Solomooni 3 - Kafa Linguistics Project

¹ Xum xumoon ta beeroochaa, ta shiiqqin sharaataa beehoye; biin sharaatehoye; tunebaani daneyaane taane.

² And tiyi katemee gommonaa addibaaboonon guuddemmi taane; kashoona ta shunnaa beeton qaawemmi taane; biin qaawiyoye; tunebaani daneyaane taane.

³ Katemoon guuddii quyeebee, kellechinaꞌo taanna daneheete. Tawoo, “Kashoona ta shunnaa beeton beeggitote?” iyaꞌa boonoshin echeho.

⁴ Boonoshiyee giishechoon bekk beshaꞌa, ta shunnaa beeton daneho; biin manjiyaa yecheho; ta indee kexooch, taan bi shiyeti gatooch, biin ta deebemmi wottoon, gawukkaane taane.

⁵ Yerusaalemi gidiideenaꞌote, bi qelloona qaawii bi tiyimmi wottoon, shunoon ittoshi shuurikki tiijjaachemmoyich, doolloona woyee kubbi boyijjoona ittoshin callehoye.

Keejjinnee Shoddo

⁶ Hareboonaa ixaanoona, giixechinaꞌochi cinnechi qimaamo bullina qanniti shittoona cinneebee, cufee duulloochoommon duulliibee, barahoochee waabeeto amoone?

⁷ Ebi Solomoonichi qeenone; Israꞌeelee ginee anaaminaꞌoochee shiche ginee anaaminaꞌo bi guudoona beetinaꞌone.

⁸ Bulliyona goraadoon cuyetinaꞌone; wottoo aricheti koyechinaꞌone; xumoona woyemmi ettoon kochii wochoyich, goraadoon boonoshi demmooch cuyetinaꞌone.

⁹ Taatoo Solomooni Libanoosee mixoochee bi qellich qeenon shuunehe.

¹⁰ Ebi qeechi tureenaꞌon birewoona, bi qoyoonoo aachoona dikkiihe; bi kotoochoo damere qoreddoon tajjiihe; ebi qeeno maacaanoo Yerusaalemi gidiideenaꞌo shunniꞌi shippiti qoreddoona gaawicheetone.

¹¹ Tsiyooni gidiideenaꞌote, wobote; bi gaarooba, bi oogichii emiriti aabooba, bi indee ukiiti gubbichoon uketi, Taatoo Solomoonin ciinote.