Solomooni 2 - Kafa Linguistics Project

¹ Ta, Shaaroon beeti mocee bungee taane; bambeexi naddee bungee taane.

Gurimaashoo

² Ta shiiqqi, gidiideenaꞌo daggoochaa angichi daggeexi naddee bungoommine.

Gidiide Bushee

³ Ta shiiqqi, gurimaasheenaꞌo daggoochaa, mixinaꞌo daggooch beeti appilee bechoommone. Bi yiirooch koto taan emirikkiye; bi aafo taach shaawiye.

⁴ Bi woyinee uyee gatooch taan daammiye; bi shunoon ta toommooch tiijjiye.

⁵ Bi shunoona ta biiyetoyich, woyinee aafoon maanjiree taan kupphiibote; appiloonoo taan emirikkibote.

⁶ Bi yooche kishoon taach qoyiihe; bi qanne kishoona taan tiqqehe.

⁷ Yerusaalemi gidiideenaꞌote, bi qelloona qaawii bi tiyimmi wottoon, shunoon ittoshi shuurikki tiijjaachemmoyich, doolloona woyee kubbi boyijjoona ittoshin callehoye.

Guttinnee Shoddo

⁸ Shiiqqichi qaaro waayee beete; biyoo guudinaꞌo toommona capphiibee, geppeenaꞌo toommona awureebee, ebiyoche ta waan waa beete.

⁹ Ta shiiqqi doolloommo, boyijjee bushoommone; ebiyoche no uxeree gubb neexete; mallee kelloonoo maac ciinniibeete; kechi aahoonoo cuqeebeete.

¹⁰ Ta shiiqqi taach ishichiye: “Ta shiiqqe, tibe; korooteene, ne waataa hambone.

¹¹ Ebiyoche yooyo beshetone; amiyo shaannitone;

¹² showee toommooch mocoo bungitone; shoddee aabo shaggitone; uggeenaꞌochi qaaro no showooch waayeetone.

¹³ Balaaso gaangitone; woyinoo bungitone; gaawichiꞌi cinnetone; ta shiiqqe, tibe; korooteene, ne waataa hambone.

¹⁴ Bambeexi xaqqee gogginonaa guudi toommeexi aashee xaaꞌoonooch beeti ta daabbicheene, ne qaaro, ne malletoo gaaweto bi tunetoyich, eke neen ciinona; ne qaaroonoo waayebona” iye.

¹⁵ No woyino bungitone; no woyinoon aalliibeeti boqqelleenaꞌon, gishiishi boqqelleenaꞌon, olle yeshote.

¹⁶ Shiiqqi taachone; tawoo biichi taane; biyoo naddee bungee daggooch gijjeenaꞌon quyee beetone.

¹⁷ Shiiqqo, showoo gaargaaraan beetaa, harii xalleyaan beetaa, wottebe; doolloon woyee keyaa giye geppeenaꞌooch beeti, boyijjee bushoon shaahibe.