Solomooni 4 - Kafa Linguistics ProjectGurimaashoo 1 Ta shiiqqe, ne, malletechi neene; ne, korootee neene. Ne aafoon qeriti qoreddee gubbaa, ne aafo daabbicheyoommone; ne qelli yilloo Gilaadee guudoochee dugilla kindiibeeti, emmishee gotoommone. 2 Ne gasho, ikke yodaalloone; bulliyona matoon shiyiibeeti, boonoshi eexo cakkeꞌi macheti, ikke woderee bagoommone. 3 Ne noonoo ceelle maddoommone; ne noonoo shaawone; ne gaakkoo, ne aafoon qeriti qoreddee maacaa, kappheeti romaanee michi aafoommone. 4 Ne qettimixo ginee qiicoon kaꞌoyich shuuneeti Daawitichi dilaaloommone; hume gaachoo, ginee anaaminaꞌochi ginee qiico bulli, arooch kaqqetone. 5 Gutte ne xaninaꞌo, mato shiijjeti, naddee bungee daggooch maabeeti gutte doollee bushiishoomminaꞌone. 6 Showoo gaargaaraan beetaa, harii xalleyaan beetaa, harebee guudooch, ixaanee geppooch kechemmo taane. 7 Shiiqqe, ne hullimallo gaawetone; amee bacholla ne achooch aalloone. 8 Ta woꞌeene, Libanoosee taanna tookki hambone; Libanoosee taanna tookki hambone. Daahereenaꞌochi gofo, maaheenaꞌochi guudo tuneti, Amaani guudoochee, Seniiri guudonaa Hermooni guudi cullulloonoochee, kindibe. 9 Ta manee ta woꞌeene, ikke wottoon taan ciinona, ta mulloon boggaa deqqeti neene. Ne qetteexi shashoochee ikkoona, ta mulloon boggaa deqqeti neene. 10 Ta manee ta woꞌeene, ne shunoo am shaahoon emirikkiye! Ne shunoo woyinoyee am shaahoon beshiye! Ne shittee cinno shitto bulliyee am shaahoon beshiye! 11 Ta woꞌeene, ne noonoochee eechi woolloo toollii beetone; ne heciyee dechiich ejjoonaa eeyona beetone; ne tahee cinno Libanoosi cinnoommone. 12 Ta manee ta woꞌeene, uxereeti bechee xaaꞌoommine; uxereeti bechee xaaꞌoommi, hicheti aachi tunoommine; 13 ne maayi colleenaꞌooch romaanoonaa gaawe maayi aafoona, cinnechi bungoonaa naridoosoona beetone. 14 Naridooso, karikomo getteebeeti qimaamo, toochoo, qarefoo, baribare ixaanee mixinaꞌo bulli, hareboonaa ereetoona, gaawe cinnoon cinneebeeti qimaamo bullina tookkii beetone. 15 Ne, bechee michi daggeexi aachi xuupheyoommi, kaama ufeebeeti aachi oppeyoommi, Libanoosee ufeebeeti woce aaciyoommi, neene. Gidiide Bushee 16 Dambi-waani yongoocho, tibe; deshi waani yongoocho, wobe; gaawe cinno cinnemmoyich, ta buchi toommooch yongebe. Ta shiiqqi bi budooch wobe; gaawe aafoonoo mame. |
SIM International, 2020.