Sofoniyaasi 1 - Kafa Linguistics Project

¹ Amooni bushoo Yosiyaasi Yihudee showoon bi qeejjii beehooba, Hiziqiyaasichi bushoo, Amariyichi bushoo, Gedaliyichi bushoo, Kushiyichi bushoo Sofoniyaasich waati Doono Yeerichi qaaro:

Doono Yeerichi Kaaree Aabo Womo

² Doono Yeeri ishichiye: “Bulli mooyon showee toommoochee hidi aalliyemmo taane.

³ Ashoonaa cooxonon, bahareexi haashoonaa shimaajji gacoonon showee toommoochee hidi aalliyemmo taane; gonde asheenaꞌon dichemmo taane; ashi yaroon showee toommoochee hidi aalliyemmo taane. Ebin gettaabeeto Doono Yeeri taane.

⁴ “Yerusaalemi asheenaꞌonaa Yihudee asheenaꞌo bullinoyich ta mochoon bekkiyemmo taane. Baꞌaaloyich goyinneebeeti asheenaꞌon curooch beddaahaa aalliyemmo taane; ebi nuggishoyich maddeebeeti qeesheenaꞌon ta aalliitaa boonoshi shigo batteyemmone.

⁵ Kechi toommooch kechiichii aabeyich, ageneenaa xojjenoonoyich goyinnee beetinaꞌon aalliyemmo taane. Doono Yeeri taach goyinnee ta shigoona wogeechii, hammii Milikoomi getteebeeti nuggishoochi shigoona wogee beetinaꞌonoo aalliyemmo taane.

⁶ Taach goyinnee maddoon qajjiꞌi bara wottetinaꞌon, boonoshin ta gaachemmoyich, ta waan giddeyaaneenaꞌon aalliyemmo taane” iye.

⁷ Doono Yeerichi aabo shaggitone; Nuggishoo Doono Yeeri aafooch minnakanna gettaahote! Doono Yeeri bi asheenaꞌon gijjoon deejjoommon deejjiya qanniitone; Yihudee showoon boshemmi ettoon ceeggitone.

⁸ Doono Yeeri ishichitone: “Ebi deejjee aabooba, iraasheenaꞌon, taatoochi bushiisheenaꞌonaa bare showee ashi doyoon dabbii beetinaꞌonon naxemmo taane.

⁹ Ebi arooba, yaafee kechi kelletoochaa caphee beetinaꞌon, ashoon wuxoonaa bogona daneebeeti mooyona boonoshi doono kexon ceechii beetinaꞌonoo naxemmo taane” itone.

¹⁰ Doono Yeeri ishichiye: “Ebi arooba, Haashee Kelloochaa eeppi qaaro, andiro tuneti katemee kuxoochaa shooshee qaaro, geppoochaanoo kechi dihee qaaro waayeyemmone.

¹¹ Katemee deshi kuxooch beeti asheenaꞌote, giixechinaꞌo bulli aalletoyich, birewoona giixee beetinaꞌo bulli qititoyich, shooshe eefote.

¹² Arooba, ceechoon yeshiree Yerusaalemin boshemmo taane. Michii beetinaꞌon, boonoshi qelloon gibenee beetinaꞌon, boonoshi mulloonoo ‘Doono Yeeri gondoon tuneba deꞌe mooyon tuniyaache’ ii gabii beetinaꞌon naxemmo taane.

¹³ Boonoshi gaanno kecceyemmone; boonoshi kexoo tiishemmone. Kexon haggemminaꞌone; tunebaani arooch beetaachemminaꞌone. Woyinoon bechemminaꞌone; tunebaani woyinee uyoon uyaachemminaꞌone” iye.

¹⁴ Shattiiti Doono Yeerichi aabo katinnitone; oogichiꞌi katinnitone; afaafineꞌi shaggitone. Ebi are aabo caammiti aabo tunemmone. Ebi arooba giidechi ginee naayo bi gibenemmon mucceree oogichi cookemmone.

¹⁵ Ebi aabo, kaaree aabo, iritee aaboonaa duꞌee aaboona, aallaa billimee aabo, shitirippimii mandereti aabo, quboonaa dunne manderoona tuneti aaboo tunemmone.

¹⁶ Ebi aabo, xaqqee uxerechi katemoonaa genje dilaaloonoochaa tiree qaaroonaa ginoochaa cookeebeeti qaaroona waayeyemmi aabo tunemmone.

¹⁷ Doono Yeeri ishichiye: “Axaaxoon shuunoona taan boonoshi xuqqitoyich, aaf doogoochoommon boonoshi shaꞌemmi wottoon duꞌoon ashi toommooch deebemmo taane. Boonoshi damoo aacochoommon ufemmone; boonoshi dubenoo guudoo duppeyoommon, danemmooch duppeyemmone” iye.

¹⁸ Doono Yeerichi kaaree aabooba, boonoshi aachoonaa birewoona boonoshin wodiyoon hakkaachemmone. Qaaqqoo aaxxoommon aaxxeebeeti bi qanaatee kaaroona showoo bulli mici aallemmone. Showee toommooch beeti asheenaꞌo bulli toommooch diqqoona aalloon deebemmone.