Shoosho 3 - Kafa Linguistics Project

Gondoochee Wottoona Daanee Beeti Gibeno

¹ Bi kaaree gumboona xuuxoon beeggeti asho taane.

² Bekkaalli manderooch taan gashee daammiye.

³ Bi kishoon ta toommooch tiijjiꞌi, heeyo bullin wochii wochii taan yexxiye.

⁴ Ta meeno, ta achoo niremmoyich tuniihe; ta shaawushoonoo tiichiye.

⁵ Taan giichiye; kashee caammeyoonaa xuuxoona taan giichemmoyich tuniihe.

⁶ Qitii batteetinaꞌochoommon manderooch ta beeyemmoyich tuniihe.

⁷ Ta muricaachemmoyich uxeroon uxerehe; magge sansalatoona taan cuchiye.

⁸ Gaachoon danoyich, ta abeetaa, ta cookaa ta corootoon waayemmon qajjiye.

⁹ Ta gommon xareeti xaqqoona hicciye; ta boochoonoo xummiihe.

¹⁰ Ottiibeeti diiboommon, nappii quyeebeeti daaheroommonoo, taach tunehe.

¹¹ Ta gommoochee taan shottee kichiye; taan yangixxiye; shokkoon taan echiihe.

¹² Bi maꞌoon geechiye; bi shangoyich malletoon taan tuniihe.

¹³ Shangeenaꞌon gonenoochee kichiꞌi, ta mullooch kochiye.

¹⁴ Asho bullich diigee ashoon tunehoye; heeyo bullin shoddoona taan cooneheete.

¹⁵ Caame mooyon ta kashooch woniihe; ereetoon taach uchii michiihe.

¹⁶ Xaqqooch taan guuppiꞌi ta gashoon tiichiye; tullooch taan gederikkiye.

¹⁷ Ta kasho diggoon muccehe; emiroo amo gaata battehoye.

¹⁸ Ebich “Ta giidoo qajjitone; Doono Yeerin, ta gibenaabeeti gibeno echetone” iyo.

¹⁹ Ta xuuxoonaa ta yallyallimoonon ta kashee caammeyoonaa cattettimoonon, gabiyoye.

²⁰ Ta kashe ebin gaboochee tiyitona, maacaa dookkahane.

²¹ Tunebaani ebi ikke mooyon ta gabimmona, ta gibeno andirehe.

²² Ebiyoo bi ariqqo ciireyaano bi tunetoyich, aalleyaanoon ebiich no beddeto Doono Yeerichi shoodoona bi tunooniye.

²³ Bi ariqqo bi shoodoo maaddi maaddoona andiree beetone; Doono Yeeri oogichii gibeneetone.

²⁴ Ta kashee, “Doono Yeeri ta qoodee iristo bi tunetoyich, biin gibenemmi taane” iyan.

²⁵ Doono Yeeri, biin gibenoona quyee beetinaꞌoyich, bi waan wottee beetinaꞌoyichoo gaawetone.

²⁶ Asho cikkiꞌi Doono Yeerichi wodiyoon, bi gibenegaata gaawiye.

²⁷ Busheebee iritee waanjoon shaago ashich gaawetone.

²⁸ Doono Yeeri iritoon bi toommooch bi deebiyooba, cikkimiree bi ikkeeto kotebe.

²⁹ Diqqich gibeno biich beeyemmo bi tunetoyich, bi qelloon yittii hajjeebe.

³⁰ Bi gaakkoonoo tappemmoyich bekkiibe; naaggoonoo miye.

³¹ Doono bulli yemeenoon dufaano bi tunetoyich,

³² bi ayinikkiteenona beshaa beshe bi shoodoona ariqqemmone.

³³ Mulloochee tiijjiꞌi, ashi bushiishoon xuuxii ayinikkaanoone.

³⁴ Showoochaa qoppeenaꞌo bulli baatee dechiich neexxee gaata,

³⁵ Beshoo Yeeri aafoochaa ashi aalloo (gooroo) bokkegaata,

³⁶ ashi nalloo xummegaata, Doono ebiyoommi mooyon beegaachehe?

³⁷ Doono daaggaanoon, bi geto ceeno hakkemmo konine?

³⁸ Deꞌo tuneba gondo bi tunemmo Beshoo Yeeri getigaata baach toone?

³⁹ Ishigaata kashoona beeti asho, bi axaaxee naboona bi sheerehooba, bi guruuxiibeeto amoyichiye?

⁴⁰ No gommon huushi boshebone; Doono Yeer waan wottebone.

⁴¹ No mulloon no kishoona tookki, shimaayooch beeti Nuggishoo Yeer waan tiijjibone; ishichishoo getone:

⁴² “Xuqqeto noone; hukkoon shuuneto noone; newoo noon maaraano neene.

⁴³ “Kaaroona gufihine; noon yookkaa dabbihine; ariqqaalloonoo noon wuxihine.

⁴⁴ Corooto beshee gimon hakkaani quboona, neen qerihine.

⁴⁵ Aageteenaꞌo daggooch noon guudoonaa hippaafoonon tuniihine.

⁴⁶ “No etteenaꞌo bulli no toommooch noonoo keexeheete.

⁴⁷ Keqqoonaa dihoona, happeyoonaa aalloona no toommooch shaggitone” getone.

⁴⁸ Ta asheenaꞌo aalloochee tiyitona, ta aafo aacochoommon acimoon ukkiye.

^49-50 Doono Yeeri shimaayoochaa dugilla ciinnii, bi beeggimmi wottoon, ta acimo tooꞌaanoon ufemmone.

⁵¹ Ta katemeexi maacheenaꞌochi toommooch shaggiti mooyon ta ciinnemmona, ta kasho caammehe.

⁵² Naboo aalloon taach etto tunetinaꞌo, kafoochoommon taan kambeheete.

⁵³ Kashoona ta beetaa taan oppooch duppiichii, oppee noonooch xaqqoon keddeheete.

⁵⁴ Aaco taan qooxxiye; tawoo “Aalleto taane!” iyoye.

⁵⁵ Oppee duchoochaa, Doono Yeero, ne shigoon ceeggehoye.

⁵⁶ Ta qolloon waayehine; gaachee danoyich ta cookaa ne waamon badd wochaano neene.

⁵⁷ Neen ta ceegiyooba katinnehine; taanoo “Shattaahine” iyine.

⁵⁸ Ta Doonocho! Ta qoodooch taggaꞌa ta kashoon shiwehine.

⁵⁹ Ta Doono Yeero! Ta toommooch shuuneeti gondoon beegiree, ta taggoon nallibe!

⁶⁰ Boonoshi kichiibeeti nichoo bullin, ta toommooch boonoshi koceeto bullin, beeggehine.

⁶¹ Doono Yeero, boonoshi naagoon, ta toommooch boonoshi koceyoo bullin, waayehine.

⁶² Ta etteenaꞌo heeyo bullin, ta toommooch shaashikkeebee boyeeheete.

⁶³ Koteechinoo tuneba neexeechi, shoddoona taan boonoshi coonoon beege!

⁶⁴ Doono Yeero, boonoshi shuunoommon boonoshich qoce!

⁶⁵ Boonoshi mulloon muumiibe; ne ufo boonoshi toommooch shage.

⁶⁶ Doono Yeero, kaaroona boonoshin yoohi dabbibe; shimaayoyee deshee boonoshin aalliibe.