genneenaꞌo daggoochee beshe gaaweene! Ne shiiqqi amooch hammiye? Neenna tookki no qaawemmoyich ne shiiqqi aabi waaniye bi hammito?

Gidiide Bushee

² Ta shiiqqi bi bageenaꞌon quyoyich, naddee bungeenaꞌon macoyich, qimaame bechoo beeti tagooch, bi bechee michi budooch kinditone.

³ Ta, shiiqqichi taane; shiiqqiyoo taachone; naddee bungee daggooch bagoon quyee beetone.

Uuchinnee Shoddo Gurimaashoo

⁴ Ta shiiqqe, Tiritsi katemoommi malletechi neene; Yerusaalemiyoommi phixxaashe neene; baanderoon yechiti ginee naayochoommon, ne oogee yiiroo shattiitone.

⁵ Taan bi keqqichii beetoyich, ne aafoon ta waanee badd wochibe; ne qelli yilloo Gilaadee guudoochee dugilla kindiibeeti, emmishee gotoommone.

⁶ Ne gasho, ikke yodaalloone; bulliyona matoon shiyiibeeti, mayaa xalleti, ikke woderee bagoommone.

⁷ Ne gaakkoo, ne aafoon qeriti qoreddee maacaa, kappheeti romaane aafoommone.

⁸ Shiche gennee abeetinaꞌo, shinne naamacheenaꞌo, haddoyee beshiti gidiideenaꞌoo beetaana,

⁹ bi achooch bachaalli ta daabbiche, ikke mixxeene; bi indeechoo ikkeene; biin shiyetichoo aaxxeene; gidiideenaꞌo biin ciinniꞌi galleteheete; gennee abeetinaꞌonaa naamacheenaꞌona biin naadiyeete.

¹⁰ Ebi maaddee bekkoochoommon koojjaabeeti, ageneyoommi phixxaashe, aabee aaxxoommon aaxxaabeeti, baanderoon yechiti ginee naayochoommon bi oogee yiiroo shattiiti, ebi aree konine?

¹¹ Bambeexi bechee nolloon beegoyich, woyino quummito, romaano bungito gaata beegoyich, luuzee budooch hammeho.

¹² Shalligaanoon diqqoona, ta asheenaꞌochi iraasheenaꞌo gaariich koteho.

Nuucheenaꞌo

¹³ Wottebe, Shulemecheene, wottebe; wottebe, neen gaawichi no ciinnemmoyich wottebe. Mahanayimi duubon ciinoommon, Shulemecheen ittoshi ciinniibeeto amoyichiye?