Shoosho 4 - Kafa Linguistics Project

Yerusaalemi Naxeeti Naxo

¹ Yaafee kechi xaqqeenaꞌo gommo bulliich shaceheete; ye aachoo aabichiꞌi dooshirehe! Gaawe aachoo aabichiꞌi shaddeehe!

² Gaawe aachooch haddeeti Tsiyooni bushiisheenaꞌo, nuuqqee hachechochi kishoona hacheeti, nuuqqee qiicoommon aabichiꞌi haddeeheete!

³ Boqqelleenaꞌolla boonoshi xanon boonoshi bushiisheenaꞌoyich xaachiyeete; tunebaani ta asheenaꞌo baraheexi shaakkoochoommon, maacmanjoon tuneheete.

⁴ Xammiibeeti gaggeroochi heciyoo shachewoochee tiyitona tigaanoona xaaqqeehe; gaggereenaꞌo koshon qolleheete; tunebaani boonoshich immemmo aallehe.

⁵ Shaawi maayoon maabee echetinaꞌo shaaceꞌi gommooch dihiyeete; damere tahoon tahee diccitinaꞌo tullee baashooch tokketeheete.

⁶ Ta asheenaꞌochi toommooch shaggiti naxo, ashi kishoo shagaanoon qillifee yexx bedaan beetaa guufeti, Sodoomi toommooch shaggiti naxoyee beshoone.

⁷ No iraasheenaꞌo baderoyee beshe xalleenaꞌo, ejjoyee beshe nacceenaꞌone; boonoshi ashittino ceelle inqoyee beshe gaangoone; sapiiroommi malletechinaꞌone.

⁸ Tunebaani and, boonoshi aafo shiixxoyee beshoon aaqqiye; gommoochaanoo aricheyaaneenaꞌone; mixochoommon shuuqqiti boonoshi achoo, shaawushoona xaaqqeetone.

⁹ Shaacoona qititinaꞌoyee, goraadoona qititinaꞌoyich gaawiye; budoochee daneebeeti maayoon mucceꞌi, xambii aalletinaꞌone.

¹⁰ Ariqqechi maacheenaꞌochi kishoo boonoshi hajjee bushiisheenaꞌon kiijjiye; ta asheenaꞌochi aallee aabooba boonoshich maayoon tuneheete.

¹¹ Doono Yeeri bi kaaree shiixxoon kindiihe; ooge bi kaaroon woniihe; Tsiyooni toommooch qaaqqoon geddiye; dechi bi hecoonoo michiye.

¹² Showee taateenaꞌo woyee showee toommooch beetinaꞌo bulli, shixecho woyee etto Yerusaalemi xaqqee uxeree kelloona giyemmone iꞌi iberiyaaneenaꞌone.

¹³ Ebi bi tuneto, keemechinaꞌochi axaaxoyich, qeesheenaꞌochi xuꞌoyich, cadiqeenaꞌochi damoon bi daggoochaa boonoshi ukkitoyichiye.

¹⁴ Aaf doogoochoommon, gommona yallyallimiyeete; damoona eeꞌetinaꞌo boonoshi tunetoyich, koniyoona boonoshi tahoon yeshaache.

¹⁵ Asheenaꞌoo, “Eeꞌeenaꞌote, wohi hambote! Wohote, wohote! No achooch shaggaahote” ii boonoshi toommooch cookiyeete; ebina yookketinaꞌonaa yallyallimechinaꞌona tuneheete; aageteenaꞌo daggooch beeti asheenaꞌoo, “Ebiyee bekk noonna tookki beetaacheete” iyeete.

¹⁶ Doono Yeeri bi qelloona boonoshin shacciye; illa ebiyee bekk boonoshich aaxxiyaachemmone. Qeesheenaꞌoo oogoon daneyaachemminaꞌone; geeneenaꞌoo gaawe aafoona ciicheyaachemminaꞌone.

¹⁷ Gaachoon duuboon quyoona no aafo dabbidabbiye; no quyee xaaꞌoochaa noon wodiyoon hakkaani aageteenaꞌon quyehone.

¹⁸ Etto no hilloon hillee beehe; ebich gommona hamon hakkaano noone; no ciiro katinnitone; no deco ciiretone; no ciiro shaggitone.

¹⁹ Noon yookkii beetinaꞌo shimaajji booyoyee beshe afaafinechinaꞌone; guudinaꞌochi toommoochaa noon yookkii dabbiyeete; barahoochaanoo noon ottii quyeheete.

²⁰ “Aageteenaꞌo daggoochaa nooch deebo tunemmone, bi yiirooch beeyemmo noone” no iti no taatoo, Doono Yeerina huutteti no kashee hiinno, boonoshi hiriyooch yechehe.

²¹ Uutsi showooch beeti Edoomi asheenaꞌote, emiribote; emiroonoo wucwucote! Tunebaani ittoshichoo xoofoo shaggemmone; mashemmo ittoshine; shokkaachoonoo echemmo ittoshine.

²² Tsiyooni asheenaꞌote, ittoshi xuꞌee naxo ciiretone; Doono Yeeriyoo ebiyee bekk ittoshi kecceyemmoyich tuniyaachemmone. Tunebaani Edoomi asheenaꞌote, ittoshi xuꞌoyich naxeyemmo ittoshine; ittoshi axaaxoo xalla bekkemmone.