Solomooni 1 - Kafa Linguistics ProjectIkkinnee Shoddo 1 Shoddo bulliyee beshe Solomoonichi shoddo. Gidiide Bushee 2 Ne shunoo woyinee uyoyee beshoone; wochi wochi taan shumbe. 3 Ne huutaabeeti shitto cinnechone; ne shigo ufeebeeti shittoommone; ebich gidiideenaꞌo neen shunniyeete. 4 Taan yaabi daambe; tookki wocone; taatoo bi gatooch taan deebiye. Nowoo tookki emiribone; emiroonoo wucwucone; ne shunoo woyinee uyoyee beshoon emirikkii beetone; ebich neen gennoo shuno tatoone. 5 Yerusaalemi gidiideenaꞌote, ta aaꞌi taane; tunebaani malletechi taane; ta aaꞌo Qedaari duukkaanoommo, ta malletoo Solomooni kechi maccillaatoommone. 6 Aabo ta malletoon aaꞌiitaa ta aaqqetoyich, taan manjii ciinnaahote. Ta indee shiyeti ta maneenaꞌo taan kaareheete; woyinee quyechin taan tuniiheete; tunebaani ta, ta hajjee woyinee qomboon quyeyaanee taane. 7 Ta shunnaabeetocho, eke taach gete: Ne bageenaꞌon ne quyaabeeto aabiichiye? Aabee qellayooch ne kashiyaabeeto aabiichiye? Bi aafoon kaappeti ureechoommon, ne nuucheenaꞌochi bagee hillooch ta, yallyallimi beeyemmo amoyichiye? Gurimaashoo 8 Genneenaꞌo daggoochee beshe gaaweene, ne ariyaaneegaata, bageenaꞌochi hilloon hilleree wobe; ne emmishee bushiishoon, qiddeenaꞌochi duukkaanee gaꞌooch quyebe. 9 Ta shiiqqe, Faroonichi gaarinaꞌon geechiibeeti baarayeenaꞌochoommon, mallet gaawee neene. 10 Ne gaakkoo shashoona macecikkeetone; aaxxe qalibeto ne qettooch tippetone. 11 Birewee qebbechi aachee shashoon neech shuuniyemmo noone. Gidiide Bushee 12 Taatoo bi qeenooch teeqqeꞌi bi beetaa, ta shittee cinno kexon bullehe. 13 Ta shiiqqi taach, ta xani gutte daggooch kaafaa koteti hareboone. 14 Ta shiiqqi taach, En Geedi woyinee budooch becheeti goddoone. Gurimaashoo 15 Ta shiiqqe, ne, malletechi neene; ne, korootee neene; ne aafo daabbicheyoommone. Gidiide Bushee 16 Ta shiiqqo, ne malletecho neene; am shaahoon taan shuchiinne! No beeroo gare mocoone. 17 No kechi qojjoo yigee mixone; no kechi aafo ciidee mixone. |
SIM International, 2020.