Shoddo 97 - Kafa Linguistics Project

Yeeriyee Besh Nuggishoo Aallo Tuno

¹ Doono Yeeri taatetone; showoo emiribe; wohooch beeti buure showeenaꞌo bulliyoo emiribeete.

² Quboonaa dunne manderoona bi guudooch beetone; cadiqoonaa dayinnetoona bi taatee qeechi heceenaꞌone.

³ Qaaqqoo biyee aaf hammiye; bi guudoona beeti bi etteenaꞌon maahe.

⁴ Bi xeeyo alemo bulliich phaqqii bekkehe; showoo bulli ebin beeggii qewehe.

⁵ Guudinaꞌo Doono Yeeri aafooch, showoo bullichi Doono aafooch, gippoochoommon wocciyeete.

⁶ Shimaayeenaꞌo bi cadiqittinoon awaajjiyeete; macceenaꞌo bulli bi oogoon beeggiyeete.

⁷ Shahalleenaꞌoyich goyinnee beetinaꞌonaa boonoshina yebenee beetinaꞌona, yeellemminaꞌone; nuggisheenaꞌote, bi aafooch goyinnebote.

⁸ Doono Yeero, tate ne nalloon, Tsiyooni waayaa emiriyane; Yihudee katemeenaꞌoo waayee emiroona wucwucciyeete.

⁹ Doono Yeero, ne, showee toommo bulliich Beshoo Yeeri neene; nuggisheenaꞌo bulliyee oogeti beshoo neene.

¹⁰ Doono Yeeri gondoon shixxii beetinaꞌon shunniye; bi yaafeenaꞌochi kashoon quyehe; gondoochi kishoochee boonoshin wodiihe.

¹¹ Cadiqeenaꞌoyich bekko bekkehe; mulli kaameenaꞌoyichoo emiroo tunehe.

¹² Cadiqeenaꞌote, Doono Yeerina emiribote; yaafe bi shigoonoo galletebote.