Solomooni 5 - Kafa Linguistics ProjectGurimaashoo 1 Ta manee ta woꞌeene, ta budooch waato taane; ta hareboonaa ta qimaamoonon macito taane; ta eeyon bi neechoona maato taane; ta woyinee uyoonaa ejjoonon ucheto taane. Nuucheenaꞌote, maa uyote; shunechinaꞌote, ittoshi michimmi wottoon uyote. Nuucheenaꞌo Awuddinnee Shoddo Gidiide Bushee 2 Ta tokketeti taane; tunebaani ta mullo qaallitone; ta shiiqqi ishichiibee kelloon bi qofon waayeho: Biyoo, “Ta manee ta shiiqqeene, amee bacholla ne achooch aalli ta daabbicheene, kelloon taach qechibe. Ta qello doshoona, ta qelli eexo aqqee googgoona oqqitone” iye. 3 Ta tahoon shootteti taane; illa wochi tahebote? Ta baatoon macheti taane; illa wochi kiiniibote? 4 Shiiqqi shaaqqee aahoona bi kishoon deejjiye; ta mullo biich qewehe. 5 Ta shiiqqich qechiya tiyeho; ta kishoochee hareboo, ta yapheroochee aache hareboo, shaaqqee tuggooch cotehe. 6 Ta shiiqqich qechiyo; tunebaani ta shiiqqi wotteꞌi hammitone. Bi yibbaateti yibbaatoyich ta mullo muujjiye; biin qaawaa daneyaane taane; ta ceegenoo eekkeyaanoone. 7 Kellechinaꞌo katemoon guuddiibee taan daneheete; taan yexxiꞌi mayiiheete; ebi katemee uxeree kellechinaꞌo toommeexi ta tahoon shoottii daammiyeete. 8 Yerusaalemi gidiideenaꞌote, ittoshin aderaa qollehoye; ta shiiqqin ittoshi danegaata, bi shunoona biiyeti ta tunoon biich getote. Nuucheenaꞌo 9 Genneenaꞌo daggoochee beshe gaaweene! Ne shiiqqi bareenaꞌoyee bi beshito amoonane? Noon ne aderaa qollaabeeto ne shiiqqi bareenaꞌoyee amoon bi besheenane? Gidiide Bushee 10 Ta shiiqqi, malletechonaa dama qeecoonane; aashire humeenaꞌoyee beshoone. 11 Bi qello gaawe aachoommone; bi qelli eexo naalloo, kurechoommi aaꞌone. 12 Bi aafo, woce aachi gashooch beeti, kote aachi gashooch koteti, ejjoommon nacceti, daabbicheenaꞌoommone. 13 Bi gaakkoo shittoommon cinneebeeti, qimaamee bechoo becheeti tagoommone; bi noonoo harebee cinnoon cotiibeeti, naddee bungoommone. 14 Bi kishoo inqoona macecikkeeti, aachee gooshoommone; bi achoo sapiiroona macecikkeeti, yopphetaa naalliti dangeyi gashoommone. 15 Bi baatoo aachee hecee toommooch xogeeti, aaxxe xaqqee giimboommone; bi malleto Libanoosee mixoommone; yigee mixochoommon kaachetone. 16 Bi yibbaatoo oogeti shaawone; bi hullimallo macecikkitone. Yerusaalemi gidiideenaꞌote, ta shiiqqi, ta shunecho, ebiyoommone. |
SIM International, 2020.