Shoosho 5 - Kafa Linguistics Project

Maaroon Danoyich Corooteeti Corooto

¹ Doono Yeero, no toommooch shaggiton batteyaahine; ciine, no cooneyoonoo beege!

² No iristo bare showee asheenaꞌoyich, no kexo dallaaweenaꞌoyich tunehe.

³ Nihaalloon tuneto noone; no indeenaꞌoo xuumeenaꞌon tuneheete.

⁴ No uchaabeeti aacoyich gijjoon qoccehone; mixo no danaabeeto kemaꞌaniye.

⁵ Waanjoo no qettooch haxaa, yookkaabeeto noone; taahito noone; tooqqii kashoon mucceto noone.

⁶ Koshon michii mamoyich, Gibitseenaꞌonaa Asooreenaꞌoyich kishoon immehone.

⁷ Axaaxoon shuunetinaꞌo no qaabbechinaꞌone; boonoshiyoo and aalleenaꞌone; tunebaani no boonoshi axaaxoon miꞌehone.

⁸ Guuninaꞌo no toommooch taateheete; boonoshi kishoochee noon wodiyemmo aalloone.

⁹ Barahooch goraado bi beetoyich, no maayoon no danaabeeto, qitoona qiiccabeenane.

¹⁰ Shaacoo machmachaayii michoochee tiyitona no achoo gudee gaamoommon gaamiye.

¹¹ Maacheenaꞌo Tsiyoonaa, gidiideenaꞌoo Yihudee katemeenaꞌoochaa, giidoona yeshaa mecheheete.

¹² Iraasheenaꞌo kishoo cucheꞌi yooddeheete; geeneenaꞌoyichoo oogo bachehe.

¹³ Gurimaasheenaꞌo giidoona yeshaa xaqqoon yiikkeheete. Anaami bushiisheenaꞌo michi maggoochee tiyitona tattelleheete.

¹⁴ Geeneenaꞌo iitee xaaꞌoochee wokkiyeete; gurimaasheenaꞌo shoddoon qajjiyeete.

¹⁵ No mulloochee emiroo aalletone; no duubo eefona shaddeetone.

¹⁶ No qelloochee gubbichoo hollitone; axaaxoon no shuunetoyich nooch woowo!

¹⁷ No mullo biiyetone; no aafo doojjitone.

¹⁸ Ebiyoo Tsiyooni guudo qixeetoyich, boqqelleenaꞌoo arooch kuufaareetoyichiye.

¹⁹ Doono Yeero, ne, bulli yemeenoon taatemmo neene; ne taatee qeeno shiijjeroo bulliich manjoone.

²⁰ Bulli yemeenoon noon ne batteto amoyichiye? Yage yemeenoon noon ne qajjeto amoyichiye?

²¹ Doono Yeero, ne waan noon wochibe; nowoo wottemmo noone; no yemeenoonoo wonneechoommon andiriibe!

²² Ebi tuno qayigaata, noon ciiroona duppetine, no toommoochoo oogichaa kaaretine, getone.